ເປີດຊຸດເຝິກອົບຮົມວຽກງານການເມືອງ-ການທະຫານ-ພະລາທິການ

ກອງບັນຊາການທະຫານເມືອງພູຄູນ ເປີດຊຸດເຝິກອົບຮົມວຽກງານການເມືອງ-ການທະຫານ-ພະລາທິການໃຫ້ແກ່ພະນັກງານນັກລົບ ກອງຮ້ອຍ ຄໍ 14 ແລະ ກອງຫຼອນບ້ານ ປະຈໍາໄຕມາດ II

ພິທີໄດ້ຈັດຂື້ນໃນວັນທີ 5 ກັນຍາ 2017 ຢູ່ທີ່ສະໂມສອນກອງຮ້ອຍຄໍ 14 ໃຫ້ກຽດເຂົ້າຮ່ວມໂດຍມີ: ສະຫາຍ ເພັດສະໝອນ ວົງສີປະເສີດ ຄະນະປະຈໍາພັກເມືອງ ຮອງເຈົ້າເມືອງພູຄູນ, ສະຫາຍ ພັທ ບຸນເມືອງ ສອນມະນີ ຄະນະປະຈຳພັກຫົວໜ້າການເມືອງ ກອງບັນຊາການທະຫານເມືອງພູຄູນ, ມີບັນດາຄະນະຊີ້ນໍາ, ອະນຸກຳມະການ, ຄູເຝິກ, ນາຍ ແລະ ພົນທະຫານທົ່ວກອງບັນຊາການທະຫານເມືອງ, ກອງຮ້ອຍຄໍ 14 ແລະ ກອງຫຼອນບ້ານຜາແກ້ວເຂົ້າຮ່ວມ. ສະຫາຍ ຮທ ຄຳທິດ ຫັດອອນສີ ຫົວໜ້າຂະແໜງອົບຮົມກອງບັນຊາການທະຫານເມືອງພູຄູນ ໄດ້ໃຫ້ຮູ້ວ່າ: ຈຸດປະ ສົງໃນການຈັດເຝິກອົບຮົມກໍ່ເພື່ອສ້າງໃຫ້ພະນັກງານ-ນັກລົບພາຍໃນກົມກອງໄດ້ຮູ້ມູນເຊື້ອຂອງກອງທັບ ແລະ ການເຕີບໃຫຍ່ຂະຫຍາຍຕົວຂອງປະເທດຊາດ, ມີສະຕິຕື່ນຕົວປະຕິບັດຂໍ້ກຳນົດກົດລະບຽບຂອງກອງທັບ ແລະ ກົດໝາຍຂອງລັດໃຫ້ມີລະບຽບແບບແຜນທີ່ດີ, ສ້າງພະນັກງານ-ນັກລົບໃຫ້ມີກໍາລັງທີ່ແຂງແຮງ, ມີຄຸນສົມບັດ, ມີແນວຄິດຫຼັກໝັ້ນຮູ້ຈໍາແນກມິດ ແລະ ສັດຕູ, ສາມາດນໍາເອົາແນວທາງ ແລະ ລະບຽບວິໄນຂອງກອງທັບໄປນໍາໃຊ້ເຂົ້າໃນຊີວິດປະຈຳວັນ ພ້ອມທັງກຳໄດ້ຫຼັກການ ແລະ ຄວາມຮູ້ພື້ນຖານຂອງວິຊາສິນລະປະຍຸດ, ຍຸດທະວິທີ ແລະ ລະບຽບກິລາເພື່ອເປັນພື້ນຖານໃນການກຽມພ້ອມສູ້ລົບກໍຄືປະຕິບັດໜ້າທີ່ວຽກງານຕົວຈິງ. ບັນດານັກສຳມະນາກອນທີ່ເຂົ້າຮ່ວມອົບຮົມໃນຄັ້ງນີ້ຈະໄດ້ຮໍ່າຮຽນເອກະສານຕ່າງໆທີ່ສໍາຄັນ ເຊິ່ງມີທັງພາກທິດສະດີ ແລະ ພາກປະຕິບັດຕົວຈິງ ປະກອບມີວິຊາການເມືອງ, ວິຊາລະບຽບ-ກິລາ, ວິຊາສິນລະປະຍຸດ, ວິຊາຍຸດທະວິທີ ແລະ ໃຊ້ເວລາ 10 ວັນຈິງຈະສໍາເລັດໃນການເຝິກອົບຮົມ. ໃນໂອກາດດັ່ງກ່າວ ຄະນະປະທານກໍຍັງໄດ້ໃຫ້ຄຳໂອ້ລົມ ແລະ ຮຽກຮ້ອງໃຫ້ນັກສໍາມະນາກອນທຸກສະຫາຍຈົ່ງເອົາໃຈໃສ່ໃນການເຝິກອົບຮົມຫັດແອບ ປະຕິບັດກົດລະບຽບຢ່າງເຂັ້ມງວດ ແລະ ມີຄວາມສາມັກຄິ ພ້ອມ ກັນພະຍາຍາມຜ່ານຜ່າອຸປະສັກຄວາມຫຍຸ້ງຍາກ ແລະ ເຮັດສໍາເລັດໜ້າທີ່ໃນການຮໍ່າຮຽນ ແລະ ຄູເຝິກສອນຕ້ອງຮັບປະກັນການຮຽນ-ການສອນໃຫ້ດີ ໃຫ້ມີບຸກຄົນຮຽນເກັ່ງບັນລຸເປົ້າໝາຍໃຫ້ໄດ້ 100%.

 

ແຫລ່ງຂ່າວ: ອຸທຽນ ພອນວິໄລ