ຕອນແລງວັນທີ 23 ທັນວາ 2013 ທີ່ກະຊວງການຕ່າງປະເທດ ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຢາມອຳລາຂອງທ່ານ ເກຣຍ ຟຣາມິ ປາຊາຣິບຸ (Kria Fahmi Pasaribu) ເອກອັກຄະລັດຖະທູດອິນໂດເນເຊຍ ປະຈຳ ສປປ ລາວ ໃນໂອກາດທີ່ສຳເລັດ ການປະຕິບັດໜ້າທີ່ການທູດຢູ່ ສປປ ລາວ ເປັນເວລາ 3 ປີ (ແຕ່ປີ 2010-2013).
ໃນໂອກາດດັ່ງກ່າວ ທ່ານຮອງນາຍົກລັດຖະມົນຕີ ໄດ້ສະແດງຄວາມຊົມເຊີຍຕໍ່ຜົນສຳເລັດ ໃນການປະຕິບັດໜ້າທີ່ການທູດຂອງທ່ານທູດ ຕະຫຼອດໄລຍະທີ່ຜ່ານມາ ອັນເປັນການປະກອບສ່ວນອັນສຳຄັນ ໃຫ້ແກ່ການເສີມສ້າງສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ ແລະ ສ.ອິນໂດເນເຊຍ ໃຫ້ນັບມື້ນັບຂະຫຍາຍຕົວ ແລະ ພັດທະນາຍິ່ງໆຂຶ້ນ ພ້ອມທັງສະແດງຄວາມຂອບໃຈຕໍ່ລັດຖະບານ ແລະ ປະຊາຊົນອິນໂດເນເຊຍ ທີ່ໄດ້ປະກອບສ່ວນຊ່ວຍເຫຼືອໃນຫຼາຍດ້ານໃຫ້ແກ່ ສປປ ລາວ ໂດຍສະເພາະ ການປະກອບສ່ວນຊຸກຍູ້ ໃນການປະຕິບັດແຜນພັດທະນາເສດຖະກິດ-ສັງຄົມຂອງ ສປປ ລາວ ເປັນຕົ້ນແມ່ນ ການກໍ່ສ້າງພັດທະນາຊັບພະຍາກອນມະນຸດ ແລະ ການແລກປ່ຽນການຢ້ຽມຢາມເຊິ່ງກັນ ແລະ ກັນຂອງການນຳຂັ້ນຕ່າງໆ ໄດ້ເຮັດໃຫ້ການພົວພັນຮ່ວມມືລະຫວ່າງສອງປະເທດ ມີຄວາມໃກ້ຊິດຫຼາຍຂຶ້ນ ອັນເປັນການນຳເອົາຜົນປະໂຫຍດລວມມາໃຫ້ປະຊາຊົນສອງຊາດ ລາວ ແລະ ອິນໂດເນເຊຍ ທ່ານຮອງນາຍົກລັດຖະມົນຕີ ຍັງໄດ້ອວຍພອນໃຫ້ທ່ານທູດອິນໂດເນເຊຍ ປະສົບຜົນສຳເລັດໃນໜ້າທີ່ວຽກງານ ທີ່ທ່ານຈະໄດ້ຮັບຜິດຊອບໃນອະນາຄົດອັນໃກ້ໆນີ້.
ເພື່ອເປັນການສະແດງເຖິງການຕີລາຄາສູງ ຕໍ່ການເຄື່ອນໄຫວຢ່າງຫ້າວຫັນຂອງທ່ານທູດ ທ່ານຮອງນາຍົກລັດຖະມົນຕີ ໄດ້ຕາງໜ້າໃຫ້ລັດຖະບານ ສປປ ລາວ ປະດັບຫຼຽນກາມິດຕະພາບໃຫ້ແກ່ທ່ານທູດອິນໂດເນເຊຍ.
ທ່ານທູດ ເກຣຍ ຟຣາມິ ປາຊາຣິບຸ ສະແດງຄວາມຂອບໃຈຕໍ່ລັດຖະບານ ກໍຄືຂະແໜງການຕ່າງໆຂອງ ສປປ ລາວ ທັງໃນຂັ້ນສູນກາງ ແລະ ຂັ້ນທ້ອງຖິ່ນ ໂດຍສະເພາະ ກະຊວງການຕ່າງປະເທດ ທີ່ໄດ້ເອົາໃຈໃສ່ປະສານສົມທົບ ແລະ ໃຫ້ການຮ່ວມມືຊ່ວຍເຫຼືອໃນການປະຕິບັດໜ້າທີ່ການທູດ ຕະຫຼອດໄລຍະເວລາ 3 ປີ ແລະ ໄດ້ໃຫ້ສັນຍາວ່າ ຈະສືບຕໍ່ປະກອບສ່ວນ ເຂົ້າໃນການເສີມສ້າງສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດທີ່ມີມາແລ້ວນັ້ນ ໃຫ້ຂະຫຍາຍຕົວ ແລະ ກ້າວເຂົ້າສູ່ລວງເລິກຂຶ້ນໄປເລື້ອຍໆ.
ທີ່ມາhttp://www.vientianemai.net