ວັນທີ 23 ທັນວາ 2013 ນີ້ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໄດ້ຫວນຄືນມູນເຊື້ອປະຫວັດສາດຂອງຊາດຄື: ວັນສ້າງຕັ້ງກອງທັບປະຊາຊົນລາວ ຄົບຮອບ 65 ປີ (20/1/1949-20/1/2014) ຂຶ້ນທີ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ໂດຍໃຫ້ກຽດປາຖະກະຖາຂອງທ່ານ ພົນເອກ ສີສະຫວາດ ແກ້ວບຸນພັນ ອະດີດກຳມະການກົມການເມືອງສູນກາງພັກ ອະດີດປະທານສູນກາງແນວລາວສ້າງຊາດ ຊຶ່ງມີທ່ານ ສຈ.ດຣ. ບໍ່ແສງຄຳ ວົງດາລາ ລັດຖະມົນຕີວ່າການ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ບັນດາທ່ານຄະນະພັກ ຄະນະນຳ ສະມາຊິກພັກ ແລະ ພະນັກງານ-ລັດຖະກອນອ້ອມຂ້າງກະຊວງ ຖວທ ເຂົ້າຮ່ວມຮັບຟັງ 500 ກວ່າທ່ານ.
ການປາຖະກະຖາຄັ້ງນີ້ ທ່ານ ພົນເອກ ສີສະຫວາດ ແກ້ວບຸນພັນ ໄດ້ຍົກໃຫ້ເຫັນມູນເຊື້ອປະຫວັດສາດ ກໍຄືການກຳເນີດເຕີບໃຫຍ່ຂະຫຍາຍຕົວ ຂອງກອງທັບປະຊາຊົນລາວ ຕະຫຼອດໄລຍະເກືອບ 65 ປີຜ່ານມາ ໂດຍສະເພາະແມ່ນໄລຍະຕໍ່ສູ້ກູ້ຊາດ ຕ້ານພວກຈັກກະພັດລ່າເມືອງຂຶ້ນແບບເກົ່າ ແລະ ໃໝ່ ພາຍໃຕ້ການຊີ້ນຳ-ນຳພາໂດຍກົງຂອງພັກປະຊາຊົນປະຕິວັດລາວ ກອງທັບປະຊາຊົນລາວ ໄດ້ຮັບການສ້າງຕັ້ງຂຶ້ນໃນວັນທີ 20 ມັງກອນ 1949 ຢູ່ເຂດທີ່ໝັ້ນການປະຕິວັດ ແຂວງຫົວພັນ ໂດຍແມ່ນປະທານ ໄກສອນ ພົມວິຫານ ເປັນຜູ້ກໍ່ຕັ້ງຂຶ້ນ ຊຶ່ງກອງທັບປະຊາຊົນລາວ ພາຍຫຼັງສ້າງຕັ້ງຂຶ້ນ ກໍ່ໄດ້ເຮັດໜ້າທີ່ອັນໜັກໜ່ວງ ໃນການນຳພາປະຊາຊົນລາວບັນດາເຜົ່າ ຕໍ່ສູ້ກັບພວກຈັກກະພັດລ່າເມືອງຂຶ້ນ ເພື່ອຍາດເອົາເອກະລາດ ຍາດເອົາຄວາມເປັນເຈົ້າຂອງປະເທດຊາດອັນແທ້ຈິງ ມາໃຫ້ປະຊາຊົນລາວ ກອງທັບປະຊາຊົນລາວຍິ່ງຕໍ່ສູ້ຍິ່ງມີຄວາມເຂັ້ມແຂງ ແລະ ເຕີບໃຫຍ່ຂະຫຍາຍຕົວເປັນກ້າວໆ ສາມາດຕີເອົາໄຊຊະນະຝ່າຍກົງກັນຂ້າມໄດ້ຢ່າງມີໄຊ ແລະ ກ້າວໄປເຖິງການປົດປ່ອຍປະເທດຊາດ ປະກາດເອກະລາດ ສະຖາປະນາ ສປປ ລາວ ຂຶ້ນໃນວັນທີ 2 ທັນວາ 1975 ແລະ ພາຍຫຼັງປະເທດຊາດໄດ້ຮັບການປົດປ່ອຍ ກອງທັບປະຊາຊົນລາວ ກໍ່ສືບຕໍ່ເຮັດພາລະບົດບາດໜ້າທີ່ຂອງຕົນຢ່າງເຂັ້ມແຂງ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ພ້ອມທັງສ້າງກອງທັບໃຫ້ມີຄວາມເຕີບໃຫຍ່ ແລະ ເຂັ້ມແຂງຮອບດ້ານເປັນກ້າວໆມາເຖິງທຸກວັນນີ້.
ທີ່ມາhttp://www.vientianemai.net