ພົບນັກກິລາຕິດເຊື້ອໂຄວິດ-19 ລະຫວ່າງເກັບໂຕຢູ່ທີ່ໂຕກຽວ ກຽມພ້ອມກິລາໂອລິມປິກ2020

0
367

ຕາມລາຍງານຂອງສໍານັກຂ່າວ thairath ລາຍງານວ່າ ວັນທີ 18 ກໍລະກົດ 2021 ສະມາຄົມບານເຕະແອບຟຣິກາໃຕ້ ອອກມາຢືນຢັນວ່າ ທາບິໂຊ ມອນຍາເນ ແລະ ຄາໂມເຮໂລ ມາລັດຊີ 2 ນັກບານເຕະທີມຊາດແອບຟຣິກາໃຕ້ ຊຸດໂອລິມປິກເກມ 2020 ຕິດເຊື້ອໂຄວິດ-19 ຫຼັງຈາກເດີນທາງເຖິງຍີ່ປຸ່ນເມື່ອວັນສຸກທີ 16 ກໍລະກົດທີ່ຜ່ານມາ ແລະ ເຂົ້າພັກໃນໝູ່ບ້ານນັກກິລາເປັນທີ່ຮຽນຮ້ອຍແລ້ວ.

ອີກລາຍທີ່ເປັນຜູ້ຕິດເຊື້ອໃນທີມບານເຕະຊາຍ ຂອງທີມຊາດແອບໂຟຣິກາໃຕ້ ຄື ມາຣິໂອ ມາຊາ ນັກວິເຄາະວິດີໂອປະຈໍາທີມ ເຊິ່ງມີຜົນການກວດອອກມາເປັນບວກເມື່ອວັນເສົາ ທີ 17 ກໍລະກົດ ທີ່ຜ່ານມາ ເຮັດໃຫ້ຄົນອື່ນໆ ພາຍໃນທີມຕ້ອງເຂົ້າສູ່ຂະບວນການກັກໂຕ ເພື່ອລໍຖ້າຜົນການກວດເພີ່ມຕື່ມອີກຄັ້ງ ສ່ວນທັງ 3 ຄົນທີ່ຕິດເຊື້ອຕອນນີ້ໄດ້ກັກໂຕຢູ່ໃນຫ້ອງຂອງຕົນເອງ ໂດຍທີ່ຝ່າຍຈັດການແຂ່ງຂັນຈະດູແລເລື່ອງການສົ່ງອາຫານ ແລະ ນໍ້າດື່ມ.

ລ່າສຸດ, ວັນທີ 18 ກໍລະກົດ ຝ່າຍຈັດການແຂ່ງຂັນໂອລິມປິກ ໂຕກຽວເກມ 2020 ລາຍງານວ່າ ພົບຜູ້ຕິດເຊື້ອໂຄວິດ-19 ລາຍໃໝ່ເພີ່ມອີກ 10 ຄົນທີ່ກ່ຽວຂ້ອງກັບການແຂ່ງຂັນ ທັງສື່ມວນຊົນ, ຄົນງານ ແລະ ບຸກຄະລາກອນອື່ນໆ ໂດຍມີ 1 ລາຍທີ່ເປັນນັກກິລານອກເໜືອຈາກ 2 ນັກກິລາບານເຕະທີມຊາດແອບຟຣິກາໃຕ້ ແຕ່ບໍ່ໄດ້ພັກຢູ່ໃນໝູ່ບ້ານນັກກິລາ, ສ່ວນວັນທີ 17 ກໍລະກົດ ມີຜູ້ຕິດເຊື້ອລາຍໃໝ່ລວມທັງໝົດ 15 ຄົນ.

ສະຖານນະການໂຄວິດ-19 ໃນກຸງໂຕກຽວຍັງໜ້າເປັນຫ່ວງ ເມື່ອຍອດຜູ້ຕິດເຊື້ອລາຍໃໝ່ເກີນ 1,000 ຄົນ ຕິດຕໍ່ກັນ 4 ມື້ແລ້ວ, ສ່ວນຍອດຜູ້ຕິດເຊື້ອໂຄວິດ-19 ສະສົມທີ່ກ່ຽວຂ້ອງກັບໂອລິມປິກເກມ 2020 ນັບຕັ້ງແຕ່ວັນທີ 1 ລະກົດ ລ່າສຸດເພີ່ມຂຶ້ນມາຢູ່ທີ່ 55 ຄົນແລ້ວ ໃນຂະນະທີ່ເຫຼືອອີກພຽງ 4 ມື້ ກໍຈະເປີດພິທີຢ່າງເປັນທາງການໃນວັນທີ 23 ກໍລະກົດ 2021.