ວັດຊຽງຄວັນຈະໄດ້ຮັບການປັບປຸງ ແລະ ພັດທະນາຄືນໃໝ່

ບໍລິສັດທ່ອງທ່ຽວ ແລະ ການລົງທຶນສາກົນລາວ ຈຳກັດ ຈະເຂົ້າພັດທະນາວັດຊຽງຄວນ ຄືນໃໝ່ ດ້ວຍມູນຄ່າການລົງທຶນ 5 ລ້ານໂດລາ ມີໄລຍະສຳປະທານຍາວເຖິງ 30 ປີ.

ທ່ານ ນາງ ສ້ອຍສຸດາ ອິນເມືອງໄຊ, ຜູ້ອຳນວຍການບໍລິສັດ ທ່ອງທ່ຽວ ແລະ ການລົງທຶນສາກົນລາວ ຈຳກັດ ກ່າວວ່າ: ພວກເຮົາເຫັນວ່າສະຖານທີ່ທ່ອງທ່ຽວວັດຊຽງຄວນ ຢູ່ເມືອງຫາດຊາຍຟອງ ນະຄອນຫຼວງວຽງຈັນ ຍັງບໍ່ທັນໄດ້ຮັບການພັດທະນາໃຫ້ເປັນແຫຼ່ງທ່ອງທ່ຽວທາງປະຫວັດສາດ ທີ່ຫຼາກຫຼາຍ. ສະນັ້ນ, ບໍລິສັດພວກເຮົາມີຄວາມສົນໃຈ ແລະ ສຶກສາຄວາມເປັນໄປໄດ້ດ້ວຍການສຳຫຼວດ ແລະ ວາງແຜນພັດທະນາສະຖານທີ່ດັ່ງກ່າວຄືນໃໝ່ ທັງເປັນການສ້າງລາຍຮັບດ້ານການທ່ອງທ່ຽວໃຫ້ແກ່ເມືອງນຳອີກ.

ທ່ານກ່າວຕື່ມວ່າ: ເມື່ອເປັນແນວນັ້ນ ທາງບໍລິສັດພວກເຮົາກໍ່ຂໍອະນຸຍາດຈາກອຳນາດການປົກຄອງເມືອງ ດ້ວຍການລົງທຶນເອງທັງໝົດເພື່ອພັດທະນາຄືນໃໝ່ ດ້ວຍຮູບການເຊົ່າສຳປະທານ 30 ປີ ມີມູນຄ່າການລົງທຶນທັງໝົດ 5 ລ້ານໂດລາ ປະກອບມີ 7 ໜ້າວຽກດັ່ງນີ້:

1). ກໍ່ສ້າງປະຕູໂຂງ ແລະ ກຳແພງອ້ອມສວນທີ່ເປັນເອກະລັກທາງດ້ານວັດທະນະທຳ; 2). ປະຕິສັງຂອນພຣະພຸດຣູບ ແລະ ວັດຖຸບູຮານ ເພື່ອໃຫ້ຄົງຢູ່ ແລະ ສວຍງາມຕາມສະພາບເດີມ;3). ປັບປຸງ ແລະ ກໍ່ສ້າງເສັ້ນທາງພາຍໃນສວນ;4). ກໍ່ສ້າງສວນສາທາລະນະ, ປູກຫຍ້າ ແລະ ຕົ້ນໄມ້ປະດັບ; 5). ກໍ່ສ້າງຮ້ານຂາຍເຄື່ອງທີ່ລະນຶກ, ຮ້ານອາຫານ, ເວທີສະແດງ ເພື່ອຮັບໃຊ້ແຂກທີ່ມາທ່ຽວພາຍໃນສວນ;6). ກໍ່ສ້າງຫ້ອງນໍ້າສະອາດ;7). ປັບປຸງສະຖານທີ່ຈອດລົດ ແລະ ສິ່ງອຳນວຍຄວາມສະດວກອື່ນໆ.

ທ່ານ ບຸນຕົງ ພອນສະຫວັດ, ຫົວໜ້າຫ້ອງການແຜນການ ແລະ ການລົງທຶນ ປະຈຳເມືອງຫາດຊາຍຟອງ ໃນນາມເປັນຄູ່ສັນຍາສອງຝ່າຍ ໃຫ້ຮູ້ວ່າ: ໃນບົດວິພາກເສດຖະກິດຂອງບໍລິສັດທີ່ສະເໜີມານີ້ທາງພາກສ່ວນກ່ຽວຂ້ອງຂອງເມືອງກໍ່ເຫັນດີເປັນເອກະພາບໃຫ້ບໍລິສັດເຂົ້າສຳປະທານ ເພື່ອພັດທະນາສິ່ງທີ່ມີຢູ່ໃຫ້ມີຄວາມສວຍງາມຍິ່ງຂຶ້ນ. ສຳລັບການດຳເນີນໂຄງການແບ່ງອອກເປັນ 4 ໄລຍະ ເປັນຕົ້ນແມ່ນ: ການສ້າງບົດວິພາກເສດຖະກິດ-ເຕັກນິກ; ການອອກແບບລະອຽດກ່ຽວກັບແຜນຜັງການກໍ່ສ້າງ; ການຂໍອະນຸຍາດດຳເນີນໂຄງການ ແລະ ການຈັດຕັ້ງປະຕິບັດໂຄງການ.

ພິທີລົງນາມເຊັນສັນຍາການສຳປະທານສວນວັດທະນະທຳຊຽງຄວນ ຈັດຂຶ້ນ ທີ່ສວນວັດທະນະທຳຂອງບໍລິສັດອິນແປງກຣຸບ ໂດຍເປັນການລົງນາມຮ່ວມກັນຂອງທ່ານ ບຸນຕົງ ພອນສະຫວັດ ຫົວໜ້າຫ້ອງການແຜນການ ແລະ ການລົງທຶນ ປະຈຳເມືອງຫາດຊາຍຟອງ ກັບ ທ່ານ ນາງ ສ້ອຍສຸດາ ອິນເມືອງໄຊ, ຜູ້ອຳນວຍການບໍລິສັດ ໂດຍຊ້ອງໜ້າທ່ານ ບຸນທາມ ພຸດທະວົງສາ ເຈົ້າເມືອງໆຫາດຊາຍຟອງ, ມີຜູ້ຕາງໜ້າຈາກພະແນກແຜນການ ນ.ວ, ພະແນກການເງິນ ແລະ ຂະແໜງການກ່ຽວຂ້ອງເຂົ້າຮ່ວມ.

 

ແຫລ່ງຂ່າວ: ຫນັງສືພິມ ເສດຖະກິດ-ການຄ້າ

1 COMMENT

  1. ຢາກໃຫ້ທາງພາກລັດເຮັດເອງເພາະເວລາເອກະຊົນສຳປະທານສ່ວນຫຼາຍແມ່ນຫາເງິນເຂົ້າກະເປົາຈົນເຮັດປະຊາຊົນລາວຈົມວ່າຕາມສະພາກາເຟຕ່າງໆ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.