ອາເມຣິກາ ແລະ ລາວ ຮ່ວມມືດ້ານສຸຂະພາບແບບຍືນຍົງ

ເມື່ອວັນທີ 5 ພຶດສະພາຜ່ານມາທີ່ນະຄອນຫຼວງວຽງຈັນ ດຣ.ໂຣເບີດ ໂພບ ຫົວໜ້າກົມຮ່ວມມືຫຼຸດຜ່ອນໄພຂົ່ມຂູ່ (CTR) ອົງ ການຫຼຸດຜ່ອນໄພຂົ່ມຂູ່ດ້ານປ້ອງກັນຊາດ (DTRA) ຂອງສະຫະລັດອາເມຣິກາ ໄດ້ພົບກັບບັນດາຄູ່ຮ່ວມງານພາກລັດຖະບານ ແລະ ຝ່າຍທະຫານ ກໍຄືບັນດາຜູ້ຕາງໜ້າອົງການອະນາໄມໂລກ (WHO) ເພື່ອທົບທວນຄືນເບິ່ງຜົນໄດ້ຮັບທີ່ດີຂອງໂຄງການຮ່ວມມືຄວາມໝັ້ນຄົງດ້ານສຸຂະພາບລະຫວ່າງ ສ.ອາເມລິກາ ແລະ ສປປ ລາວ ໂດຍໄດ້ປຶກສາຫາລືກ່ຽວກັບຄວາມສຳຄັນຂອງການອອກແບບລະບົບຄວາມໝັ້ນຄົງດ້ານສຸຂະພາບແບບຍືນຍົງ ແລະ ຍາວນານ ຊຶ່ງຈະເປັນການເພີ່ມທະວີເຮັດໃຫ້ການເຝົ້າລະວັງ ແລະ ການປ້ອງກັນພະຍາດຢູ່ ສປປ ລາວ ໃຫ້ມີຄວາມເຂັ້ມແຂງ.

ທ່ານ ນາງ ຣີນາ ບິດເຕີ ເອກອັກຄະລັດຖະທູດສະຫະລັດອາເມຣິກາປະຈຳ ສປປ ລາວ ຮ່ວມກັບ ດຣ. ໂພບ ແລະ ຄະນະຜູ້ແທນຂອງສະຫະລັດອາເມຣິກາ ໄດ້ເຂົ້າພົບປະກັບ ທ່ານ ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ເພື່ອປຶກສາຫາລື ກ່ຽວກັບການຮ່ວມມືຄວາມໝັ້ນຄົງດ້ານສຸຂະພາບໂອກາດດຽວກັນຍັງໄດ້ພົບປະ ທ່ານ ຄຳບຸນນັດ ໄຊຍະນົນ ຮອງລັດຖະມົນຕີ ກະ ຊວງກະສິກຳ ແລະ ປ່າໄມ້ ລວມທັງທົບທວນຄືນເຖິງການຮ່ວມມືລະຫວ່າງສະຫະລັດອາເມຣິກາ ແລະ ສປປ ລາວ ເພື່ອຝຶກອົບຮົມເສີມສ້າງງຄວາມຮູ້ຄວາມສາມາດໃຫ້ນັກສັດຕະວະແພດຂອງ ສປປ ລາວ ການເຝົ້າລະວັງກ່ຽວກັບພະຍາດສັດ ຄວາມສໍາຄັນຂອງການປ້ອງກັນສຸຂະພາບຄົນ ແລະ ເສດຖະກິດການກະສິກຳຂອງ ສປປ ລາວ ພ້ອມນີ້ ທ່ານ ດຣ.ໂພບ ຍັງໄດ້ເຂົ້າພົບ ທ່ານພົນຈັດ ຕະວາ ບົວສິງ ອິນທະວົງ ຫົວໜ້າກົມເສນາຮັກ ເພື່ອປຶກສາຫາລືກ່ຽວກັບວິທີທາງໃນການສ້າງຄວາມສາມາດໃຫ້ກັບຂະແໜງການວຽກງານສາທາລະນະສຸກຂອງທະຫານນຳອີກດ້ວຍ ສະຫະລັດອາເມຣິກາຖືເປັນຄູ່ຮ່ວມງານທີ່ສຳຄັນຂອງ ສປປ ລາວ ເພາະວ່າບັນ ດານັກຊ່ຽວຊານທາງດ້ານສາທະລະນະສຸກຂອງທັງສອງປະເທດແມ່ນໄດ້ປະຕິບັດງານຮ່ວມກັນເພື່ອຄວາມໝັ້ນຄົງດ້ານສຸຂະພາບແບບຍືນຍົງທັງໃນໄລຍະສັ້ນ ແລະ ໄລຍະຍາວ.

ໂດຍການປະຕິບັດງານຮ່ວມກັນເພື່ອປັບປຸງຄວາມໝັ້ນຄົງດ້ານສຸຂະພາບແມ່ນການເສີມສ້າງອະທິປະໄຕຂອງລາວໃຫ້ເຂັ້ມແຂງ ແລະ ປ້ອງກັນໄພຂົ່ມຂູ່ສຸຂະພາບຈາກພາຍນອກ ຂະນະທີ່ປະເທດຊາດສືບຕໍ່ພັດທະນາຢ່າງໄວວາ ຊຶ່ງຖືເປັນຄວາມພະຍາຍາມເພື່ອຕ້ານ ແລະ ສະກັດກັ້ນພະຍາດຕິດຕໍ່ ຊຶ່ງລັດຖະບານສະຫະລັດອາເມຣິກາ ກໍໄດ້ໃຫ້ການສະໜັບສະໜູນໂຄງການດ້ານສຸຂະພາບທີ່ ຫຼາກຫຼາຍຢູ່ໃນ ສປປ ລາວ ເພື່ອສົ່ງເສີມວຽກງານດ້ານໂພຊະນາການ ນ້ຳສະອາດ ສຸຂະອານາໄມ ວິດຖ່າຍ ສຸຂະພາບແມ່ ແລະ ເດັກ ລວມທັງໃຫ້ການຊ່ວຍເຫຼືອຄົນພິການ ແລະ ໂຄງການອາຫານໃນໂຮງຮຽນ.

 

 

ໂດຍ: ສະຫະລັດ ວອນທິວົງໄຊ