ປັດຈຸບັນ ພົບເດັກນ້ອຍທີ່ຢູ່ໃນຊ່ວງອະນຸບານ ສ່ຽງມີພຶດຕິກຳທີ່ຄ້າຍຄືກັບອໍທິສຕິກຫຼາຍຂຶ້ນ ເຊິ່ງສາເຫດຫຼັກແມ່ນຍ້ອນການລ້ຽງລູກ ທີ່ເຮັດໃຫ້ລູກມີພຶດຕິກຳແບບນີ້.
ພຶດຕິກຳຄ້າຍຄື “ອໍທິສຕິກ” ແມ່ນຫຍັງ?
ພຶດຕິກຳຄ້າຍຄືອໍທິສຕິກ ຫຼື ອໍທິສຕິກທຽມ ເປັນພາວະຂາດການກະຕຸ້ນ ໃນການສື່ສານສອງທາງ ສົ່ງຜົນໃຫ້ເກີດຄວາມຜິດປົກກະຕິທາງການສື່ສານກັບຜູ້ອື່ນ ເນື່ອງຈາກພໍ່ແມ່ ຫຼື ຜູ້ລ້ຽງລູກ ຂາດການປະຕິສຳພັນກັບລູກເຊັ່ນ ບໍ່ໂອ້ລົມ ບໍ່ຫຼິ້ນກັບລູກ ເປັນຕົ້ນ, ແຕ່ໃຫ້ລູກຫຼິ້ນແຕ່ອຸປະກອນສື່ສານເຊັ່ນ ໂທລະສັບ ເຊິ່ງເປັນການສື່ສານແບບ One – Way Communication ຫຼື ການຮັບສານພຽງທາງດຽວ ຈຶ່ງສົ່ງຜົນໃຫ້ເດັກນ້ອຍເກີດຄວາມຜິດປົກກະຕິດ້ານພັດທະນາການທາງສັງຄົມ.
ອໍທິສຕິກ ຫຼື ອໍທິສຕິກທຽມ
ອໍທິສຕິກ ເກີດຈາກຄວາມຜິດປົກກະຕິທາງສະໝອງເດັກນ້ອຍຕັ້ງແຕ່ຢູ່ໃນທ້ອງແມ່ ໃນຂະນະທີ່ອາການອໍທິສຕິກທຽມ ເກີດຈາກການ “ຂາດການກະຕຸ້ນ” ແລະ ເຖິງວ່າທັງສອງຢ່າງຈະມີລັກສະນະທີ່ຄ້າຍຄືກັນ ແຕ່ເດັກນ້ອຍທີ່ເປັນອໍທິສຕິກທຽມ ຫາກໄດ້ຮັບການການຕຸ້ນ ທີ່ເໝາະສົມທາງໄລຍະເວລາສັ້ນໆ ກໍຈະສາມາດກັບມາເປັນເດັກນ້ອຍປົກກະຕິ.
ແຕ່ເດັກນ້ອຍທີ່ເປັນອໍທິສຕິກແທ້ ເຖິງວ່າຈະໄດ້ຮັບການກະຕຸ້ນພັດທະນາການ ແຕ່ກໍຍັງມີພຶດຕິກຳທີ່ແຕກຕ່າງຈາກເດັກນ້ອຍທົ່ວໄປ.
ອາການອໍທິສຕິກ
- ອາຍຸ 6 ເດືອນ ມີອາການ ບໍ່ຍິ້ມ ຫຼື ບໍ່ສະແດງອາລົມມ່ວນຊື່ນ
- ອາຍຸ 9 ເດືອນ ມີອາການ ບໍ່ເວົ້າ ບໍ່ປາກ ບໍ່ຍິ້ມ ບໍ່ມີສີໜ້າ ບໍ່ຕອບໂຕ້
- ອາຍຸ 12 ເດືອນ ມີອາການ ບໍ່ຫັນເວລາມີຄົນເອີ້ນຊື່ ບໍ່ຫຼິ້ນນ້ຳລາຍ
- ອາຍຸ 18 ເດືອນ ມີອາການ ບໍ່ມີການຫຼິ້ນສົມມຸດງ່າຍໆ ບໍ່ມີການໃຊ້ພາສາຄຳເວົ້າຮ່ວມກັບທ່າທາງ
ເດັກນ້ອຍທີ່ມີລັກສະນະເຫຼົ່ານີ້ ສ່ຽງເປັນອໍທິສຕິກ ເຊິ່ງຈະໃຫ້ຮູ້ຢ່າງຊັດເຈນ ຄວນປຶກສາແພດໝໍ.
ລ້ຽງລູກໃຫ້ຫ່າງໄກພຶດຕິກຳທີ່ຄ້າຍຄືອໍທິສຕິກ
- ເວົ້າ ໂອ້ລົມ ກັບລູກ ຢ່າງໜ້ອຍ 30 ນາທີ ຫາ 1 ຊົ່ວໂມງ ເພື່ອໃຫ້ເກີດການສື່ສານແບບ Two – Way Communication ໃຫ້ເດັກນ້ອຍຮຽນຮູ້ການປະຕິສຳພັນ ລະຫວ່າງ ຜູ້ຫໃຍ່ ອາຈານ ໝູ່.
- ບໍ່ໃຫ້ລູກຫຼິ້ນໂທລະສັບ ໃນຊ່ວງອາຍຸ 1,5 ປີ ທຳອິດ ຖ້າຫຼິ້ນຄວນບໍ່ໃຫ້ເກີນ 1 ຊົ່ວໂມງຕໍ່ມື້ ໂດຍຫຼີກລ່ຽງການໃຫ້ເດັກນ້ອຍຫຼິ້ນແບບບໍ່ມີຜູ້ໃຫຍ່ເບິ່ງ, ເສີມທັກສະດ້ວຍການຫຼິ້ນກັບລູກໃຫ້ຫຼາຍ ເພື່ອພັດທະນາສະໝອງ ແລະ ຮ່າງກາຍ.
ທີ່ມາ bangkokhospital