ລັດຖະບານ ຕ້ອງການງົບປະມານ ຫຼາຍກວ່າ 4.000 ຕື້ກີບ ຫຼື ປະມານ 520 ລ້ານໂດລາສະຫະລັດ ໃນການຟື້ນຟູຫຼັງເກີດໄພພິບັດ ໄລຍະເດືອນກັນຍາ ຫາ ເດືອນຕຸລາ 2018 ຜ່ານມາ.
ບັນດາອົງການຈັດຕັ້ງຂອງລັດຖະບານລາວ ແລະ ຄູ່ຮ່ວມພັດທະນາ ຈັດກອງປະຊຸມປຶກສາຫາລື ການຟື້ນຟູຫຼັງໄພພິບັດຂອງ ສປປ ລາວ ໃນວັນທີ 8 ເມສາ 2019 ຢູ່ທີ່ ນະຄອນຫລວງວຽງຈັນ.
ໂດຍສືບເນື່ອງມາຈາກສິ່ງທີ່ໄດ້ຄົ້ນພົບ ຈາກການປະເມີນຄວາມຕ້ອງການຫຼັງເກີດໄພພິບັດ ໄລຍະເດືອນກັນຍາ ຫາ ເດືອນຕຸລາ 2018 ຜ່ານມາ, ເຊິ່ງການປຶກສາຫາລືຄັ້ງນີ້ ກໍເພື່ອຟື້ນຟູ ແລະ ປັບປຸງການເຂົ້າເຖິງການບໍລິການສັງຄົມຂັ້ນພື້ນຖານ ແລະ ການມີວຽກເຮັດງານທຳ, ການຍົກລະດັບຄວາມສາມາດໃນການຮັບມືກັບໄພນ້ຳຖ້ວມ ແລະ ໄພພິບັດທາງທຳມະຊາດອື່ນໆ.
ໃນບົດລາຍງານ ປະເມີນຄວາມຕ້ອງການຫຼັງເກີດໄພພິບັດດັ່ງກ່າວ, ໄດ້ປະເມີນຄວາມເສຍຫາຍ ແລະ ການສູນເສຍທັງໝົດ ປະມານ 3.167 ຕີ້ກີບ ຫລື ປະມານ 372 ລ້ານໂດລາສະຫະລັດ, ເຊິ່ງເທົ່າກັບ 2,1% ຂອງລວມຍອດຜະລິດຕະພັນພາຍໃນ ທີ່ຄາດຄະເນໃນປີ 2018 ແລະ ຄວາມຕ້ອງການດ້ານງົບປະມານໃນການຟື້ນຟູ 4.423 ຕື້ກີບ ຫລື ປະມານ 520 ລ້ານໂດລາສະຫະລັດ. ນອກນີ້, ການປະເມີນດັ່ງກ່າວຍັງໄດ້ກຳນົດຂະແໜງການທີ່ເປັນບູລິມະສິດ ເຊິ່ງປະກອບມີ ການຄົມມະນາຄົມຂົນສົ່ງ, ກະສິ ກຳ ແລະ ທາງນ້ຳໄຫຼຜ່ານ ລວມທັງຄວາມຕ້ອງການທີ່ສຳຄັນ ຂອງແຕ່ລະຂະແໜງການ.
ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໄດ້ກ່າວວ່າ: ຕໍ່ກັບວຽກງານການຟື້ນຟູຫຼັງໄພພິບັດດັ່ງກ່າວ, ໃນຕໍ່ໜ້ານີ້ ກະຊວງແຮງງານ ແລະ ສະຫວັດດີການສັງຄົມ ກໍຄື ຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ຈະສືບຕໍ່ສົມທົບກັບກະຊວງແຜນການ ແລະ ການລົງທຶນ ແລະ ພາກສ່ວນກ່ຽວຂ້ອງ ເພື່ອດຳເນີນການວາງແຜນກິດຈະກຳໂຄງການຟື້ນຟູຫຼັງໄພພິບັດຢ່າງລະອຽດ, ການດຳເນີນງານສຳລັບການຟື້ນຟູຫຼັງເກີດໄພພິບັດ ແມ່ນຈະໄດ້ຖືລະບຸໃນແຜນຟື້ນຟູຂອງກະຊວງ ແລະ ມີຄວາມສອດຄ່ອງກັບກົນໄກການວາງແຜນລະດັບຊາດ ເຊິ່ງລວມທັງແຜນພັດທະນາເສດຖະກິດ-ສັງຄົມແຫ່ງຊາດ. ໃນນັ້ນ ຫຼັກການທີ່ເປັນຍຸດທະສາດສຳລັບການວາງແຜນລວມມີ: ການຟື້ນຟູການດຳລົງຊີວິດຂອງປະຊາຊົນໂດຍໄວ ແລະ ການຟື້ນຟູເສດຖະກິດໃນທ້ອງຖິ່ນ ໂດຍສຸມໃສ່ກຸ່ມຄົນທີ່ມີຄວາມສ່ຽງທີ່ສຸດ ແລະ ດ້ອຍໂອກາດທີ່ສຸດ; ການຮັກສາໝາກຜົນຂອງການພັດທະນາ; ການຟື້ນຟູຕ້ອງມີການປະສານງານທີ່ສອດຄ່ອງກັນ ແລະ ການສ້າງຄືນໃຫ້ດີກວ່າເກົ່າ.
ຂຽນໂດຍ: ແຟນຊິສ ສະຫວັນຄຳ