ອົງການອະນາໄມໂລກອອກມາຮຽກຮ້ອງໃຫ້ທົ່ວໂລກຢຸດການນຳໃຊ້ໄຂມັນທຣານສ໌ ໃນອຸດສາຫະກຳອາຫານພາຍໃນປີນີ້ ເນື່ອງຈາກ 5 ພັນລ້ານຄົນມີຄວາມສ່ຽງທີ່ຈະເປັນໂຣກຫົວໃຈເພີ່ມຂຶ້ນຈາກໄຂມັນທຣານສ໌.
ອົງການອະນາໄມໂລກ (WHO) ເປີດເຜີຍວ່າ ປະຊາກອນ 5 ພັນລາ້ນຄົນທົ່ວໂລກ ມີຄວາມສ່ຽງເປັນໂຣກຫົວໃຈເພີ່ມຫຼາຍຂຶ້ນຈາກໄຂມັນທຣານສ໌ ພ້ອມທັງຮຽກຮ້ອງໃຫ້ປະເທດຕ່າງໆໃສ່ໃຈກ່ຽວກັບບັນຫາສຸຂະພາບນີ້ໃຫ້ຫຼາຍຂຶ້ນ.
ໂດຍກ່ອນໜ້ານີ້ໃນປີ 2018 ອົງການປະນາໄມໂລກ ໄດ້ຮຽກຮ້ອງໃຫ້ກຳຈັດໄຂມັນທຣານສ໌ໃຫ້ໝົດໄປຈາກອຸດສາຫະກຳອາຫານໂລກພາຍໃນປີ 2023 ເນື່ອງຈາກມີຫຼັກຖານຢັ້ງຢືນວ່າ ໄຂມັນທຣານສ໌ເປັນສາເຫດການຂອງເສຍຊີວິດກ່ອນໄວອັນຄວນ ຂອງປະຊາກອນປະມານ 500.000 ຄົນໃນທຸກໆປີ.
ຜູ້ອຳນວຍການອົງການອະນາໄມໂລກລະບຸວ່າ ໄຂມັນທຣານສ໌ແມ່ນສານເຄມີເປັນພິດທີ່ເປັນອັນຕະລາຍເຖິງຊີວິດ ແລະ ມັນບໍ່ຄວນຢູ່ໃນອາຫານ.
ພົບວ່າມີ 60 ປະເທດທົ່ວໂລກທີ່ມີນະໂຍບາຍກຳຈັດໄຂມັນທຣານສ໌ຄວບຄຸມປະຊາກອນ 3.400 ລ້ານຄົນ ແລະ ໃນຈຳນວນດັ່ງກ່າວມີ 43 ປະເທດທົ່ວໂລກ ມີປະຊາກອນລວມ 2.800 ລ້ານຄົນ ທີ່ມີການບັງຄັບໃຊ້ນະໂຍບາຍໃນເລື່ອງດັ່ງກ່າວຢ່າງດີ ສ່ວນໃຫຍ່ຢູ່ໃນໂຊນເອີຣົບ ແລະ ອາເມຣິກາ.
ແຕ່ຍັງມີປະຊາກອນອີກ 5 ພັນລ້ານຄົນໃນຫຼາຍປະເທດ ທີ່ບໍ່ມີກົດໝາຍ ຫຼື ນະໂຍບາຍປົກປ້ອງປະຊາຊົນຈາກໄຂມັນທຣານສ໌.
ລາຍງານລະບຸວ່າ ມີ 16 ປະເທດ ທີ່ມີອັດຕາການເສຍຊີວິດການໂຣກຫົວໃຈທີ່ຄາດວ່າເກີດຈາກໄຂມັນທຣານສ໌ ແລະ ມີ 9 ປະເທດທີ່ບໍ່ມີນະໂຍບາຍເລື່ອງໄຂມັນທຣານສ໌ຢ່າງຈິງຈັງເຊັ່ນ ອົດສະຕຣາລີ ອາເຊີໄບຈານ ພູຖານ ເອກວາດໍ ເອຢິບ ອີຣານ ເນປານ ປາກິດສະຖານ ແລະ ເກົາຫຼີໃຕ້.
ແຫຼ່ງຂ່າວ The Star