ຖ້ຽວບິນທຳອິດຂອງສາຍການບິນຫວຽດນາມແອລາຍ (Vietnam Airlines) ATR72 ໄດ້ນຳຜູ້ໂດຍສານຈຳນວນ 68 ຄົນ ຈາກວິງ ແຂວງເຫງະອານ ສສ.ຫວຽດນາມ ມາສູ່ສະໜາມບິນສາກົນວັດໄຕ ນະຄອນຫຼວງວຽງຈັນ ສປປ ລາວ ດ້ວຍຄວາມປອດໄພ ເພື່ອເປີດສາຍການບິນຕ່າງປະເທດຕື່ມອີກ ຂອງສາຍການບິນ Vietnam Airlines ໃນເຊົ້າວັນທີ 12 ມັງກອນ 2014 ນີ້ ແນໃສ່ຕອບສະໜອງຄວາມຕ້ອງການໄປມາຫາສູ່ ລະຫວ່າງປະຊາຊົນສອງປະເທດ ລາວ-ຫວຽດນາມ ໂດຍສະເພາະປະຊາຊົນເຂດພາກກາງຫວຽດນາມ ເຂົ້າມາລາວ ໃຫ້ມີຄວາມສະດວກສະບາຍ.
ທ່ານ ຢາກົວ ລໍປາງກາວ ຫົວໜ້າກົມການບິນພົນລະເຮືອນລາວ ໃຫ້ສຳພາດຕໍ່ນັກຂ່າວ ໃນໂອກາດເປີດສາຍການບິນດັ່ງກ່າວວ່າ: ໃນຫຼາຍປີຜ່ານມານີ້ ການພົວພັນຮ່ວມມືລະຫວ່າງບໍລິສັດການບິນຂອງສອງປະເທດ ລາວ-ຫວຽດນາມ ໄດ້ມີປະສິດທິຜົນຫຼາຍຂຶ້ນ ປະກອບສ່ວນສຳຄັນເຂົ້າໃນການກະຕຸກຊຸກຍູ້ ການຮ່ວມມືລົງທຶນ ພົວພັນແລກປ່ຽນສິນຄ້າຂາຍລະຫວ່າງປະຊາຊົນ ແລະ ນັກທຸລະກິດສອງປະເທດ ນັບມື້ເພີ່ມທະວີຫຼາຍຂຶ້ນ ສະເພາະການເປີດສາຍທາງບິນໃໝ່ ວິງ-ວຽງຈັນ ຂອງຫວຽດນາມແອລາຍຄັ້ງນີ້ ແມ່ນເຫດການທີ່ມີຄວາມໝາຍສຳຄັນຍິ່ງ ເພື່ອເປີດກວ້າງການພົວພັນຮ່ວມມືຮອບດ້ານລະຫວ່າງສອງປະເທດ ໂດຍສະເພາະ ເຂດພາກກາງຫວຽດນາມ ແລະ ລາວ ເພື່ອສ້າງເງື່ອນໄຂໃຫ້ແກ່ນັກທຸລະກິດ ແລະ ປະຊາຊົນສອງປະເທດ ໄດ້ໄປມາຫາສູ່ກັນສະດວກສະບາຍຍິ່ງຂຶ້ນ.
ໃນໂອກາດນີ້ ການນຳແຂວງເຫງະອານ ກໍ່ຢືນຢັນວ່າ: ປັດຈຸບັນ ການພົວພັນຮ່ວມມືລະຫວ່າງ ລາວ-ຫວຽດນາມ ນັບມື້ເພີ່ມທະວີ ແລະ ກ້າວສູ່ລວງເລິກ ຄວາມຕ້ອງການໄປມາຫາສູ່ຮ່ວມມືລົງທຶນ ໂດຍສະເພາະ ຂົງເຂດການທ່ອງທ່ຽວ ພິເສດແມ່ນແຂວງເຫງະອານ ກໍ່ຄືບັນດາແຂວງພາກກາງຫວຽດນາມຕໍ່ກັບລາວນັບມື້ຫຼາຍຂຶ້ນ ແຕ່ຜ່ານມາການໄປມາຫາສູ່ບັນດາທ້ອງຖິ່ນເຫຼົ່ານັ້ນ ສ່ວນຫຼາຍແມ່ນທາງບົກ ໂດຍສະເພາະແຕ່ລະປີມີປະມານ 70.000 ເທື່ອຄົນ ໄດ້ເດີນທາງຜ່ານຊາຍແດນນາມແມວ-ແທງຮວ່າ ແລະ ເກົາແຈວ ຫຼັກ 20 ຮ່າຕິງ ອັນໄດ້ສ້າງຄວາມຫຍຸ້ງຍາກລຳບາກ ແລະ ເສຍເວລາບໍ່ໜ້ອຍ ດັ່ງນັ້ນ ການເປີດສາຍທາງບິນນີ້ ຈຶ່ງມີຄວາມໝາຍສຳຄັນຍິ່ງ ແລະ ຈະປະກອບສ່ວນສຳຄັນ ເຂົ້າໃນການດຶງດູດການລົງທຶນ ລະຫວ່າງສອງປະເທດນັບມື້ຫຼາຍຂຶ້ນ ແລະ ສ້າງເງື່ອນໄຂສະດວກສະບາຍ ໃຫ້ແກ່ການພັດທະນາການທ່ອງທ່ຽວ ກໍ່ຄືການໄປມາຫາສູ່ກັນລະຫວ່າງປະຊາຊົນ ເຂດພາກກາງຫວຽດນາມ ແລະ ລາວ ແລະ ເຊື່ອມໂຍງກັບພາກພື້ນຫຼາຍຂຶ້ນ.
ທີ່ມາhttp://www.vientianemai.net/teen/khao/1/10970