ວັນທີ 14 ກໍລະກົດ 2021 ສໍານັກຂ່າວ ctvnews ໄດ້ລາຍງານວ່າ ຍີ່ປຸ່ນກວດພົບຜູ້ຕິດເຊື້ອ ໂຄວິດ-19 ກຸ່ມໃໝ່ຈໍານວນຫຼາຍລາຍ ຢູ່ທີ່ໂຮງແຮມເຊິ່ງມີນັກກິລາໂອລິມປິກຂອງບຣາຊິວພັກຢູ່ຫຼາຍສິບຄົນ ສ້າງຄວາມກັງວົນກ່ອນການແຂ່ງຂັນໂຕກຽວໂອລິມປິກ.
ໂດຍພະນັກງານ 7 ຄົນຂອງໂຮງແຮມໃນເມືອງຮາມາມັດສຶ ທາງຕາເວັນຕົກສຽງໃຕ້ຂອງກຸງໂຕກຽວ ມີຜົນກວດອອກມາເປັນບວກ ແຕ່ທີມນັກກິລາຂອງບຣາຊິວ 31 ຄົນ ທີ່ມີນັກຍູໂດຮ່ວມຢູ່ນໍາກັນທີ່ພັກຢູ່ໃນສະຖານກັກໂຕ ເຊິ່ງແຍກຈາກແຂກຂອງໂຮງແຮມຄົນອື່ນໆ ບໍ່ໄດ້ຕິດເຊື້ອໂຄວິດ-19.
ຢ່າງໃດກໍຕາມ ຜູ້ຊຽວຊານດ້ານການແພດວິຕົກວ່າ ໂອລິມປິກ ທີ່ຈັດໂດຍຄະນະຜູ້ຈັດໂຕກຽວໂອລິມປິກ 2020 ເພື່ອປ້ອງກັນໂຄວິດ-19 ຈະບໍ່ສາມາດປ້ອງກັນໄດ້ຢ່າງສົມບູນ ເນື່ອງຈາກການເຄືື່ອນທີ່ຂອງເຈົ້າໜ້າທີ່ທີ່ອາດຈະເຮັດໃຫ້ມີໂອກາດຕິດເຊື້ອໄດ້.
ດ້ານ ໂທມັສ ບາກ ປະທານຄະນະກໍາມະການໂອລິມປິກ ຫຼື ໄອໂອຊີ ໄດ້ກ່າວ ພາຍຫຼັງເຂົ້າພົບນາຍົກລັດຖະມົນຕີ ໂຍຊິຮິເດະ ຊູງະ ຂອງຍີ່ປຸ່ນ ຍົກຍ່ອງຄະນະກໍາມະການຈັດການແຂ່ງຂັນ ແລະ ປະຊາຊົນຍີ່ປຸ່ນໃນການຈັດການແຂ່ງຂັນທ່າມກາງການລະບາດຂອງໂຄວິດ-19 ເຂົາກ່າວວ່າ ໂອລິມປິກຄັ້ງນີ້ຈະເປັນຄັ້ງປະຫວັດສາດ ໃນເລື່ອງຂອງແນວທາງທີ່ຊາວຍີ່ປຸ່ນເອົາຊະນະຄວາມທ້າທາຍທີ່ເປັນອຸປະສັກຕ່າງໆ ໃນຊ່ວງຫຼາຍປີທີ່ຜ່ານມາ ທັງເລື່ອງແຜ່ນດິນໄຫວ ແລະ ໂຄວິດ-19 ເຂົາຍັງກ່າວຍໍ້າອີກວ່າ ມາດຕະການປ້ອງກັນໂຄວິດ-19 ທີ່ເຂັ້ມງວດໄດ້ກຽມໄວ້ພ້ອມແລ້ວ ແລະ ໄດ້ເລີ່ມປະຕິບັດໄປແລ້ວ.
ຂະນະດຽວກັນ, ກຸງໂຕກຽວ ກຽມເປັນເຈົ້າພາບຈັດການແຂ່ງຂັນໂອລິມປິກລະດູຮ້ອນ ລະຫວ່າງວັນທີ 23 ກໍລະກົດ ຮອດ ວັນທີ 8 ສິງຫາ ນີ້ ຢ່າງໃດກໍຕາມຄະນະກໍາມະການໂອລິມປິກໂຕກຽວເມື່ອອາທິດກ່ອນ ຢືນຢັນວ່າການແຂ່ງຂັນຄັ້ງນີ້ຈະບໍ່ມີຜູ້ຊົມຢູ່ໃນສະໜາມ.