ເພື່ອເປັນການສົ່ງເສີມໃຫ້ຫົວໜ່ວຍທຸລະກິດ ບັນດາຜູ້ປະກອບການຕະຫຼາດ ສາມາດເຄື່ອນໄຫວທຸລະກິດໄດ້ຢ່າງເຕັມເມັດເຕັມໜ່ວຍ ແກ້ໄຂສິ່ງທີ່ເປັນອຸປະສັກ ແລະ ບຸກບືນກ້າວຂຶ້ນແຂ່ງຂັນກັບນະຄອນໃຫຍ່ ກໍ່ຄືນະຄອນຫຼວງຂອງບັນດາປະເທດອາຊຽນ ພ້ອມດຽວກັນກໍ່ເພື່ອເປັນການປຶກສາຫາລື ແລະ ຜັນຂະຫຍາຍມະຕິຕົກລົງຂອງກອງປະຊຸມລັດຖະບານ ແລະ ຂອງອົງການປົກຄອງນະຄອນຫຼວງວຽງຈັນ ກ່ຽວກັບການຈັດສັນຄວາມເປັນລະບຽບຮຽບຮ້ອຍ ໃນທົ່ວນະຄອນຫຼວງວຽງຈັນ ເວົ້າລວມ ເວົ້າສະເພາະແມ່ນສູນການຄ້າ ຕະຫຼາດ ເຊິ່ງທັງໝົດແມ່ນເພື່ອແນໃສ່ເຮັດໃຫ້ນະຄອນຫຼວງກາຍເປັນເມືອງ ໜ້າຢູ່ພັດທະນາທີ່ຍືນຍົງສົມກັບທີ່ເປັນເມືອງຫຼວງຂອງປະເທດ.
ໃນວັນທີ 8 ມິຖຸນາ 2015 ຢູ່ທີ່ພະແນກອຸດສາຫະກຳ ແລະ ການຄ້ານະຄອນຫຼວງ ໄດ້ຈັດກອງປະຊຸມການຈັດສັນຄວາມເປັນລະບຽບຮຽບຮ້ອຍ ໃນຂົງເຂດຕະຫຼາດ ແລະ ສູນການຄ້າທົ່ວນະຄອນຫຼວງວຽງຈັນຂຶ້ນ ພາຍໃຕ້ການເປັນປະທານຂອງທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງ ເຊິ່ງມີທ່ານເຈົ້າເມືອງ ຮອງເຈົ້າເມືອງ 4 ເມືອງໃນ ແລະ ບັນດາຜູ້ປະກອບການທຸລະກິດເຂົ້າຮ່ວມ.
ທ່ານ ເບີລິນ ເພັດຈັນທະຣາດ ຫົວໜ້າພະແນກອຸດສາຫະກຳ ແລະ ການຄ້ານະຄອນຫຼວງ ກ່າວວ່າ: ປັດຈຸບັນ ຕະຫຼາດທົ່ວນະຄອນຫຼວງວຽງຈັນ ມີທັງໝົດ 96 ແຫ່ງ ມີຕະຫຼາດຂະໜາດໃຫຍ່ 12 ແຫ່ງ ຂະໜາດກາງ 23 ແຫ່ງ ແລະ ຂະໜາດນ້ອຍ 61 ແຫ່ງ ໃນນັ້ນ ມີຕະຫຼາດກາງຄືນ 1 ແຫ່ງ ຕະຫຼາດຊຸມຊົນ 25 ແຫ່ງ ທຽບໃສ່ປີ 2001 ເພີ່ມຂຶ້ນ 32 ແຫ່ງ ເທົ່າກັບ 50% ການເພີ່ມຂຶ້ນຂອງຕະຫຼາດ ແລະ ສູນການຄ້າສະແດງໃຫ້ເຫັນການຂະຫຍາຍຕົວຂອງໂຄງລ່າງດ້ານການຄ້າ ກໍ່ຄືການຂະຫຍາຍຕົວຂອງຕາໜ່າງການຄ້າ ແລະ ບໍລິການ ໃນໄລຍະທີ່ຜ່ານມາ ຍັງມີບາງບັນຫາຄົງຄ້າງທີ່ຕິດພັນກັບການສ້າງ ການບໍລິຫານ ການຄຸ້ມຄອງຂອງຕະຫຼາດ ເຊັ່ນ: ການອະນຸຍາດສ້າງຕະຫຼາດທີ່ບໍ່ໄດ້ຄຳນຶງເຖິງການຂະຫຍາຍຕົວຂອງຕົວເມືອງ ການເພີ່ມຂຶ້ນຂອງປະຊາກອນ ແລະ ການວາງແຜນພັດທະນາຕົວເມືອງ ການໃຫ້ສຳປະທານທີ່ດິນສ້າງຕະຫຼາດ ການອະນຸຍາດປຸກສ້າງຕະຫຼາດ ການຄຸ້ມຄອງຕະຫຼາດແຕ່ລະພາກສ່ວນ ເຮັດຕາມລະບຽບໃຜມັນ ບໍ່ມີການປຶກສາຫາລືກັນ ບາງພາກສ່ວນຍັງຖືເບົາ ແລະ ບໍ່ໃຫ້ຄວາມສຳຄັນກ່ຽວກັບການຄຸ້ມຄອງຕະຫຼາດ ຕາມສາຍວິຊາສະເພະ ບໍ່ວ່າຈະຢູ່ຂັ້ນນະຄອນຫຼວງວຽງຈັນ ກໍ່ຄືຢູ່ຂັ້ນເມືອງ ມີຫຼາຍຕະຫຼາດຜູ້ປະກອບການຂາດການຈັດສັນທີ່ຖືກຕ້ອງ ການປຸກສ້າງຕໍ່ເຕີມ ການວາງສິນຄ້າຂາຍແບບຊະຊາຍ ບໍ່ຄຳນຶງເຖິງຄວາມເປັນລະບຽບ ການຄຸ້ມຄອງບໍ່ໄດ້ດີ ເນື້ອທີ່ຕະຫຼາດມີບໍ່ພຽງພໍ ລວມທັງສະຖານທີ່ຈອດລົດແມ່ນມີໜ້ອຍ ແລະ ອື່ນໆ.
ເຖິງວ່າຈະມີຄວາມຫຍຸ້ງຍາກຫຼາຍເທົ່າໃດ ແຕ່ລະພາກສ່ວນລວມທັງຜູ້ປະກອບການ ກໍ່ໄດ້ມີຄວາມພະຍາຍາມທີ່ຈະໃຫ້ການປັບປຸງ ດັດສົມຕະຫຼາດທີ່ມີຢູ່ໃຫ້ຫັນໄປເປັນຕະຫຼາດທີ່ສີວິໄລ ໃຫ້ຄົນນະຄອນຫຼວງໄດ້ຊົມໃຊ້ ແລະ ພ້ອມກັນພັດທະນານະຄອນຫຼວງວຽງຈັນ ກ່ຽວກັບເລື່ອງຕະຫຼາດທາງພະແນກອຸດສາຫະກຳ ແລະ ການຄ້າ ນວ ແມ່ນໄດ້ຖືເປັນວຽກບຸລິມາສິດໃນການຊີ້ນຳ ນຳພາຢ່າງໃກ້ຊິດຕໍ່ກັບຕະຫຼາດ ທີ່ຂຶ້ນກັບນະຄອນຫຼວງວຽງຈັນ ຄຸ້ມຄອງມີຕະຫຼາດເຊົ້າ ຕະຫຼາດຊັງຈຽງ ຕະຫຼາດຮົງຢຸ້ຍ ແລະ ຕະຫຼາດອານຊີ ສຳລັບຕະຫຼາດຂັ້ນເມືອງຄຸ້ມຄອງ ແມ່ນໄດ້ຊີ້ນຳຫ້ອງການອຸດສາຫະກຳ ແລະ ການຄ້າເມືອງ ເປັນເຈົ້າການໃນການເຄື່ອນໄຫວຂອງຄະນະກຳມະການຄຸ້ມຄອງຕະຫຼາດ ໃນແຕ່ລະເມືອງຢ່າງຕໍ່ເນື່ອງ ໃນການປັບປຸງດັດສົມຕະຫຼາດ ໂດຍພາຍໃຕ້ການຊີ້ນຳ ນຳພາຈາກທ່ານເຈົ້າເມືອງ ເຊິ່ງຫຼາຍເມືອງກໍ່ໄດ້ມີການເຄື່ອນໄຫວຈັດຕັ້ງປະຕິບັດຢ່າງຕັ້ງໜ້າ ເປັນຕົ້ນ ຕະຫຼາດສີຂຽວດອນກອຍ ຕະຫຼາດຂົວດິນ ຕະຫຼາດສີໄຄ ຕະຫຼາດພາກເຊົ້າ 1 ແລະ 2 ທົ່ງຂັນຄຳ ຕະຫຼາດໂນນສະຫວ່າງ ຕະຫຼາດທາດຫຼວງ ແລະ ຕະຫຼາດອື່ນໆ.
ແຫລ່ງຂ່າວ: ວຽງຈັນໃໝ່