ປັດຈຸບັນ, ຕະຫຼາດລົດລາງພາຫະນະ ຢູ່ບ້ານເຮົາພວມຄຶກຄັກ ຍ້ອນມີຕົວເລືອກຫຼາຍຂຶ້ນ ດ້ວຍລົດຫຼາກຍີ່ຫໍ້ ຫຼາຍປະເພດ ຕ່າງກໍພາກັນແກ່ງແຍ່ງແຂ່ງຂັນກັນເຮັດທຸລະກິດການຕະຫຼາດ (ຊື້-ຂາຍ). ໃນຂະນະທີ່ ຄົນລາວເຮົາກໍມີກໍາລັງ (ເງິນ) ຊື້ນັບມື້ເພີ່ມຂຶ້ນ ບວກກັບນະໂຍບາຍການດາວໜ້ອຍ-ຜ່ອນຍາວນານ-ອັດຕາດອກເບ້ຍຕໍ່າ (ບາງຄ້າຍ-ບາງຍີ່ຫໍ້ ກໍຄືບາງບໍລິສັດນໍາເຂົ້າ ຫຼືເປັນຕົວແທນຈໍາໜ່າຍ ໃຈໃຫຍ່ປັບດອກເບ້ຍລົງເປັນ 0% ກໍມີ).
ແຕ່ເຖິງແນວໃດກໍຕາມ, ຍັງມີຄົນຈໍານວນໜຶ່ງ ທີ່ພວມມີແຜນຢາກຊື້ລົດລາງພາຫະນະມານໍາໃຊ້ ຕ່າງກໍເຮັດໃຈເຢັນອົດເອົາກ່ອນ ໂດຍມີຄວາມຫວັງໃຫ້ລົດມີລາຄາຖືກລົງກວ່ານີ້ ຈຶ່ງຈະຊື້, ຕັ້ງໜ້າຕັ້ງຕາລໍຄອຍການເຂົ້າປະຊາຄົມເສດຖະກິດອາຊຽນ ໃນທ້າຍປີນີ້ ຫຼືທີ່ເພິ່ນພາກັນເອີ້ນຕິດຫູກັນວ່າ “ເອອີຊີ” ເຊິ່ງຈະສ້າງໃຫ້ອາຊຽນເປັນຕະຫຼາດ ແລະ ຖານການຜະລິດໜຶ່ງດຽວ ເຮັດໃຫ້ອາຊຽນມີຄວາມຄ່ອງແຄ້ວໃນການແຂ່ງຂັນດ້ວຍກົນໄກ ແລະ ມາດຕະການໃໝ່ຕ່າງໆ. ໃນນັ້ນ, ພາສີນໍາເຂົ້າສິນຄ້າ ລວມທັງລົດລາງພາຫະນະ ຈະເປັນ 0% ເຊິ່ງນັ້ນກໍໝາຍຄວາມວ່າລາຄາລົດ ເມື່ອບໍ່ບວກພາສີນໍາເຂົ້າໃສ່ຄືທີ່ຜ່ານມາ ແນ່ນອນມັນກໍຈະມີລາຄາຖືກລົງຫຼາຍ.
ຕໍ່ກັບບັນຫາດັ່ງກ່າວ, ຈຶ່ງເປັນບັນຫາທີ່ມະຫາຊົນ ກໍຄືຄົນທັງຫຼາຍໃນສັງຄົມໃຫ້ຄວາມສົນໃຈວ່າ ລາຄາລົດຊິຖືກລົງແທ້ຫຼືບໍ? ດັ່ງນັ້ນ, “ຈານຈ່ອຍ” ໃນນາມຜູ້ຂຽນປະຈໍາຄໍລໍາ “ມະຫາຊົນຄວນຮູ້” ຈຶ່ງໄດ້ໄປສອບຖາມ ນັກວິຊາການ ກໍຄືຜູ້ຊ່ຽວຊານທ່ານໜຶ່ງ ຈາກກະຊວງອຸດສາຫະກໍາ ແລະ ການຄ້າ ເພິ່ນຊີ້ແຈງໃຫ້ຮູ້ວ່າ: ເຖິງແມ່ນວ່າເມື່ອລາວເຮົາເຂົ້າເອອີຊີແລ້ວ ພາສີນໍາເຂົ້າສິນຄ້າຕ່າງໆຫຼາຍລາຍການ ເວົ້າລວມ, ເວົ້າສະເພາະປະເພດລົດລາງພາຫະນະ ຈາກຕ່າງປະເທດຈະປອດພາສີ (ພາສີ 0%) ກໍຕາມ, ແຕ່ກໍບໍ່ໄດ້ໝາຍຄວາມວ່າລົດລາງພາຫະນະຊິມີລາຄາຖືກລົງຫຼາຍ ຈົນຫຼາຍຄົນເຂົ້າໃຈວ່າຊິຫຼຸດລົງເຄິ່ງຕໍ່ເຄິ່ງເລີຍ, ເພາະເມື່ອບໍ່ໄດ້ຄິດໄລ່ຄ່າພາສີນໍາເຂົ້າຄືຕອນນີ້ ທີ່ຍັງບໍ່ທັນໄດ້ເຂົ້າເອອີຊີ ແຕ່ກໍຍັງຕ້ອງໄດ້ຄິດໄລ່ຄ່າອາກອນຊົມໃຊ້ບວກໃສ່ລາຄາຕົວຈິງຂອງລົດອີກ ເຊິ່ງແບ່ງຕາມປະເພດ ຕາມຍີ່ຫໍ້ ຕາມຄວາມແຮງ (ຊີຊີ) ຂອງລົດຄັນດັ່ງກ່າວ, ຍົກຕົວຢ່າງງ່າຍໆວ່າລົດຍີ່ຫໍ້ດັງ ຫຼູຫາ ຄົນນິຍົມໃຊ້ຫຼາຍ ມີຄວາມແຮງສູງ ຄ່າສິ້ນເປືອງໃນການຂົນສົ່ງລົດມາຈາກໂຮງງານຜະລິດ ເຊິ່ງຫ່າງໄກຈາກປະເທດເຮົາຫຼາຍ… ແນ່ນອນອາກອນຊົມໃຊ້ກໍຕ້ອງໄດ້ເກັບສູງຕາມສະພາບ ກໍຄືເງື່ອນໄຂຕົວຈິງ.
ແນວໃດກໍຕາມ, ສໍາລັບຜູ້ທີ່ຍັງບໍ່ທັນຮັບຮູ້ເລິກເຊິ່ງ ຫຼືຍັງເຂົາໃຈຄາດເຄື່ອນ (ເຂົ້າໃຈຜິດ) ຜູ້ສັນຖັດກໍລະນີ ຍັງຝາກຜູ້ຂຽນມາວ່າ: ຈະຕ້ອງໄດ້ທໍາຄວາມເຂົ້າແຈ້ງຕື່ມ ຕໍ່ຄໍາສັບ 2 ຢ່າງລະຫວ່າງ “ພາສີ” ກັບ “ອາກອນ” ແມ່ນຫຍັງກັນທ້? ຄໍາວ່າ “ພາສີ” ໝາຍເຖິງພັນທະເປັນເງິນທີ່ມອບໃຫ້ລັດ ໂດຍບຸກຄົນ, ນິຕິບຸກຄົນ ຫຼືການຈັດຕັ້ງທີ່ດຳເນີນການສົ່ງອອກ-ນຳເຂົ້າເຄື່ອງຂອງ ຜ່ານດ່ານພາສີຢູ່ດ່ານຊາຍແດນ. ສ່ວນຄໍາວ່າ “ອາກອນ” ນັ້ນໝາຍເຖິງພັນທະເປັນເງິນຕ້ອງມອບໃຫ້ລັດ ໂດຍບຸກຄົນ ຫຼືນິຕິບຸກຄົນ, ອົງການຈັດຕັ້ງຕ່າງໆ ລວມທັງຕ່າງປະເທດ ທີ່ດໍາເນີນທຸລະກິດ ຫຼືເຄື່ອນໄຫວດ້ານອື່ນໆ ຢູ່ໃນລາວ ເຊິ່ງມີຄວາມສໍາຄັນເນ່ື່ອງຈາກເປັນລາຍຮັບຫຼັກຂອງລັດຖະບານເພື່ອນໍາໄປໃຊ້ຈ່າຍໃນກິດຈະການການບໍລິຫານປະເທດ ອັນເປັນສາທາລະນະປະໂຫຍດໃຫ້ແກ່ປະເທດຊາດ.
ຖ້າເຂົ້າໃຈແຈ້ງເປັນຄືແນວນີ້ແລ້ວ, ຊຸມເຮົາເຈົ້າຂ້ອຍຕ້ອງໄດ້ຄິດໃໝ່ແລ້ວລະ ສໍາລັບຜູ້ທີ່ພວມຄອງຄອຍມີແຜນການໄວ້ວ່າຊິຊື້ລົດລາງພາຫະນະລາຄາຖືກກວ່າເດີມມາໃຊ້ ເຊິ່ງອັນນີ້ຜູ້ຂຽນບໍ່ຂໍມີຄວາມເຫັນນໍາເນີ້ ສິດທິສ່ວນບຸກຄົນແລ້ວແຕ່ໃຜລາວ “ນານາຈິດຕັງ” ເພາະສໍາລັບຜູ້ຂຽນແລ້ວບໍ່ຖ້າເຂົ້າເອອີຊີ ເນີ້, ມີຄວາມຈໍາເປັນຕ້ອງການມານໍາໃຊ້ໃນຄອບຄົວ ກໍຕັດສິນໃຈຊື້ໂລດ ເຖິງລາຄາຊິແພງແດ່ກໍຕາມ!
[ໂດຍ: ຈານຈ່ອຍ] ຈາກ: ວາລະສານມະຫາຊົນ