ເກີດເຫດຄວາຍຊົນຄົນເສຍຊີວິດພາບ 2

ວັນທີ 5 ກຸມພາ 2018 ວານນີ້, ຢູ່ທີ່ບ້ານສະກ້າ ເມືອງໂພນໂຮງ ແຂວງວຽງຈັນ ໄດ້ເກີດເຫດເສົ້າສະຫຼົດຂຶ້ນ ເມື່ອຄວາຍເຖິກໃຫຍ່ເກີດໃຈຮ້າຍ ແລ້ວຊົນຄົນເສຍຊີວິດເຖິງ 2 ຄົນ.

ແຫຼ່ງຂ່າວກ່າວວ່າ ຄວາຍໂຕດັ່ງກ່າວໄດ້ຖືກຜູ້ເສຍຊີວິດລ້ຽງມາແຕ່ນ້ອຍ ແຕ່ມາມື້ນີ້ໄດ້ເກີດໃຈຮ້າຍ ແລ້ວຊົນຜູ້ເປັນເຈົ້າຂອງ ເຂົາຂອງຄວາຍປັກເຂົ້າຮ່າງກາຍຫຼາຍບ່ອນ ເມື່ອເປັນແນວນັ້ນ ພໍ່ຂຽນ ຈຶ່ງໄດ້ເຂົ້າໄປຊ່ວຍເຫຼືອ ແລະໄດ້ຖືກຄວາຍຊົນຕື່ມອີກຈົນເສຍຊີວິດ, ໃນຂະນະທີ່ອີກຜູ້ໜຶ່ງກຳລັງເຂົ້າໄປຊ່ວຍເຫຼືອ ຄວາຍເຖິກໂຕດັ່ງກ່າວໄດ້ໂດດໃສ່ໄລ່ຊົນ ແຕ່ຜູ້ກ່ຽວແລ່ນໜີທັນຈຶ່ງລອດແລະບໍ່ໄດ້ຮັບບາດເຈັບ. ພາຍຫຼັງເກີດເຫດຈຶ່ງພົບວ່າທັງສອງຄົນທີ່ຖືກຄວາຍຊົນໄດ້ເສຍຊີວິດໄປແລ້ວ ແລະຄວາຍໂຕດັ່ງກ່າວກໍຖືກປະຊາຊົນໃຊ້ປືນຍິງຕາຍ.

ຂໍສະແດງຄວາມເສຍໃຈນຳຄອບຄົວຜູ້ໄດ້ຮັບເຄາະຮ້າຍ ແລະຂໍໃຫ້ມີຜູ້ທີ່ຢູ່ໃກ້ສັດໃຫຍ່ຫຼືສັດທີ່ເປັນອັນຕະລາຍ ຈົ່ງລ້ຽງດູດ້ວຍຄວາມລະມັດລະວັງ.