ອຸດົມໄຊມີຄວາມພ້ອມໃນການສອບເສັງ ມ 4 ແລະ ມ 7 ສົກຮຽນ 2014-2015

0
1763

ທ່ານ ນາງ ນີວັນ ໄຊຍະສິດ ຫົວໜ້າຂະແໜງມັດທະຍົມ ພະແນກສຶກສາທິການ ແລະ ກິລາ ແຂວງອຸດົມໄຊ (ສກຂ) ໄດ້ໃຫ້ສໍາພາດ ໃນຄັ້ງວັນທີ 8 ມີຖຸນາ 2015 ນີ້, ກ່ຽວກັບການຫ້າງຫາກະກຽມການສອບເສັງ ມ4 – ມ7 ວ່າ: ການຫ້າງຫາກະກຽກສອບເສັງມ4 ແລະ ມ7 ສົກຮຽນ 2014-2015 ນີ້ ທາງພະແນກ (ສກຂ) ພວກເຮົາໃນເບື້ອງຕົ້ນໄດ້ສັງລວມ ສະຖິຕິນັກຮຽນຜູ້ທີ່ມີໜ້າສອບເສັງ ມ4 ແລະ ມ7 ແລ້ວນໍາມາເຮັດເປັນປື້ມທະບຽນນັກຮຽນ, ອອກນິຕິກໍາຕ່າງໆ ເພື່ອປະກອບການລົງສອບເສັງ ເປັນຕົ້ນແມ່ນ ຂໍ້ຕົກລົງແຕ່ງຕັ້ງຄະນະຮັບຜິດຊອບຊີ້ນໍາລວມ ແລະ ຕັດສິນຜົນການສອບເສັງ, ແຕ່ງຕັ້ງຄະນະຮັບຜິດຊອບລົງປະຈໍາຢູ່ແຕ່ລະສູນ, ກົດລະບຽບການສອບເສັງ, ຫຼັກການ ແລະ ເງື່ອນໄຂຕັດສິນຜົນການສອບເສັງ, ແຜນດໍາເນີນງານ, ຕາຕະລາງສອບເສັງ, ງົບປະມານ ແລະ ອຸປະກອນຕ່າງໆ ທີ່ຮັບໃຊ້ເຂົ້າໃນການສອບເສັງ ປັດຈຸບັນມີຄວາມພ້ອມແລ້ວເກືອບ 100 % .
ສໍາລັບຈໍານວນນັກສອບເສັງຂັ້ນມ4 ໃນສົກຮຽນນີ້ ທົ່ວແຂວງມີທັງໝົດ 5.085 ຄົນ, ຍິງ 2.332 ຄົນ, ຈໍານວນນັກຮຽນຂັ້ນ ມ7 ທົ່ວແຂວງມີທັງໝົດ 2.912 ຄົນ, ຍິງ 1.285 ຄົນ.
ຂັ້ນ ມ4 ທັງໝົດ ແບ່ງອອກເປັນ 23 ສູນ, ລວມມີ 75 ໂຮງຮຽນ, ມີ 220 ຫ້ອງ, ປະກອບມີສູນສອບເສັງ: ມສ ແຂວງ, ມສ ເມືອງໄຊ, ມຕ ບ້ານບໍ່, ມສ ຫ້ວຍຂຸມ, ມສ ຫົວນໍ້າງາ, ມສ ນໍ້າແຫງ, ມສ ກໍນ້ອຍ, ມສ ເມືອງຫຼາ, ມສ ນາໝໍ້, ມສ ນາສະຫວ່າງ, ມສ ດອນແອ່ນ, ມສ ລາດຫານ, ມສ ເມືອງແບງ, ມຕ ນາງົວ, ມສ ນາແມດ, ມສ ເມືອງຮຸນ, ມສ ນາຊຽງດີ, ມຕ ສີວິໄລ, ມຕ ພູແຊງ, ມຕ ຜາຄໍາ, ມສ ດອນເມືອງ, ມສ ປາກແບງ ແລະ ມຕ ແຕງວາງ.
ສໍາລັບຈໍານວນສູນສອບເສັງຂັ້ນ ມ7 ທັງໝົດແບ່ງອອກເປັນ 9 ສູນ, ລວມ ມີ 25 ໂຮງຮຽນ, ມີ 136 ຫ້ອງ ປະກອບມີສູນສອບເສັງ: ມສ ແຂວງ, ມສ ເມືອງໄຊ, ມສ ເມືອງຫຼາ, ມສ ນາໝໍ້, ມສ ດອນແອ່ນ , ມສ ເມືອງແບງ, ມສ ເມືອງຮຸນ ແລະ ມສ ປາກແບງ.
ສ່ວນວັນເວລາການສອບເສັງແມ່ນເອກະພາບກັນໃນຂອບເຂດທົ່ວປະເທດ ມ4 ສອບເສັງເລີ່ມແຕ່ວັນທີ 16 – 18 ມີຖຸນາ, ມ7 ເລີ່ມແຕ່ວັນທີ 23 – 26 ມີຖຸນາ 2015 ນີ້, ວິຊາທີ່ນໍາມາສອບເສັງຂັ້ນມ4 ມີ 5 ວິຊາປະກອບມີ ວິຊາ ພາສາລາວ-ວັນນະຄະດີ, ຄະນິດສາດ, ທໍາມະຊາດ, ວິທະຍາສາດສັງຄົມ ແລະ ວິຊາສຶກສາຜົນລະເມືອງ.
ສໍາລັບຂັ້ນ ມ7 ມີ 8 ວິຊາຄື ວິຊາ ພາສາລາວ-ວັນນະຄະດີ, ຄະນິດສາດ, ຟິຊິກສາດ, ເຄມີສາດ, ຊີວະສາດ, ປະຫວັດສາດ, ພູມີສາດ ແລະ ວິຊາສຶກສາຜົນລະເມືອງ.
ນະໂອກາດນີ້, ທ່ານ ນາງ ນີວັນ ໄຊຍະສິດ ຫົວໜ້າຂະແໜງມັດທະຍົມ ພະແນກສຶກສາທິການ ແລະ ກິລາ ກໍໄດ້ຮຽກຮ້ອງມາເຖິງນ້ອງໆ ນັກຮຽນທັງໝົດ ທີ່ໃກ້ຈະເຂົ້າສູ່ການສອບເສັງໃນມໍ່ໆ ນີ້, ຈົ່ງພາກັນເອົາໃຈໃສ່ຄົ້ນຄວ້າຮໍ່າຮຽນໃຫ້ຫຼາຍ ເພື່ອກຽມຄວາມພ້ອມໃຫ້ຕົນເອງມີຄວາມຮູ້ ແລະ ຮັບປະກັນໃນການ ສອບເສັງຂອງຕົນ ເພື່ອຍາດໃຫ້ໄດ້ຄະແນນທີ່ດີ ແລະ ສອບເສັງໄດ້ 100 %.
ສໍາລັບນ້ອງນັກຮຽນ ທີ່ໄດ້ສອບເສັງເລື່ອນຫ້ອງຜ່ານພົ້ນໄປແລ້ວນັ້ນ ກໍຂໍໃຫ້ໃຊ້ເວລາຫວ່າງຍາມພັກແລ້ງນີ້ໃຫ້ເກີດປະໂຫຍດ ໂດຍການຊ່ວຍວຽກພໍ່ແມ່ຜູ້ປົກຄອງຢູ່ບ້ານ, ຢູ່ເຮືອນ ຕາມພາລະໜ້າວຽກຂອງຕົນເທົ່າທີ່ຈະຊ່ວຍໄດ້, ບໍ່ໃຫ້ພາກັນໄປມົ້ວສຸມກັບສິ່ງອະບາຍຍະມົກຕ່າງໆ ເປັນຕົ້ນແມ່ນ ການທ່ຽວຫຼີ້ນ, ກິນ, ດີ່ມສິ່ງມື່ນເມົ່າ, ມົ້ວສຸມສິ່ງເສບຕິດ, ຂັບຂີ່ລົດໄວ, ຂີ້ລັກງັດແງະ, ອະລະວາດຕີກັນ ແລະ ບັນຫາຫຍໍ້ທໍ້ອື່ນ ໆລໆ, ຈົ່ງແຂ່ງຂັນກັນ ຮຽນດີ-ຮຽນເກັ່ງ, ເອົາໃຈໃສ່ຕັ້ງໜ້າເຝຶກຝົນຕົນເອງ ໃຫ້ເປັນສິດທີ່ດີຂອງຄູອາຈານ, ເປັນລູກທີ່ດີຂອງພໍ່ແມ່, ເປັນຫລານທີ່ດີຂອງ ປ້າ-ລຸງ, ເປັນຄົນດີຂອງຊາດ ແລະ ເປັນຜູ້ທີ່ມີຄວາມຮູ້, ຄວາມສາມາດໃນການພັດທະນາບ້ານເມືອງ, ພໍ່ແມ່ຜູ້ປົກຄອງນັກຮຽນກໍໃຫ້ເພີ່ມຄວາມເອົາໃຈໃສ່ໃກ້ຊິດຕິດແທດກັບລູກຫຼານຂອງຕົນໃຫ້ຫຼາຍຂື້ນຕິ່ມ ທັງຊ່ວຍສຶກສາອົບຮົມລູກຫຼານຂອງຕົນໃຫ້ຫັນມາເອົາໃຈໃສ່ການຮຽນ ເພື່ອໃຫ້ມີອະນາຄົດທີ່ດີ, ຜູ້ບໍລິຫານການສຶກສາ, ຄູອາຈານສອນຢູ່ໂຮງຮຽນແຕ່ລະແຫ່ງ ແຕ່ລະຂັ້ນ ທັງພາກລັດ ແລະ ເອກະຊົນ ໃນໄລຍະພັກຮຽນນີ້ກໍຕ້ອງໄດ້ເອົາໃຈໃສ່ຄຸ້ມຄອງ , ປົກປັກຮັກສາ ແລະ ນຳໃຊ້ໂຮງຮຽນ, ອຸປະກອນການຮຽນ-ການສອນ ໃຫ້ມີປະສິດທິຜົນ ແລະ ສາມາດນໍາໃຊ້ໄດ້ຍາວນານຕະຫຼອດໄປ.

18900_1586241641626657_3907386871906610818_n