ເດັກນ້ອຍ ເພດຊາຍ ອາຍຸ 9 ປີ ລັກລົດໃຫຍ່ທີ່ ບ້ານຜາເມືອງ ເມືອງບໍລິຄັນ ແຂວງບໍລິຄໍາໄຊ ເຈົ້າໜ້າທີ່ຈັບມາສຶກສາອົບຮົມ.
ເຈົ້າໜ້າທີ່ ປກສ ກຸ່ມ 3 ຜາເມືອງ ເມືອງບໍລິຄັນ ແຂວງບໍລິຄໍາໄຊ ໄດ້ລາຍງານໃຫ້ຮູ້ວ່າ: ເວລາປະມານ 19 ໂມງ ຂອງວັນທີ 16 ກຸມພາ 2021, ໄດ້ຮັບແຈ້ງເສຍຫາຍຈາກເຈົ້າຂອງລົດ ວ່າມີຄົນຮ້າຍມາລັກລົດໃຫ່ຍ ຊຸບເປີວັນ, ສີຂາວ ໝາຍເລກທະບຽນ ກລ 9694 ກໍາແພງນະຄອນ ເຊີ່ງເປັນລົດຂອງທ້າວ ບົວຫຶລີ ອາຍຸ 45 ປີ, ບ້ານຜາເມືອງ ເມືອງບໍລິຄັນ ແຂວງບໍລິຄໍາໄຊ ທີ່ຈອດຢູ່ເຮືອນ, ໄດ້ຖືກຄົນຮ້າຍລັກຂັບອອກໄປ. ຫຼັງຈາກນັ້ນ ເຈົ້າໜ້າທີ່ຈື່ງໄດ້ກວດກາສະຖານທີ່ເກີດເຫດ ແລະ ໄປຊອກຫາແລ້ວພົບເຫັນລົດຄັນດັ່ງກ່າວຈອດໄວ້ຢູ່ກາງທາງ ລະຫວ່າງບ້ານຜາເມືອງ ຫາ ບ້ານດົງ ຫ່າງຈາກຈຸດລົດເສຍປະມານ 2 ກິໂລແມັດ.
ຕໍ່ມາເຈົ້າໜ້າທີ່ ປກສ ກຸ່ມ 3 ຜາເມືອງ ຈື່ງໄດ້ລົງເກັບກໍາຂໍ້ມູນຈາກຜູ້ເຫັນເຫດການ ວ່າມີເດັກນ້ອຍ ຈໍານວນ 02 ຄົນ ໄດ້ຂັບລົດມາແລ້ວຈອດໄວ້ ຈາກນັ້ນພວກຜູ້ກ່ຽວກໍ່ໄດ້ພາກັນຢ່າງເຂົ້າໄປໃນບ້ານຜາເມືອງ, ເຈົ້າໜ້າທີ່ຈື່ງໄດ້ໄປຕາມຫາ ແລະ ພົບເຫັນເດັກນ້ອຍເປົ້າໝາຍ 02 ຄົນ, ພ້ອມທັງເຂົ້າສອບຖາມ ພວກຜູ້ກ່ຽວທັງ 02 ໄດ້ຮັບສາລະພາບວ່າ: ໄດ້ລັກຂັບລົດໃຫ່ຍຄັນດັ່ງກ່າວ ຢູ່ເຮືອນຂອງຜູ້ຖືກເສຍຫາຍແທ້ ຍ້ອນຄວາມຮູ້ເທົ່າບໍ່ເຖິງການ, ເມື່ອພວກຜູ້ກ່ຽວເຫັນລົດຈອດສຸບກະແຈຄາຢູ່ລົດ ຈື່ງເກີດມີແນວຄິດຢາກລອງຂັບເບີ່ງ, ພໍສະຕາດລົດໄດ້ ພວກກ່ຽວທັງສອງກໍ່ພາກັນຂັບຂີ່ອອກໄປອອກສູ່ທາງໃຫ່ຍ ມີຈຸດປະສົງຈະພາກັນຂັບຂີ່ໄປຫຼີ້ນເມືອງໝອກ ແຂວງຊຽງຂວາງ ພໍຂັບມາໄດ້ໄລຍະໜື່ງຈັກລົດດັບ ພວກຜູ້ກ່ຽວເລີຍລົງຈາກລົດ ແລະ ກັບບ້ານຂອງຕົນ.
ເຈົ້າໜ້າທີ່ໃຫ້ຮູ້ຕື່ມວ່າ: ເດັກນ້ອຍທັງ 02 ຄົນ ຢູ່ບ້ານຜາເມືອງ ເມືອງບໍລິຄັນ ແຂວງບໍລິຄໍາໄຊ ເດັກນ້ອຍຄົນທີ່ລັກຂັບລົດ ມີອາຍຸ 9 ປີ ແລະ ເດັກນ້ອຍໝູ່ທີ່ໄປນໍາ ອາຍຸ 12 ປີ, ປັດຈຸບັນລົດຄັນດັ່ງກ່າວ ເຈົ້າໜ້າທີ່ ປກສ ກຸ່ມ 3 ຜາເມືອງ ໄດ້ເຮັດບົດບັນທືກສົ່ງຄືນເຈົ້າຂອງເດີມ ມອບໂດຍ ພັນໂທ ສັງທອງ ຈິນດາວົງ ຫົວໜ້າຫ້ອງການ ປກສ ກຸ່ມ 3 ຜາເມືອງ ແລະ ຮັບໂດຍ ທ້າວ ບົວຫືລີ ເຈົ້າຂອງລົດຄັນດັ່ງກ່າວ ໂດຍມີເຈົ້າໜ້າທີ່ພາກສ່ວນກ່ຽວຂ້ອງເປັນສັກຂີພະຍານ. ສ່ວນເດັກນ້ອຍທັງ 2 ຄົນ ທາງເຈົ້າຂອງລົດແມ່ນບໍ່ເອົາເລື່ອງ, ສະນັ້ນ, ເຈົ້າໜ້າທີ່ຈື່ງແຈ້ງເຊີນຜູ້ປົກຄອງເດັກນ້ອຍທັງ 2 ມາເຮັດບົດບັນທືກສືກສາອົບຮົມ ພ້ອມທັງແນະນໍາໃຫ້ຜູ້ປົກຄອງເອົາໃຈໃສ່ຕິດຕາມພືດຕິກໍາຂອງລູກ ແລະ ອົບຮົມສັ່ງສອນລູກໃຫ້ເປັນຄົນດີຂອງສັງຄົມ.