ອີຣານນ້ຳຖ້ວມໜັກ ຈົນດິນເຈື່ອນ ຕາຍຢ່າງໜ້ອຍ 69 ຄົນ

0
343

ເກີດນ້ຳຖ້ວມກະທັນຫັນ ແລະ ມີດິນເຈື່ອນ ໃນກຸງເຕຫະຣານ ແລະ ອີກ 20 ແຂວງຂອງອີຣານ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 69 ຄົນ ແລະ ສູນຫາຍອີກ 45 ຄົນ.

 

 

ໃນວັນທີ 31 ກໍລະກົດ ສຳນັກຂ່າວ ອັລຈາຊີລາ ລາຍງານວ່າ ເກີດນ້ຳຖ້ວມກະທັນຫັນ ແລະ ມີດິນເຈື່ອນ ໃນກຸງເຕຫະຣານ ແລະ ອີກ 20 ແຂວງຂອງອີຣານ ໂດຍກະແສນ້ຳໄດ້ໄຫຼເຂົ້າມາຖ້ວມບ້ານເຮືອນຂອງປະຊາຊົນໃນຫຼາຍໆເຂດຂອງຕອນໃຕ້ຂອງປະເທດ ມີປະຊາຊົນທີ່ຕິດຢູ່ໃນລົດ ແລະ ເຮືອນເປັນຈຳນວນຫຼາຍ.

ຫຼັງຈາກທີ່ຝົນຕົກໜັກ ຈົນເຮັດໃຫ້ຄົນເສຍຊີວິດແລ້ວ 69 ຄົນ ແລະ ຍັງມີປະຊາຊົນສູນຫາຍອີກ 45 ຄົນ ແລະ ຍັງສ້າງຄວາມເສຍຫາຍໃຫ້ແກ່ບ້ານເຮືອນຂອງປະຊາຊົນຫຼາຍຫວ່າ 20.000 ຫຼັງ.

ຂະນະດຽວກັນ ສະໜາມບິນຫຼາຍໆແຫ່ງໄດ້ຖືກປິດໃຫ້ບໍລິການ ແລະ ທາງຫຼວງສາຍສຳຄັນຫຼາຍສາຍກໍ່ໄດ້ປິດເສັ້ນທາງຊົ່ວຄາວ, ທາງອີຣານຍັງໄດ້ເຕືອນໃຫ້ປະຊາຊົນຫຼາຍພັນຄົນ ຕ້ອງໄດ້ອົບພະຍົບອອກ ຍ້ອນກົມອຸຕຸໄດ້ແຈ້ງເຕືອນວ່າ ຫຼາຍໆແຂວງຈະມີຝົນຕົກໜັກຕໍ່ເນື່ອງອີກຫຼາຍມື້.