ກະຊວງກະສິກຳ ແລະ ປ່າໄມ້ ໄດ້ຕັ້ງເປົ້າຜະລິດກາເຟເປັນສິນຄ້າ ໃຫ້ໄດ້ຫຼາຍກວ່າຈຳນວນ 120.000 ໂຕນ ຮອດປີ 2020 ແລະ ເພີ່ມເປັນຈຳນວນ 280.000 ໂຕນ ຮອດປີ 2025 ໂດຍຈະສຸມໃສ່ການຍົກລະດັບ ແລະ ສົ່ງເສີມການຜະລິດ ໃຫ້ໄດ້ມາດຕະຖານກະສິກຳອິນຊີ ແລະ ກະສິກຳທີ່ດີ ໄປຄ່ຽງຄູ່ກັບການປູກກາເຟທີ່ມີຄຸນລັກສະນະສະເພາະຂອງທ້ອງຖິ່ນ ກໍ່ຄືຢູ່ພາກເໜືອຈຳນວນໜຶ່ງກຳລັງປູກ ແລະ ບາງແຂວງບາງເຂດກຳລັງທົດລອງ ເຫັນວ່າຢູ່ຫຼາຍແຂວງມີຄວາມເໝາະສົມ ແລະ ໄດ້ຮັບຜົນສຳເລັດຄາດວ່າຮອດປີ 2020-2025 ເນື້ອທີ່ປູກກາເຟຈະເພີ່ມຂຶ້ນຫຼາຍສົມຄວນ.
ແຫຼ່ງຂ່າວຈາກກະຊວງກະສິກຳ ແລະ ປ່າໄມ້ ໃຫ້ຮູ້ວ່າ: ປັດຈຸບັນ ການຜະລິດສິນຄ້າໂດຍສະເພາະກາເຟ ເຫັນວ່າມີການຂະຫຍາຍຕົວ ແລະ ເພີ່ມຂຶ້ນເປັນກ້າວໆ ຖ້າທຽບໃສ່ປີ 2006 ຄື: ສາມາດບັນລຸຫຼາຍກວ່າ 87.000 ໂຕນ ເພີ່ມຂຶ້ນ 2 ເທົ່າ ສຳລັບເນື້ອທີ່ປູກກາເຟເພື່ອຜະລິດເປັນສິນຄ້າ ສ່ວນໃຫຍ່ແມ່ນຢູ່ເຂດພູດອຍ ແລະ ພູພຽງ ຕົ້ນຕໍແມ່ນຢູ່ພູພຽງບໍລິເວນເປັນຫຼັກ ເຊັ່ນ: ຢູ່ເມືອງປາກຊ່ອງ ເມືອງບາຈຽງ ແຂວງຈຳປາສັກ ເມືອງເລົ່າງາມ ແຂວງສາລະວັນ ເມືອງທ່າແຕງ ແຂວງເຊກອງ ເຊິ່ງມີເນື້ອທີ່ລວມທັງໝົດປະມານ 130.000 ເຮັກຕາ.
ແຫລ່ງຂ່າວ: ວຽງຈັນໃໝ່