ສຳນັກຂ່າວຕ່າງປະເທດລາຍງານ ຈາກສາທາລະນະລັດປະຊາທິປະໄຕກົງໂກ (DR Congo) ເມື່ອວັນທີ 10 ກຸມພາ 2019 ວ່າ ກະຊວງສາທາລະນະສຸກຂອງກົງໂກອອກມາຖະແຫຼງການເມື່ອວັນເສົາທີ່ຜ່ານມາວ່າ ຈຳນວນຜູ້ເສຍຊີວິດຈາກການຕິດເຊື້ອໄວຣັສອີໂບລາໃນປະເທດນັບຕັ້ງແຕ່ເດືອນ ສິງຫາ 2018 ໄດ້ເພີ່ມຂຶ້ນຢ່າງໜ້ອຍ 502 ຄົນ, ສ່ວນຈຳນວນຜູ້ປ່ວຍສະສົມມີຢ່າງໜ້ອຍ 271 ຄົນ, ພາກຕາເວັນອອກສຽງເໜືອຂອງປະເທດຍັງເປັນພື້ນທີ່ ທີ່ມີການແຜ່ລະບາດເຊື້ອໄວຣັສອີໂບລາ ໂດຍສະເພາະແມ່ນແຂວງ ຄິວູເໜືອ ເຊິ່ງເປັນແຂວງໃຫຍ່ ມີປະຊາກອນອາໃສຢູ່ຫຼາຍເຖິງ 800.000ຄົນ ແລະ ມີຊາຍແດນຕິດກັບອູກັນດາ ແລະ ຊູດານໃຕ້.
ທ່ານ ໂອລີ ໄອລຸນກາ ຄາເລນກາ ລັດຖະມົນຕີກະຊວງສາທາລະນະສຸກຂອງກົງໂກ ກ່າວວ່າ ໂຄງການຢາຍວັກຊີນທີ່ໄດ້ຮັບການສະໜັບສະໜູນຈາກອົງການອະນາໄມໂລກ ທີ່ດຳເນີນງານມາຕັ້ງແຕ່ເດືອນເມສາ 2018 ສາມາດປ້ອງກັນຄວາມສ່ຽງການຕິດເຊື້ອ ແລະ ການເສຍຊີວິດຂອງປະຊາຊົນຈຳນວນຫຼາຍໄດ້ ໂດຍມີຜູ້ໄດ້ຮັບວັກຊີນແລ້ວຢ່າງໜ້ອຍ 76.425ຄົນ ແຕ່ຍອມຮັບວ່າຍ້ອນສະຖານະການດ້ານຄວາມໝັ້ນຄົງໃນພາກຕາເວັນອອກສຽງເໜືອຂອງປະເທດມັນໄດ້ສົ່ງຜົນກະທົບຕໍ່ການປະຕິບັດງານຂອງເຈົ້າໜ້າທີ່ ທີ່ລົງໄປແຈກຢາຍວັກຊີນ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂ່າວ: dailynews