ທະນາຄານພັດທະນາລາວ (ທພລ) ໄດ້ຈັດພິທີສະເຫຼີມສະຫຼອງວັນສ້າງຕັ້ງຄົບຮອບ 10 ປີ ແລະ ເປີດນຳໃຊ້ Mobile Banking ແລະ ບັດ VISA ຢ່າງເປັນທາງການ ໃນວັນທີ 8 ເມສາ 2013 ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ໂດຍພາຍໃຕ້ການເປັນປະທານຂອງທ່ານ ບົວລຽນ ພົມມະວົງ ຜູ້ອຳນວຍການໃຫຍ່ທະນາຄານພັດທະນາລາວ ໂດຍເປັນກຽດເຂົ້າຮ່ວມຂອງທ່ານ ສົມພາວ ໄຟສິດ ຜູ້ວ່າການທະນາຄານແຫ່ງ ສປປ ລາວ ພ້ອມດ້ວຍແຂກທີ່ຖືກເຊີນ ພະນັກງານເຂົ້າຮ່ວມ.
ທ່ານ ບົວລຽນ ພົມມະວົງ ໄດ້ກ່າວວ່າ: ທະນາຄານພັດທະນາລາວ ແມ່ນທະນາຄານທຸລະກິດຂອງລັດແຫ່ງໜຶ່ງ ທີ່ໄດ້ເປີດບໍລິການຕໍ່ສັງຄົມ ຄົບຮອບ 10 ປີ ແລະ ມາຮອດປັດຈຸບັນ ທະນາຄານມີທັງໝົດ 18 ສາຂາ 64 ໜ່ວຍບໍລິການ ແລະ 22 ໜ່ວຍແລກປ່ຽນໃນຂອບເຂດທົ່ວປະເທດ ມີບັນດາທະນາຄານຕົວແທນຢູ່ຕ່າງປະເທດ 10 ແຫ່ງ ຕັ້ງຢູ່ສູນກາງການເງິນສຳຄັນຂອງພາກພື້ນ ແລະ ຂົງເຂດ ຊຶ່ງສາມາດຮັບໃຊ້ທຸລະກິດທະນາຄານທັງພາຍໃນ ແລະ ຕ່າງປະເທດໄດ້ຢ່າງຄ່ອງຕົວ ປັດຈຸບັນມີພະນັກງານທັງໝົດ 1.297 ຄົນ ຊັບສິນ-ໜີ້ສິນ ທັງໝົດເພີ່ມຂຶ້ນ 564,6% ແຫຼ່ງທຶນເພີ່ມຂຶ້ນ 500% ຍອດສິນເຊື່ອທັງໝົດ ເພີ່ມຂຶ້ນ 2.234,33% ສຳລັບຜະລິດຕະພັນບໍລິການ ໄດ້ພັດທະນາໃຫ້ເປັນທັນສະໄໝເທື່ອລະກ້າວ ດ້ວຍການປ່ຽນລະບົບຈາກ Bank 2000 ມາເປັນ Core Banking ຊຶ່ງປັດຈຸບັນສາມາດເຊື່ອມຕໍ່ໄດ້ທົ່ວປະເທດ.
ໃນການເປີດນຳໃຊ້ Mobile Banking ຢ່າງເປັນທາງການ ນັບແຕ່ນີ້ເປັນຕົ້ນໄປນັ້ນ ທະນາຄານພັດທະນາລາວ ເປັນທະນາຄານແຫ່ງທຳອິດທີ່ນຳໃຊ້ລະບົບ Mobile Banking ໃນຮູບແບບ Mcommerce ຊຶ່ງສາມາດໂອນເງິນເຂົ້າບັນຊີ ເພື່ອຊຳລະສະສາງພາຍໃນເຄືອຂ່າຍທະນາຄານ ເບິ່ງອັດຕາແລກປ່ຽນເງິນຕາຕ່າງປະເທດ ເບິ່ງຜົນອອກຫວຍພັດທະນາ ຕິດຕາມການຊື້-ຂາຍຫຸ້ນລາວ ຊື້ບັດເຕີມເງິນໄດ້ໂດຍກົງຂອງເຄື່ອຂ່າຍ ອີທີແອວ ລາວໂທລະຄົມ ແລະ ບີລາຍ ນອກນັ້ນ ຍັງມີບໍລິການກວດສອບເບິ່ງການເຄື່ອນໄຫວບັນຊີຕະຫຼອດ 24 ຊົ່ວໂມງ ໂດຍບໍ່ຈຳເປັນຕ້ອງເຂົ້າໄປທະນາຄານໃຫ້ເສຍເວລາ ການເຮັດທຸລະກຳຕ່າງໆຜ່ານຕູ້ ATM ແລະ ຜ່ານເຄື່ອງຮູດບັດ DEC ໄດ້ຕາມສະຖານທີ່ຕ່າງໆ ແລະ ລະບົບດັ່ງກ່າວສາມາດແຈ້ງການເຄື່ອນໄຫວບັນຊີ ຊຳລະຄ່າໄຟຟ້າ ຈ່າຍຄ່າໂທລະສັບ ໂອນເງິນ ຄຽງຄູ່ກັນນັ້ນ ກໍໄດ້ເປີດບໍລິການບັັດ VISA.