ກອງປະຊຸມສົນທະນາບັນຫານີວເຄຼຍອີຣານລະຫວ່າງ6ປະເທດຄືອາເມລິກາ,ອັງກິດ, ຝຣັ່ງ ຣັດເຊຍ ຈີນແລະເຢຍລະມັນພ້ອມດ້ວຍສະຫະພາບເອີຣົບກັບອີຣານໄດ້ໄຂຂຶ້ນຢູ່ເມືອງອານມາອາຕາ ເມືອງໃຫຍ່ທີ່ສຸດຂອງກາຊັກສະຖານໃນວັນທີ26ກຸມພານີ້.
ຕາມແຜນການຈະຈັດໃຫ້ມີກອງປະຊຸມລະດັບລັດຖະມົນຕີເສຍກ່ອນ ແລ້ວຈິ່ງຈັດກອງປະຊຸມສົນທະນາລະຫວ່າງ6ປະເທດກ່ຽວກັບບັນຫານີວເຄຼຍອີຣານພ້ອມດ້ວຍສະຫະພາບເອີຣົບກັບອີຣານ.ກອງປະຊຸມຈະເປັນກອງປະຊຸມພາຍໃນແລະຄາດວ່າຈະດຳເນີນເປັນເວລາ 2 ວັນ. ທ່ານນາງແຄັດເທີຣິນ ອາສທອນ ຜູ້ຕາງໜ້າສູງສຸດດ້ານວຽກງານຕ່າງປະເທດແລະຄວາມໝັ້ນຄົງຂອງສະຫະພາບເອີຣົບ, ທ່ານໄຊອິດ ຈາລີລີ ຫົວໜ້າຜູ້ແທນເຈລະຈານີວເຄຼຍຂອງອີຣານພ້ອມດ້ວຍຜູ້ແທນຂອງ 6 ປະເທດຈະເຂົ້າຮ່ວມກອງປະຊຸມ.ທ່ານມາຈ່າວຊູ້ ຫົວໜ້າຄະນະຜູ້ແທນຈີນ ຜູ້ຊ່ວຍລັດຖະມົນຕີການຕ່າງປະເທດຈີນໄດ້ນຳພາຄະນະຜູ້ແທນເຂົ້າຮ່ວມກອງປະຊຸມ.
ວັນທີ26ກຸມພານີ້,ທ່ານມາຈ່າວຊູ້ກ່າວວ່າ,ຈີນໄດ້ແລກປ່ຽນຄວາມເຫັນຢ່າງໃກ້ຊິດກັບຝ່າຍຕ່າງໆທີ່ສຳຄັນມາໂດຍຕະຫຼອດແລະຕັ້ງໜ້າຊຸກຍູ້ໃຫ້ຝ່າຍຕ່າງໆຍຶດໝັ້ນທິດທາງແກ້ໄຂບັນຫາດ້ວຍວິທີທາງການທູດ.ຈີນຈະສືບຕໍ່ຍຶດໝັ້ນຊຸກຍູ້ການເຈລະຈາສັນຕິພາບ,ທຳຄວາມພະຍາຍາມຢ່າງບໍ່ລົດລະເພື່ອແກ້ໄຂບັນຫານີວເຄຼຍຂອງອີຣານໂດຍສັນຕິ.ແລະຫວັງວ່າກອງປະຊຸມສົນທະນາທີ່ອານມາອາຕາກ່ຽວກັບບັນຫານີວເຄຼຍອີຣານຈະໄດ້ຮັບປະສິດທິຜົນທີ່ດີ.
ຫວ່າງກ່ອນນີ້ບໍ່ດົນ,ທ່ານຫົງເຫຼີຍ ໂຄສົກກະຊວງການຕ່າງປະເທດຈີນກ່າວວ່າ, ການຊຸກຍູ້ໃຫ້ກອງປະຊຸມສົນທະນາເທື່ອນີ້ໃຫ້ໄດ້ຮັບປະສິດທິຜົນທີ່ດີແມ່ນມີຜົນດີຕໍ່ການປັບປຸງທ່າອ່ຽງທີ່ດີໃນການສົນທະນາແລະການຮ່ວມມືກັນ,ປົກປັກຮັກສາສັນຕິພາບແລະສະຖຽນລະພາບຂອງພາກພື້ນ.ມັນໄດ້ຮຽກຮ້ອງໃຫ້ບັນດາຝ່າຍທຳຄວາມພະຍາຍາມຮ່ວມກັນ.ຈີນເຫັນຕະຫຼອດມາວ່າ,ການສົນທະນາແລະການເຈລະຈາແມ່ນວິທີທາງທີ່ຖືກຕ້ອງພຽງໜຶ່ງດຽວໃນການແກ້ໄຂບັນຫານີວເຄຼຍຂອງອີຣານຢ່າງເໝາະສົມ.
ທີ່ມາhttp://laos.cri.cn