ເມື່ອວັນທີ 24 ກຸມພາ 2020 ເວັບໄຊເມໂທຣລາຍງານວ່າ ເດັກເກີດໃໝ່ເພດຍິງອາຍຸ 17 ວັນ ໃນເມືອງ ອູຮັ່ນ, ສປ ຈີນ ກາຍເປັນຜູ້ປ່ວຍຕິດເຊື້ອໂຄໂຣນາ ຫຼື ໂຄວິດ-19 ອາຍຸທີ່ນ້ອຍທີ່ສຸດທີ່ຫາຍຈາກໂຣກດັ່ງກ່າວ ສາມາດກັບເຮືອນໄດ້ດ້ວຍສຸຂະພາບແຂງແຮງ ແລະ ປອດເຊື້ອ ໂດຍບໍ່ຕ້ອງອາໃສການຮັກສາດ້ວຍຢາໃດໆ.
ລາຍງານເຜີຍໃຫ້ຮູ້ວ່າ ແມ່ຂອງເດັກເກີດໃໝ່ຄົນນີ້ເປັນຜູ້ປ່ວຍຕິດເຊື້ອໂຄວິດ-19 ເຊິ່ງໄດ້ເຂົ້າຮັກສາຕົວທີ່ໂຮງໝໍ ຫຼັງຈາກເກີດລູກແລ້ວກໍ່ໄດ້ຖືກນຳສົ່ງໄປໂຮງໝໍເດັກໃນເມືອງ ອູຮັ່ນ ກ່ອນທີ່ແພດຈະພົບວ່າ ເດັກເກີດໃໝ່ຄົນນີ້ຕິດເຊື້ອໄວຣັດໂຄວິດ-19. ນອກຈາກນີ້, ຍັງມີການຕິດເຊື້ອທີ່ລະບົບທາງເດີນຫາຍໃຈ ແລະ ມີການເສຍຫາຍເລັກໜ້ອຍທີ່ຫົວໃຈ ແຕ່ເນື່ອງຈາກວ່າອາການຂອງໂຣກບໍ່ປະກົດໃຫ້ເຫັນຊັດເຈນປານໃດ ແພດເລີຍໄດ້ຕັດສິນໃຈປ່ອຍໃຫ້ຮ່າງກາຍຂອງເດັກເກີດໃໝ່ຄົນນີ້ຕໍ່ສູ້ກັບເຊື້ອໄວຣັສດ້ວຍຕົວເອງ.
ນາຍແພດ ເຈິ້ງ ຫຼິງຄົງ ຈາກພະແນກເດັກໂຮງໝໍເດັກອູຮັ່ນ ໄດ້ເປີດເຜີຍກັບສຳນັກຂ່າວ CCTV ວ່າ ເດັກເກີດໃໝ່ຄົນນີ້ ບໍ່ມີອາການຫາຍໃຈລຳບາກແລ້ວ ລວມເຖິງບໍ່ມີອາການໄອ ຫຼື ມີໄຂ້ ແພດຈຶ່ງໃຫ້ການຮັກສາໃນສ່ວນກ່ຽວກັບກ້າມເນື້ອຫົວໃຈຂອງເດັກເທົ່ານັ້ນ ເຊິ່ງຕອນນີ້ ເດັກຄົນດັ່ງກ່າວ (ຊື່ນາງ ສຽວສ່ຽວ) ກໍ່ຫາຍດີຈາກພະຍາດໂຄວິດ-19 ແລະ ໂຣກຫົວໃຈແລ້ວ ສາມາດອອກຈາກໂຮງໝໍໄດ້ແລ້ວ ພ້ອມທັງມີສຸຂະພາບແຂງແຮງດີ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: hilight.kapook.com