ວັນທີ 26 ມີນາ 2019 ສຳນັກຂ່າວຕ່າງປະເທດລາຍງານວ່າ ເຮືອບິນໂດຍສານຖ້ຽວບິນ BA3271 ຂອງສາຍການບິນບຣິຕິຊ ແອຣ໌ເວ ອອກເດີນທາງຈາກສະໜາມບິນລອນດອນຊີຕີ້ ໃນເຊົ້າວັນຈັນທີ 25 ມີນາ 2019 ໂດຍເຮືອບິນລຳນີ້ມີກຳນົດປາຍທາງທີ່ເມືອງ ດຸສເຊລດໍ ປະເທດເຢຍລະມັນ ແຕ່ເຮືອບິນນີ້ກັບເດີນທາງໄປລົງຈອດທີ່ເມືອງ ເອດິນບະຣະຂອງ ສະກອດແລນ.
ທັງນີ້, ຜູ້ໂດຍສານໃນເຮືອບິນລຳດັ່ງກ່າວເລີ່ມສັງເກດເຫັນຄວາມຜິດປົກກະຕິ ເມື່ອເຮືອບິນລົງຈອດຣັນເວ ແລະ ເບິ່ງອອກຜ່ານປ່ອງຢ້ຽມຂອງເຮືອບິນເຫັນປ້າຍ ຍິນດີຕ້ອນຮັບສູ່ເອດິນບະຣະ ຈຶ່ງໄດ້ແຈ້ງໃຫ້ພະນັກງານຕ້ອນຮັບເທິງເຮືອບິນຮັບຮູ້.
ຫຼັງລົງຈອດທີ່ສະໜາມບິນເອດິນບະຣະ ແລະ ນັກບິນໄດ້ພົບຄວາມຜິດພາດ ເຮືອບິນຕ້ອງເຕີມນໍ້າມັນ ແລະ ອອກເດີນທາງກັບຄືນໄປທີ່ດຸສເຊລດໍ ເຊິ່ງຢູ່ຫ່າງອອກໄປປະມານ 804.6 ກິໂລແມັດ ເຮັດໃຫ້ເຮືອບິນລົງຈອດທີ່ສະໜາມບິນດຸສເຊລດໍ ຊ້າກວ່າກຳນົດ 3 ຊົ່ວໂມງ.
ດ້ານໂຄສົກສາຍການບິນ ບຣິຕິຊ ແອຣ໌ເວ ອອກຖະແຫຼງການຂໍໂທດຜູ້ໂດຍສານ ໂດຍບອກວ່າທາງບໍລິສັດ ຈະຕິດຕໍ່ຜູ້ໂດຍສານເປັລາຍບຸກຄົນເພື່ອຂໍໂທດທີ່ເຮັດໃຫ້ເກີດຄວາມບໍ່ສະດວກໃນການເດີນທາງຄັ້ງນີ້ ແລະ ຈຳເຮັດການສອບສວນຫາສາເຫດຂອງຄວາມຜິດພາດທີ່ເກີດຂຶ້ນໃນຄັ້ງນີ້.
ຮຽບຮຽງບົດ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: sanook.