ໃນວັນທີ 7 ມີນາ 2019 ທີ່ສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດນະຄອນຫລວງວຽງຈັນ, ໄດ້ຈັດກອງປະຊຸມສະພາບໍລິຫານກອງທຶນຫຼຸດຜ່ອນຄວາມທຸກຍາກ (ທລຍ) ຄັ້ງທີ 24 ຂຶ້ນ, ໂດຍການເປັນປະທານຂອງ ທ່ານ ລຽນ ທິແກ້ວ ລັດຖະມົນຕີ ກະຊວງກະສິກຳ ແລະ ປ່າໄມ້, ທັງເປັນປະທານສະພາບໍລິຫານ ທລຍ, ມີບັນດາຮອງປະທານ ແລະ ຄະນະກຳມະການສະພາບໍລິຫານ ທລຍ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ໃນໂອກາດດັ່ງກ່າວ, ທ່ານ ລຽນ ທິແກ້ວ ກ່າວວ່າ: ກອງປະຊຸມສະພາບໍລິຫານ ທລຍ ຄັ້ງທີ 24 ນີ້ ໄດ້ໄຂຂຶ້ນໃນເງື່ອນໄຂ ທີ່ພວກເຮົາໄດ້ຈັດຕັ້ງປະຕິບັດຍຸດທະສາດ ການເຕີບໂຕ ແລະ ລຶບລ້າງຄວາມທຸກຍາກ, ປີນີ້ ທລຍ ຄົບຮອບ 16 ປີ ເຊິ່ງເປັນປີສຸດທ້າຍຂອງ ທລຍ ໄລຍະ 3 ໂດຍຈະອັດລົງຢ່າງເປັນທາງການໃນເດືອນ 6 ປີ 2020. ສະນັ້ນ, ກອງປະຊຸມໃນຄັ້ງນີ້ ຈຶ່ງເປັນການປະກອບສ່ວນຫຼຸບສັງລວມ ສະພາບການແກ້ໄຂຄວາມທຸກຍາກຢູ່ປະເທດເຮົາ, ພ້ອມທັງເປັນການຖອດຖອນບົດຮຽນເພື່ອເປັນພື້ນຖານໃຫ້ການຮ່າງຍຸດທະສາດສະບັບໃໝ່. ກອງປະຊຸມໃນຄັ້ງນີ້, ຍັງຈະເປັນການທົບທວນຄືນຮູບແບບວິທີການ ແລະ ກົງຈັກຂອງ ທລຍ ເພື່ອເພີ່ມທະວີປະສິດທິຜົນ ແລະ ຄວາມຍືນຍົງໃນຕໍ່ໜ້າ, ປັບຕົວໃຫ້ສາມາດຕອບສະໜອງຄວາມຮຽກຮ້ອງຕ້ອງການ ໃນການຄ້ຳປະກັນສະບຽງອາຫານ, ສົ່ງເສີມການຜະລິດເປັນສິນຄ້າ, ຊຸກຍູ້ເສດຖະກິດປະຊາຊົນ, ສ້າງລາຍຮັບ, ແກ້ໄຂບັນຫາໂພຊະນາການ ແລະ ຄວາມທຸກຍາກຢູ່ປະເທດເຮົາໃຫ້ດີຂຶ້ນກວ່າເກົ່າ.
ທ່ານ ຈິດ ທະວີໃສ ຜູ້ອຳນວຍການບໍລິຫານ ທລຍ ໄດ້ໃຫ້ຮູ້ວ່າ: ໃນປີ 2018 ວຽກງານ ທລຍ ໄດ້ຈັດຕັ້ງປະຕິບັດ ຢູ່ 326 ບ້ານ ມີ 27,371 ຄອບຄົວ, ມີ 168,308 ຄົນ ໃນຈຳນວນທຶນ 155,76 ຕື້ກີບ, ໂດຍໄດ້ຈັດສັນໃສ່ 4 ວຽກງານຂອງ ທລຍ ຄື: ວຽກງານການວາງແຜນ ແລະ ກໍ່ສ້າງໂຄງການ ມີ 107,48 ຕື້ກີບ ຈຳນວນ 335 ໂຄງການຍ່ອຍ, ວຽກງານສ້າງຄວາມເຂັ້ມແຂງໃຫ້ອົງການປົກຄອງທ້ອງຖິ່ນ ແລະ ຊຸມຊົນ ມີ 19,37 ຕື້ກີບ, ວຽກງານບໍລິຫານໂຄງການ ມີ 24,89 ຕື້ກີບ ແລະ ວຽກງານປັບປຸງຊີວິດການເປັນຢູ່ ເຊື່ອມສານໂພຊະນາການ ມີ 4 ຕື້ກີບ. ໃນນັ້ນລັດຖະບານ ໄດ້ອະນຸມັດ 11 ຕື້ກີບ ໃນປີ 2018 ແລະ ຈັດຕັ້ງປະຕິບັດ 38 ໂຄງການ, ຊຸມຊົນປະກອບສ່ວນເປັນແຮງງານ ແລະ ວັດສະດຸ 6,27 ຕື້ກີບ ກວມປະມານ 7%.
ຂຽນໂດຍ: ແຟນຊິສ ສະຫວັນຄຳ