ເພື່ອສ້າງພື້ນຖານບາດລ້ຽວໃໝ່ຮັບປະກັນໃຫ້ແກ່ສະຖຽນລະພາບທາງດ້ານການເມືອງສັງຄົມມີຄວາມເປັນລະບຽບຮຽບຮ້ອຍຄວາມທຸກຍາກຂອງປະຊາຊົນໄດ້ຮັບການແກ້ໄຂຢ່າງທົ່ວເຖິງພັດທະນາປະເທດຊາດຫຼຸດພົ້ນອອກຈາກສະພາວະດ້ອຍພັດທະນາໃນປີ 2020 ກ້າວເຂົ້າສູ່ປະເທດທີ່ກຳລັງພັດທະນາໂດຍຊຸກຍູ້ການຂະຫຍາຍຕົວຂອງເສດຖະກິດຕາມທິດຍືນຍົງທີ່ມີການຄຸ້ມຄອງ ແລະນຳໃຊ້ຊັບພະຍາກອນທຳມະຊາດ ຢ່າງມີປະສິດທິຜົນທັງນີ້ໃນ 5 ປີ ຕໍ່ໜ້າລັດມີຄວາມຕ້ອງການທຶນຈຳນວນ 2 ຮ້ອຍກວ່າຕື້ກີບເພື່ອນຳໃຊ້ເຂົ້າໃນການພັດທະນາດ້ານຕ່າງໆຫຼຸດລົງຈາກ 5 ປີກ່ອນ 25 ພັນຕື້ກີບ.
ອີງຕາມຄາດໝາຍສູ້ຊົນຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ຮູ້ວ່າເພື່ອເຮັດໃຫ້ເສດຖະກິດຂະ ຫຍາຍຕົວຢ່າງຕໍ່ເນື່ອງສະເລ່ຍ 7,5% ຕໍ່ ປີຂຶ້ນໄປໃນໄລະຍະ 5 ປີຕໍ່ໜ້າ(2016-2020) ລັດຖະບານມີຄວາມຕ້ອງການທຶນເຂົ້າໃນການພັດທະນາຈຳນວນ 223 ພັນຕື້ກີບ ຫຼື ປະມານ 27 ຕື້ໂດລາສະຫະລັດກວມເອົາ 30% ຂອງລວມຍອດມູນຄ່າຜະລິດຕະພັນພາຍໃນການລົງທຶນ ພາຍໃນກວມປະມານ 9-11% ຂອງການລົງທຶນລວມການລົງທຶນຈາກການຊ່ວຍເຫຼືອລ້າ ແລະກູ້ຢືມ ກວມປະມານ 12-16% ນອກນີ້ຍັງມີການລົງທຶນຂອງເອກະຊົນພາຍໃນ-ຕ່າງປະເທດກວມປະມານ 54-57% ແລະຍັງມີກອງທຶນຈາກລະບົບການເງິນ-ເງິນຕາກວມປະມານ19-21% ຂອງການລົງທຶນທັງໝົດ.
ທັງໝົດນີ້ກໍ່ເພື່ອປະກອບສ່ວນໃນການແກ້ໄຂຄວາມທຸກຍາກຂອງປະຊາຊົນໃຫ້ຫຼຸດລົງຢູ່ລະດັບຕ່ຳກວ່າ 10% ຂອງປະຊາກອນທີ່ຄາດວ່າຈະມີທັງໝົດ 7,08 ລ້ານຄົນໃນ ປີ 2020 ໃນນັ້ນ ຈະເປັນກຳລັງແຮງງານທັງໝົດປະມານ 4,41 ລ້ານຄົນ ໃນຂະແໜງກະສີກຳປະມານ 2,8 ລ້ານຄົນອຸດສະຫະກຳ 05,6 ແສນຄົນ ແລະຂະແໜງບໍລິການປະມານ 1,05 ລ້ານຄົນ.
ແນວໃດກໍດີ ຈາກຂໍ້ມູນລັດຖະບານໃຫ້ຮູ້ວ່າ: ປີ 2015 ຈຳນວນປະຊາກອນ ທົ່ວປະເທດມີທັງໝົດ 6,49 ລ້ານຄົນ ໃນນັ້ນມີກຳລັງແຮງງານ 3,8 ລ້ານຄົນ ຊຶ່ງໂຄງປະກອບໄດ້ຄ່ອຍໆຫັນໄປຕາມ ທິດການຫັນເປັນອຸດສະຫະກຳ ແລະທັນສະໄໝຂຶ້ນເທື່ອລະກ້າວການລົງທຶນທົ່ວສັງຄົມໃນໄລຍະ 5 ປີ ຜ່ານມາ(2011-2015) ໄດ້ບັນລຸມູນຄ່າສູງກ່ວາ 248 ພັນຕື້ກວ່າກີບ ລື່ນແຜນການກຳນົດໄວ້ ອັນໄດ້ເປັນສ່ວນໜຶ່ງເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການຍົກລະດັບສູງຂຶ້ນ ໂດຍໃນປີ 2015 ຄອບຄົວທຸກຍາກຍັງເຫຼືອພຽງ 6,59% ຂອງຄອບຄົວທັງໝົດແລະ 89,6% ຂອງຄອບຄົວທັງໝົດແມ່ນໄດ້ຊົມໃຊ້ໄຟຟ້າສ່ວນດ້ານອື່ນໆກໍໄດ້ຮັບການປັບປຸງຍົກລະດັບຂຶ້ນໃຫ້ພຽງພໍກັບຄວາມຕ້ອງການເທື່ອລະກ້າວ.
ທີ່ມາ: ເສດຖະກິິດ-ສັງຄົມ