ເພື່ອສົ່ງເສີມສຸຂະພາບ, ກັນພະຍາດ, ປົກປ້ອງຊີວິດ ແລະ ຊັບສິນ ຂອງພົນລະເມືອງແນໃສ່ຫຼຸດຜ່ອນຜົນຮ້າຍທີ່ເກີດຂຶ້ນຈາກການບໍລິໂພກເຄື່ອງດື່ມທີ່ມີທາດເຫຼົ້າ,ຄ່າໃຊ້ຈ່າຍທີ່ບໍ່ຈຳເປັນ ແລະ ຜົນຮ້າຍອື່ນໆ. ເຈົ້າຄອງນະຄອນຫຼວງວຽງຈັນໄດ້ອອກຂໍ້ຕົກລົງ, ສະບັບເລກທີ: 1323/ຈນວ, ລົງວັນທີ 21 ທັນວາ 2018 ວ່າດ້ວຍມາດຕາການຫຼຸດຜ່ອນອຸບັດຕິເຫດ ແລະ ການຮັກສາຄວາມປອດໄພຕາມຖະໜົນ ທົ່ວນະຄອນຫຼວງວຽງຈັນ
ໃນມາດຕາທີ 16 ມາດຕະການຕໍ່ຜູ້ຂາຍເຄື່ອງດື່ມທີ່ມີທາດເຫຼົ້າ ກ່ອນເວລາ 16:00 ໂມງແລງ
- ບໍ່ໃຫ້ຂາຍເຄື່ອງດື່ມທີ່ມີທາດເຫຼົ້າກ່ອນເວລາ 16:00 ໂມງແລງ ຕາມມາດຕາ 30 ຂອງກົດໝາຍວ່າດ້ວຍການຄວບຄຸມເຄື່ອງດື່ມທີ່ມີທາດເຫຼົ້າ, ສະບັບເລກທີ 54/ສພຊ, ລົງວັນທີ 19 ທັນວາ 2014 ກຳນົດໄວ້.
- ໃຫ້ເລີ່ມກວດກາ ແລະ ປັບໄໝນັບຕັ້ງແຕ່ວັນທີ 01 ກໍລະກົດ 2019 ເປັນຕົ້ນໄປ, ອັດຕາການປັບໄໝໃຫ້ປະຕິບັດຕາມກົດໝາຍ, ລັດຖະບັນຍັດ, ດຳລັດ ແລະ ມະຕິສະພາປະຊາຊົນນະຄອນຫຼວງວຽງຈັນກຳນົດໄວ້.
ສຳລັບພະນັກງານ-ລັດຖະກອນຂອງພັກ-ລັດ ທີ່ລະເມີດມາດຕະການທີ່ກຳນົດໄວ້ໃນມາດຕາ 13, 14, 15 ແລະ ບໍ່ໃຫ້ຄວາມຮ່ວມມືແກ່ເຈົ້າໜ້າທີ່ແມ່ນໃຫ້ເຈົ້າໜ້າທີ່ຕຳຫຼວດຈະລາຈອນແຈ້ງໃຫ້ການຈັດຕັ້ງຂອງຜູ້ກ່ຽວສັງກັດຮັບຊາບ ແລະ ສຶກສາອົບຮົມ ຫຼື ປະຕິບັດວິໄນຕາມກົດໝາຍວ່າດ້ວຍພະນັກງານ-ລັດຖະກອນ ເຊິ່ງໄດ້ລະບຸໄວ້ໃນມາດຕາທີ 17.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ຂໍ້ຕົກລົງເຈົ້າຄອງນະຄອນຫຼວງວຽງຈັນ