ຝາກເຕືອນທີ່ໃຜຈະແລກປ່ຽນເງິນຕາ ທີ່ໃຊ້ໃນການຊື້ຂາຍຈຳນວນຫຼາຍຄວນລະວັງ ກຸ່ມມິດສາຊີບຕົວະເອົາເງິນແລ້ວບໍ່ໂອນກັບຄືກັບກໍລະນີນີ້.
ໃນວັນທີ 13 ກັນຍາ 2023 ຜູ້ໃຊ້ເຟສບຸກຊື່ ThiennaPha Bounvixay ໄດ້ໂພສວ່າ: ໃນວັນທີ 11 ກັນຍາ ຕົນ ແລະ ນ້ອງສາວໄປແລກປ່ຽນເງິນໂດລາ ເພື່ອຫວັງຈະນໍາເງິນໂດລາໄປຈ່າຍຄ່າລົດ ເມື່ອນັດກັນໄປແລກຢູ່ຮ້ານອາເມຊອນ ປຕທ ນາໄຊ ພໍໄປຮອດ 2 ຄົນນີ້ ຜູ້ຍິງກັບຜູ້ຊາຍ ກໍຍ້າຍນັ່ງຄົນລະໂຕະ ນ້ອງສາວຂ້ອຍເຂົ້າໄປສອບຖາມເພື່ອແລກເງິນ ພໍລົມກັນແລ້ວລາວໄດ້ເອົາໜັງສືຜ່ານແດນ ແລະ ບັດປະຈໍາໂຕຂອງລາວ ສະແດງໂຕພ້ອມກັບເລກບັນຊີທີ່ກົງກັນ ແລະ ກົງກັບໜ້າຂອງລາວເລີຍ, ພໍລົມກັນໄດ້ປະມານ 10 ນາທີ ນ້ອງສາວຂ້ອຍກໍໄດ້ໂອນເງິນໃຫ້ລາວ ຈຳນວນ 770 ລ້ານກີບ ແຕ່ລາວພັດວ່າລາວໂອນເງິນໄປໃຫ້ອີກຜູ້ໜຶ່ງ ແລ້ວຜູ້ທີ່ລາວໂອນໄປນັ້ນຍັງບໍ່ໂອນເງິນໂດລາມາ ຜ່ານໄປ 10 ປາຍນາທີ ທາງຂ້ອຍ ແລະ ນ້ອງສາວຂອງຂ້ອຍ ກໍເລີ່ມເອະໃຈແລ້ວວ່າອາດຈະຖືກຕົວະ ເພາະຕິດຕໍ່ຫາບຸກຄົນທີ 3 ກໍຄືຄົນທີລາວໂອນໄປນັ້ນບໍ່ໄດ້, ຫຼັງຈາກນັ້ນ ເລີຍຕິດຕໍ່ຫາທະນາຄານ ກໍຕິດຕໍ່ບໍ່ໄດ້ອີກ ພວກຂ້ອຍກໍພາລາວໄປຫາຕໍາຫຼວດເລີຍ.
ປັດຈຸບັນ ຜູ້ກ່ຽວ ແມ່ນຢູ່ໃນການດູແລຂອງເຈົ້າໜ້າທີ່ຕໍາຫຼວດ ກອງບັນຊາການ ປກສ ນະຄອນຫຼວງວຽງຈັນ.
ສຸດທ້າຍ ThiennaPha ຍັງກ່າວຕື່ມອີກວ່າ ຂໍໃຫ້ກໍລະນີຂ້ອຍກັບນ້ອງສາວຂອງຂ້ອຍເປັນກໍລະນີສຸດທ້າຍ ແລະ ເປັນສິ່ງເຕືອນໄພໃຫ້ກັບຫຼາຍໆຄົນ ແລະ ຫວັງທີ່ສຸດວ່າເຈົ້າໜ້າທີ່ຂອງພວກເຮົາ ຈະສາມາດດໍາເນີນຄະດີກັບບຸກຄົນນີ້ ແລະ ນໍາໄປເຖິງກຸ່ມແກ້ງຂະບວນການໃຫ້ໄດ້.
