ໜັງສືພິມວຽງຈັນທາມລາຍງານເມື່ອວັນທີ 10 ເມສາ 2020 ນີ້ວ່າ ອີງຕາມໜັງສືແຈ້ງການຂອງພະແນກພົວພັນຕ່າງປະເທດ ແຂວງ ຮ່າຕິ້ງ ສສ ຫວຽດນາມ ສະບັບເລກທີ 238/SNgV-LSBG ລົງວັນທີ 7 ເມສາ 2020 ແລະ ໜັງສືລາຍງານຈາກສະຖານກົງສູນໃຫ່ຍ ແຫ່ງ ສປປ ລາວ ປະຈຳ ນະຄອນດານັງ ສສ ຫວຽດນາມ ສະບັບເລກທີ 136/ກສ.ດນ, ລົງວັນທີ 8 ເມສາ 2020 ໃຫ້ຮູ້ວ່າໄດ້ມີ ນັກສຶກສາລາວ ຈຳນວນ 151 ຄົນ ໄດ້ລັກ ອອກຈາກຫໍພັກຂອງໂຮງຮຽນ ເພື່ອເດີນ ທາງກັບ ສປປ ລາວ ຊຶ່ງນັກສຶກສາດັ່ງກ່າວ ໄດ້ຮຽນຢູ່ 3 ສະຖາບັນສຶກສາຄື: ມະຫາວິທະຍາໄລ ຮ່າຕິ້ງ ຈຳນວນ 70 ຄົນ, ວິທະຍາໄລແພດ ຮ່າຕິ້ງ ຈຳນວນ 53 ຄົນ ແລະ ວິທະຍາໄລເຕັກນິກ ຫວຽດ-ເຢຍລະມັນ 28 ຄົນ.
ໃນຈໍານວນດັ່ງກ່າວເປັນນັກສຶກສາຈາກແຂວງຕ່າງໆ ດັ່ງນີ້ ແຂວງຄໍາມ່ວນ 52 ຄົນ, ຊຽງຂວາງ 26 ຄົນ, ນະຄອນຫຼວງວຽງຈັນ 18 ຄົນ, ຈໍາປາສັກ 12 ຄົນ, ສະຫວັນນະເຂດ ແລະ ວຽງຈັນ ແຂວງລະ 10 ຄົນ, ໄຊສົມບູນ 9 ຄົນ, ບໍລິຄໍາໄຊ ແລະ ສາລະວັນ ແຂວງລະ 3 ຄົນ, ໄຊຍະບູລີ, ຜົ້ງສາລີ ແລະ ຫົວພັນ ແຂວງລະ 2 ຄົນ, ອັດຕະປື ແລະ ຫຼວງພະບາງ ແຂວງລະ 1 ຄົນ.
ການກັບມາດັ່ງກ່າວແມ່ນ ເປັນການລະເມີດຄໍາສັ່ງ, ແຈ້ງການ ແລະ ລະບຽບ ຂອງ ລັດຖະບານ ສສ ຫວຽດນາມ ແຂວງ ຮ່າຕີ່ງ ແລະ ສະຖານການສຶກສາ ກ່ຽວກັບມາດຕະການສະກັດກັ້ນ, ຄວບຄຸມ ແລະ ແກ້ໄຂ ການລະບາດ ພະຍາດອັກເສບປອດຈາກ ເຊື້ອຈຸລະໂລກສາຍພັນໃໝ່ ໂຄວິດ-19.
ທ່ານ ຮສ ປອ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະ ກິລາ ໄດ້ຖະແຫຼງຂ່າວຕໍ່ສື່ມວນ ໃນວັນທີ 9 ເມສາ 2020 ວ່າ ລັດຖະບານມີຄວາມເປັນຫ່ວງ ທີ່ນັກນັກສືກສາລາວຈໍານວນໜຶ່ງຢູ່ແຂວງ ຮ່າຕິ້ງ ສສ ຫວຽດນາມ ລັກອອກຈາກຫໍພັກ ແລະ ກັບຄືນປະເທດ.
ກະຊວງສຶກສາທິການ ແລະ ກິລາ ຈຶ່ງອອກແຈ້ງການດັ່ງນີ້: ໃຫ້ພະແນກສຶກສາທິການ ແລະ ກິລາແຂວງ/ນະຄອນຫຼວງ ລາຍງານ ການນຳຂອງພາກສ່ວນຕົນເອງ, ປະສານສົມທົບພະແນກພົວພັນຕ່າງປະເທດແຂວງ ແລະ ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄ ວິດ-19 ຢູ່ຂັ້ນທ້ອງຖິ່ນກ່ຽວກັບສະພາບນັກສຶກສາລາວ ທີ່ກຳລັງສຶກສາຢູ່ ສສ ຫວຽດນາມ ແລະ ກັບມາປະເທດລາວ, ຮຽກຮ້ອງໃຫ້ພໍ່ແມ, ຜູ້ປົກຄອງຈົ່ງໃຫ້ການຮ່ວມມືອົບຮົມລູກຫຼານຜູ້ທີ່ບໍ່ທັນກັບມາລາວ ຈົ່ງປະຕິບັດຄຳສັ່ງ ແລະ ກົດໝາຍຂອງເຈົ້າພາບ ກໍ່ຄືຄຳສັ່ງນາຍົກລັດຖະມົນຕີ ວ່າດ້ວຍການ ເພີ່ມທະວີມາດຕະການສະກັດກັ້ນ, ກັນການ ລະບາດ, ຄວບຄຸມ ແລະ ກຽມພ້ອມທຸກ ດ້ານເພື່ອຕ້ານພະຍາດໂຄວິດ-19.
ສະເພາະນັກສຶກສາລາວທີ່ກັບມາແລ້ວໃຫ້ປະຕິບັດຕາມຄຳສັ່ງຂອງຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຢ່າງເຂັ້ມງວດ, ໃຫ້ນັກສຶກສາລາວທີ່ກຳລັງສືບຕໍ່ສຶກສາຢູ່ສະຖາບັນສຶກສາຕ່າງໆ ຢູ່ ສສ ຫວຽດນາມ ໃຫ້ສືບຕໍ່ຢູ່ພາຍໃຕ້ການຄຸ້ມຄອງ ຂອງສະຖາບັນການສຶກສານັ້ນໆ, ສຳລັບນັກສຶກສາລາວ ທີ່ກຳລັງສຶກສາຢູ່ປະເທດອື່ນໆ ນອກຈາກ ສສ ຫວຽດນາມ ແມ່ນໃຫ້ສືບຕໍ່ປະຕິບັດຕາມທິດຊີ້ນຳຂອງລັດຖະບານ, ສະຖານທູດລາວ ແລະ ມາດຕະການປ້ອງກັນຂອງ ປະເທດເຈົ້າພາບຢ່າງເຂັ້ມງວດ.
ຮຽບຮຽງຂ່າວ: ພຸດສະດີ