ຈາກການເຕີບໂຕໂດຍເຫັນການຕໍ່າຫູກທໍຜ້າໃນເຮືອນແຕ່ນ້ອຍເຮັດໃຫ້ ມາລາທິບ ແພງສຸວັນ ເກີດມີຄວາມຝັນໃນການສືບຕໍ່ມູນເຊື້ອການຕໍ່າຜ້າຈົກລາຍ ແລະ ດ້ວຍພອນສະຫວັນບວກກັບພອນສະແຫວງໃນການອອກແບບ ແລະ ຄວາມຄິດສ້າງສັນເຮັດໃຫ້ຜືນແພທຸກຢ່າງໃນຮ້ານສະກຸນລາວ ລ້ວນມີລວດລາຍສະເພາະ ເປັນລາຍເອກະລັກທີ່ມີແຕ່ໃນສະກຸນລາວເທົ່ານັ້ນ.

ມາລາທິບໄດ້ແຮງບັນດານໃຈໃນການຕັ້ງຊື່ຮ້ານມາຈາກວາລະສານສະບັບໜຶ່ງ ເຊິ່ງຕີພິມໃນໄລຍະທີ່ແມ່ຂອງມາລາທິບຍັງເປັນສາວ, ຄໍາວ່າສະກຸນລາວເປັນຄໍາທີ່ສາມາດສື່ເຖິງຄວາມໝາຍຂອງ ການອະນຸຮັກຜົນງານຫັດຖະກຳດ້ານຂອງຄົນລາວ ເຊິ່ງເປັນມູນເຊື້ອຂອງຄົນລາວ ໃຫ້ຍັງຄົງຢູ່, ສວຍງາມ, ມີຄວາມທັນສະໄໝທາງດ້ານລວດລາຍ ແຕ່ຍັງຄົງຮັກສາເອກະລັກຂອງແຜ່ນແພລາວໄວ້ ຄືຫົວໃຈຂອງແຜ່ນແພທຸກຜືນໃນຮ້ານ.

ເມື່ອເຮົາກ້າວເຂົ້າມາໃນຮ້ານສະກຸນລາວປຽບເໝືອນເຮົາກ້າວເຂົ້າມາໃນອີກໂລກໜຶ່ງ ຫຼື ອີກໜຶ່ງກາລະເວລາກໍວ່າໄດ້. ງານອອກແບບທຸກຊິ້ນງານແມ່ນງານສີມືລ້ວນໆ ເລີ່ມຕັ້ງແຕ່ການອອກແບບລວດລາຍການແຕ້ມແບບຈາກຈຸດໜຶ່ງຫາອີກຈຸດໜຶ່ງ ເພື່ອສ້າງຜົນງານໜຶ່ງໃນລາວຈົນເຖິງຂັ້ນຕອນສຸດທ້າຍເປັນສິ້ນສຳເລັດໃຫ້ທ່ານໄດ້ສວມໃສ່. ສິ້ນທຸກຜືນໃນຮ້ານແມ່ນຕໍ່າໂດຍແພຈາກຕ່າງປະເທດປະສົມປະສານກັບແພໄໝ ແລະ ແພຝ້າຍລາວ ແລະ ຈົກລວດລາຍດ້ວຍເສັ້ນໄໝຊະນິດພິເສດຈາກປະເທດຝຣັ່ງ. ມາລາທິບອອກແບບລວດລາຍຕ່າງໆຈາກຄວາມຄິດສ້າງສັນຂອງລາວ ໂດຍໃຊ້ສໍແຕ້ມເທື່ອລະຈຸດເທິງແຜ່ນເຈ້ຍຂອງລາວ, ເມື່ອການອອກແບບສຳເລັດລາວຈະລອງຈົກລວດລາຍນັ້ນດ້ວຍຕົວຂອງລາວເອງມີການປັບການປ່ຽນເສັ້ນຄວາມກວ້າງຄວາມຍາວຂອງລາຍຈົນເປັນດັ່ງທີ່ໃຈລາວຈິນຕະນາການແລ້ວຈິ່ງໄດ້ໃຫ້ຊ່າງໃນຮ້ານສານຕໍ່.

“ການຈົກລາຍຂອງຮ້ານເຮົາເປັນແບບສະເພາະ ເປັນເອກະລັກຂອງສະກຸນລາວເທົ່ານັ້ນ. ຖ້າທ່ານຊື້ສິ້ນຈາກຮ້ານເຮົາ  ຮັບຮອງວ່າທ່ານຈະບໍ່ເຫັນສິ້ນຜືນອື່ນຄ້າຍກັບຂອງທ່ານຢ່າງແນ່ນອນ” ກ່າວໂດຍມາລາທິບ.

ນອກຈາກການຈົກລາຍທີ່ເປັນເອກະລັກແລ້ວ, ສະກຸນລາວກໍເນັ້ນທາງດ້ານຄຸນນະພາບຂອງຜືນຜ້າສຳຄັນເທົ່າກັນ.

“ສຳລັບການຈົກລາຍນັ້ນ ເຮົາໄດ້ໃຊ້ເສັ້ນໄໝນໍາເຂົ້າຈາກຝຣັ່ງ ເນື່ອງຈາກຄຸນນະພາບສູງກວ່າເສັ້ນໄໝລາວ ແລະ ຈະສາມາດຈົກລາຍໄດ້ຄົມຊັດກວ່າ” ກ່າວຕື່ມໂດຍມາລາທິບ.

ແລະ ເຮົາສາມາດເຫັນໄດ້ຢ່າງຊັດເຈນວ່າລາຍສິ້ນທີ່ຈົກດ້ວຍເສັ້ນໄໝຝຣັ່ງ ແລະ ເສັ້ນໄໝລາວມີຄວາມແຕກຕ່າງກັນຢ່າງຊັດເຈນ ມີຄວາມລຽບກວ່າ ປານີດກວ່າ ແລະ ສີສັນຄົມຊັດກວ່າ ເຊິ່ງເຮັດໃຫ້ສະກຸນລາວກາຍເປັນຮ້ານທີ່ວາງໃຈຂອງວ່າທີ່ເຈົ້າສາວຫຼາຍໆທ່ານ ໃນການຕັດຊຸດພິເສດໃນມື້ສຳຄັນທີ່ສຸດຂອງຊີວິດ.

ທາງສະກຸນລາວຍັງຮັບບໍລິການອອກແບບຊຸດແຕ່ງງານສຳລັບຄູ່ບ່າວສາວທີ່ຕ້ອງການຊຸດເຊິ່ງເປັນລາຍສະເພາະຂອງຕົນເອງເຊິ່ງເປັນການອອກແບບລາຍໃໝ່ ແຕ່ລູກຄ້າທີ່ຕ້ອງການງານພິເສດນີ້ຕ້ອງມີການສັ່ງຈອງລ່ວງໜ້າກ່ອນ 6 ເດືອນ! ແລະ ເພື່ອໃຫ້ງານຂອງວ່າທີ່ຄູ່ແຕ່ງງານສະດວກສະບາຍຍິ່ງຂຶ້ນ, ສະກຸນລາວຍັງໃຫ້ບໍລິການພິມນາມບັດແລະໃຫ້ບໍລິການສະປາກະເປົ໋າພ້ອມ.

ແລະ ນີ້ຄືຍິງສາວທີ່ມີຄວາມຝັນອັນຍິ່ງໃຫຍ່, ເລີ່ມຈາກການເຕີບໃຫຍ່ກັບການຕໍ່າຜ້າກາຍມາເປັນນັກອອກແບບທີ່ສ້າງສັນຜົນງານທີ່ບໍ່ມີໃຜທຽບໄດ້.

ແຫຼ່ງຂໍ້ມູນ ແລະ ຮູບພາບ: ວາລະສານຈໍາປາເມືອງລາວ ສະບັບເດືອນພະຈິກ-ທັນວາ 2018