ພາຍຸໄຕ້ຝຸ່ນ ໂມລາເວ ພາດຜ່ານພາກໃຕ້ເຮັດໃຫ້ຝົກໜັກ

ໍກົມອຸຕຸນິຍົມ ແລະ ອຸທົກກະສາດ ແຈ້ງເຕືອນໄພພາຍຸໄຕ້ຝຸ່ນ ໂມລາເວ (TY MOLAVE) ແຕ່ໄລຍະວັນທີ 28 – 29 ຕຸລາ 2020 ສະບັບທີ 3: ໃນເວລາ 16 ໂມງ 45 ນາທີ ຂອງວັນທີ 28 ຕຸລານີ້ ມີຈຸດສູນກາງຢູ່ເສັ້ນຂະໜານທີ 15.2 ອົງສາເໜືອ ແລະ ເສັ້ນແວງທີ 107.8 ອົງສາຕາເວັນອອກ ກຳລັງເຄື່ອນທີ່ພັດຜ່ານພາກໃຕ້ຂອງ ສປປ ລາວ ດ້ວຍຄວາມໄວ 25 ກິໂລແມັດຕໍ່ຊົ່ວໂມງ.

ຄາດຄະເນວ່າ, ພາຍຸຫົວນີ້ ຈະອ່ອນກໍາລັງລົງເປັນພາຍຸດີເປູ່ຊັ້ນ ແລະ ຍ່ອມຄວາມກົດດັນອາກາດຕໍ່າ ເຄື່ອນທີ່ຜ່ານປະເທດໄທ ໃນຄ່ຳຄືນນີ້ ຫາ ວັນທີ 29 ຕຸລາ 2020 ເຊິ່ງຈະເຮັດໃຫ້ມີຝົນຕົກໜັກ ຫາ ໜັກຫຼາຍ ພ້ອມມີລົມພັດແຮງຢູ່ບັນດາແຂວງ ພາກກາງ ແລະ ພາກໃຕ້ ໃນໄລຍະວັນທີ 28 ຫາ 29 ຕຸລາ 2020 ນີ້.

ຄາດຄະເນປະລິມານນ້ຳຝົນລວມ ຢູ່ບັນດາແຂວງ ສະຫວັນນະເຂດ, ສາລະວັນ, ເຊກອງ, ຈຳປາສັກ ແລະ ອັດຕະປື ຈະມີປະມານ 100 – 150 ມມ ຕໍ່ມື້, ພ້ອມດຽວກັນນີ້ ອີງຕາມການລາຍງານສະພາບລະດັບນ້ຳເຊກອງໄດ້ສູງຂຶ້ນຢ່າງຕໍ່ເນື່ອງ ເຊິ່ງຄາດຄະເນວ່າ ລະດັບນ້ຳເຊກອງ ຢູ່ເມືອງລະມາມ ແຂວງເຊກອງ ຈະສູງຂຶ້ນຮອດ 10 – 12 ແມັດ ແລະ ລະດັບນ້ຳຢູ່ຈຸດເວີນແຄນ ແຂວງອັດຕະປື ຈະສູງຂຶ້ນຮອດ 15 ແມັດ.

ແຈ້ງເຕືອນເຖິງປະຊາຊົນບັນດາເຜົ່າ ແລະ ອົງການປົກຄອງທ້ອງຖິ່ນ ທຸກພາກສ່ວນທີ່ອາໃສຢູ່ແຂວງ ພາກກາງ ແລະ ພາກໃຕ້ເຊັ່ນ: ແຂວງ ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ເຊກອງ, ຈຳປາສັກ ແລະ ອັດຕະປື ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ ແລະ ລະດັບນ້ຳຂຶ້ນສູງຢ່າງກະທັນຫັນ ທີ່ຈະເຮັດໃຫ້ມີນ້ຳຖ້ວມຊູ, ນ້ຳຖ້ວມອັ່ງ, ຕົ້ນໄມ້ຫັກລົ້ມ ແລະ ເຮືອນຊານເປ່ເພ, ພ້ອມນີ້ໃຫ້ຍົກຍ້າຍວັດຖຸສິ່ງຂອງ, ຜົນລະປູກ ແລະ ສັດລ້ຽງໄປໄວ້ບ່ອນທີ່ປອດໄພ.

ຮຽບຮຽງຂ່າວ: ພດສະດີ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.