ຂປລ. ໃນວັນທີ 27 ກໍລະກົດນີ້, ທິມງານການແພດຂະບວນລົດສັນຕິພາບ ກອງທັບປົດປ່ອຍປະຊາຊົນຈີນ ໄດ້ເຄື່ອນໄຫວໃຫ້ບໍລິການປິ່ນປົວພະຍາດໂດຍບໍ່ເສຍຄ່າ ໃຫ້ນາຍ ແລະ ພົນທະຫານ, ພ້ອມດ້ວຍປະຊາຊົນທົ່ວໄປ ເພື່ອປະກອບສ່ວນອັນສໍາຄັນ ເຂົ້າໃນການປົກປັກຮັກສາ ແລະ ຊຸກຍູ້ການພົວພັນຮ່ວມມື ລະຫວ່າງສອງກອງທັບ ລາວ–ຈີນ ໃຫ້ນັບມື້ນັບແໜ້ນແຟ້ນ ແລະ ກວ້າງຂວາງຍິ່ງຂຶ້ນ.
ທ່ານ ພັນເອກ ພິເສດ ເສີນຢົງຈີງ ທູດທະຫານ ແຫ່ງ ສະຖານທູດ ສປ ຈີນ ປະຈຳ ສປປ ລາວ ໄດ້ໃຫ້ຮູ້ວ່າ: ການເຄື່ອນໄຫວໃຫ້ບໍລິການປິ່ນປົວພະຍາດຂອງທິມງານການແພດດັ່ງກ່າວ ໃນຄັ້ງນີ້, ເລີ່ມແຕ່ວັນທີ 27 ກໍລະກົດ ຫາ ວັນທີ 5 ສິງຫາ 2017, ໂດຍໄດ້ຈັດຂຶ້ນພ້ອມກັນຢູ່ສອງຈຸດ ຄື: ຢູ່ໂຮງໝໍ 103 ນະຄອນຫລວງວຽງຈັນ ແລະ ແຂວງຫລວງນ້ຳທາ, ເພື່ອເຮັດໜ້າທີ່ປີ່ນປົວສຸຂະພາບໃນຄັ້ງນີ້ ໃຫ້ປະສົບຜົນສຳເລັດຢ່າງຈົບງາມ, ໂດຍໄດ້ຮັບການສະໜັບສະໜູນອັນໃຫຍ່ຫລວງ ຈາກຝ່າຍລາວ, ຄະນະຝ່າຍຈີນພວກເຮົາ ໄດ້ພ້ອມກັນກະກຽມດ້ວຍຄວາມເອົາໃຈໃສ່ສູງ ເພື່ອຮັບປະກັນການກວດສຸຂະພາບ, ປີ່ນປົວ ແລະ ຜ່າຕັດໃຫ້ນາຍ ແລະ ພົນທະຫານ ກອງທັບປະຊາຊົນລາວ ແລະ ປະຊາຊົນລາວຈຳນວນໜຶ່ງ.
ທ່ານ ພັນເອກ ພິເສດ ເສີນຢົງຈິ້ງ ກ່າວຕື່ມວ່າ: ໃນໄລຍະເຄື່ອນໄຫວໃຫ້ບໍລິການປິ່ນປົວດັ່ງກ່າວ, ຄະນະແພດຝ່າຍຈີນ ຈະປະຕິບັດໜ້າທີ່ຈັນຍາບັນການແພດຢ່າງເຂັ້ມງວດ, ຕັ້ງໜ້າປະຕິບັດວຽກງານຕາມແຜນການທີ່ວາງອອກ, ຖືເອົາການປະຕິບັດວຽກງານທີ່ເຮັດໃຫ້ດີທີ່ສຸດ ເພື່ອທໍາການກວດສຸຂະພາບ, ປິ່ນປົວ ແລະ ຜ່າຕັດໃຫ້ຄົນເຈັບ, ພ້ອມທັງປະສານສົມທົບກັບພະນັກງານຝ່າຍລາວ ຢ່າງໃກ້ສິດຕິດແທດເຮັດໃຫ້ການປະຕິບັດໜ້າທີ່ໃນຄັ້ງນີ້ ໃຫ້ໄດ້ຮັບສໍາເລັດຕາມແຜນການທີທີ່ວາງໄວ້.
ແຫລ່ງຂ່າວ: ຂປລ