ຮອງປະທານສະພາແຫ່ງຊາດ ຢ້ຽມຢາມ ສສ ຫວຽດນາມ

0
845

ໃນວັນທີ 19 ກໍລະກົດ 2022 ທີ່ຜ່ານມາ, ສະຫາຍ ນາງ ສູນທອນ ໄຊຍະຈັກ ພ້ອມດ້ວຍຄະນະ ໄດ້ພົບປະສອງຝ່າຍກັບຄະນະນໍາຂອງສະພາແຫ່ງຊາດ ສສ ຫວຽດນາມ ຊຶ່ງນໍາໂດຍ ສະຫາຍ ເຈິນ ແທ໋ງ ເໜີ້ນ ກໍາມະການກົມການເມືອງສູນກາງພັກ ຮອງປະທານສະພາແຫ່ງຊາດ ແຫ່ງ ສສ ຫວຽດນາມ ປະທານຄະນະມິດຕະພາບລັດຖະສະພາຫວຽດນາມ-ລາວ.

ການຢ້ຽມຢາມໃນຄັ້ງນີ້ຈັດຂຶ້ນເພື່ອໃຫ້, ສອງພັກ, ສອງລັດ ແລະ ປະຊາຊົນສອງຊາດພວມມີການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ​ຫວຽດນາມ-ລາວ 2022 ຄື: ວັນຄົບຮອບ 60 ປີແຫ່ງການສ້າງຕັ້ງສາຍພົວພັນການທູດ ແລະ 45 ປີວັນເຊັນສັນຍາມິດຕະພາບ ແລະ ການຮ່ວມມື.

ເຊິ່ງເຕັມໄປດ້ວຍບັນຍາກາດແຫ່ງໄມຕີຈິດສະໜິດສະໜົມຖານອ້າຍນ້ອງ ຊຶ່ງທັງສອງຝ່າຍໄດ້ແຈ້ງໃຫ້ກັນຊາບສະພາບການພົ້ນເດັ່ນຂອງທັງສອງປະເທດ, ຕີລາຄາສູງຕໍ່ຜົນພົວພັນຮ່ວມມືແບບພິເສດລະຫວ່າງສອງພັກ, ສອງລັດ ກໍຄືສອງອົງການນິຕິບັນຍັດລາວ-ຫວຽດນາມ ໃນໄລຍະທີ່ຜ່ານມາ ແລະ ແລກປ່ຽນບົດຮຽນການຊີ້ນໍາ-ນໍາພາຂອງຄະນະພັກຂອງສອງສະພາແຫ່ງຊາດ, ບົດຮຽນກ່ຽວກັບວຽກງານສະມາຊິກສະພາແຫ່ງຊາດ ການພົວພັນລະຫວ່າງສະພາແຫ່ງຊາດ ແລະ ສະພາປະຊາຊົນທ້ອງຖິ່ນກໍຄືການພົວພັນລະຫວ່າງຄະນະເລຂາທິການ ແລະ ຫ້ອງວ່າການສະພາແຫ່ງຊາດຫວຽດນາມ, ວຽງານການເຄື່ອນໄຫວຕ່າງປະເທດຂອງສະພາແຫ່ງຊາດໃນຕໍ່ໜ້າ.

ພ້ອມດຽວກັນນັ້ນ, ຄະນະໄດ້ເຂົ້າຢ້ຽມຂໍ່ານັບສະຫາຍ ເວືອງ ດິງ ເຫວະ ກໍາມະການກົມການເມືອງສູນກາງພັກ ປະທານສະພາແຫ່ງຊາດແຫ່ງ ສສ ຫວຽດນາມ ຊຶ່ງສະຫາຍໄດ້ຕີລາຄາສູງຕໍ່ການຢ້ຽມຢາມຫວຽດນາມຂອງຄະນະໃນຄັ້ງນີ້, ເພາະພໍດີກັບໄລຍະທີ່ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ພວມສະເຫຼີມສະຫຼອງປີສາມັກຄິມິດຕະພາບລາວ-ຫວຽດນາມ-ລາວ. ສະຫາຍປະທານສະພາແຫ່ງຊາດຫວຽດນາມໄດ້ຕີລາຕາສູງການພົວພັນຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງຊາດເວົ້າລວມ, ເວົ້າສະເພາະລະຫວ່າງສອງອົງການນິຕິບັນຍັດຫວຽດນາມ-ລາວ ແລະ ໄດ້ສະເໜີໃຫ້ສອງສະພາສືບຕໍ່ເສີມຂະຫຍາຍສາຍພົວພັນຮ່ວມມືລະຫວ່າງສອງອົງການໃນຕໍ່ໜ້າ.

ນອກຈາກເຄື່ອນໄຫວຢູ່ນະຄອນຫຼວງຮ່າໂນ້ຍແລ້ວ, ຄະນະຍັງໄດ້ຢ້ຽມຢາມ ແລະ ເຮັດວຽກກັບຄະນະພັກ, ຄະນະນໍາຂອງແຂວງທ້າຍຫງວຽນ, ພິເສດຍັງໄດ້ເຂົ້າຮ່ວມ ແລະ ກ່າວຄໍາເຫັນໃນກອງປະຊຸມະໄໝສາມັນເທື່ອທີ 7 ຂອງສະພາປະຊາຊົນ ແຂວງທ້າຍຫງວຽນຊຸດທີ 14. ຄະນະຍັງໄດ້ເດີນທາງໄປຢ້ຽມຊົມສະຫະກອນຜະລິດຊາຫາວດາດ ໃນເມືອງເຕີນເກືອງ ທີ່ມີຊື່ສຽງໃນການຜະລິດຊາຂອງແຂວງທ້າຍຫງວຽນ ແລະ ຢ້ຽມຢາມມະຫາວິທະຍາໄລຍທ້າຍຫງວຽນ, ມີຄໍາເຫັນຕໍ່ບັນດາຄູ-ອາຈານ ແລະ ບັນດານັກສຶກສາລາວ-ຫວຽດນາມ ຊຶ່ງປັດຈຸບັນມີນັກສຶກສາລາວຮຽນຢູ່ເກືອບ 60 ຄົນ.

ການມາຢ້ຽມຢາມຂອງສະຫາຍຮອງປະທານສະພາໃນຄັ້ງນີ້ໄດ້ປະສົບຜົນສໍາເລັດຢ່າງຈົບງາມ, ເປັນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກສອງລັດ ແລະ ປະຊາຊົນສອງຊາດລາວ-ຫວຽດນາມເວົ້າລວມ, ເວົ້າສະເພາະສອງອົງການໃຫ້ນັບມື້ນັບແໜ້ນແຟ້ນ ແລະ ແຕກດອກອອກຜົນຍິ່ງໆຂືື້ນ.
ຂ່າວ: ສພຊ