ຂປລ. ວັນທີ 18 ຕຸລາ 2016 ທີ່ບ້ານພັກໜອງບອນ ນະຄອນຫລວງວຽງຈັນ, ທ່ານ ນາງ ຄຳເມີງ ວໍລະຈິດ ພັນລະຍາ ປະທານປະເທດ ແຫ່ງ ສປປ ລາວ. ໄດ້ໃຫ້ກຽດຕ້ອນຮັບ ການເຂົ້າຢ້ຽມຢາມຂອງ ຄະນະສະຫະພັນແມ່ຍິງ ສສ ຫວຽດນາມ ນຳໂດຍ ທ່ານ ນາງ ຫງວຽນ ຫງວຽດ ງາ ພັນລະຍາທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ສສ ຫວຽດນາມ ທີ່ໄດ້ເດີນທາງມາຢ້ຽມຢາມ ພົບປະເຮັດວຽກ ໃນລະຫວ່າງ ວັນທີ 17-18 ຕຸລານີ້.
ໃນໂອກາດນີ້, ທ່ານ ນາງ ຄຳເມີງ ວໍລະຈິດ ໄດ້ສະແດງຄວາມຍິນດີຕ້ອນຮັບ, ຍ້ອງຍໍຊົມເຊີຍຕໍ່ພັນລະຍາການນຳ ກໍຄື ຄະນະສະຫະພັນແມ່ຍິງ ສສ ຫວຽດນາມ ທີ່ໄດ້ເດີນທາງມາຢ້ຽມຢາມ ໃນຄັ້ງນີ້ ເຊິ່ງເປັນການເສີມຂະຫຍາຍການພົວພັນຮ່ວມມື ຂອງສະຫະພັນແມ່ຍິງສອງປະເທດ ລາວ-ຫວຽດນາມ ໃຫ້ມີຄວາມຮັດແໜ້ນກັນຍິ່ງໆຂຶ້ນ. ເຊິ່ງໄລຍະຜ່ານມາ ຄະນະຄອບຄົວພັນລະຍາການນຳຂອງສອງປະເທດ ກໍໄດ້ມີການພົບປະຮ່ວມມື ແລກປ່ຽນວັດທະນະທຳຮ່ວມກັນຕະຫລອດມາ. ໃນໂອກາດເດີນທາງຄັ້ງນີ້, ທ່ານ ນາງ ຫງວຽນ ຫງວຽດ ງາ ແລະ ຄະນະ ຍັງໄດ້ເຂົ້າພົບພັນລະຍາ ທ່ານນາຍົກລັດຖະມົນຕີ ແຫ່ງ ສປປ ລາວ ແລະ ພົບປະກັບ ສະຫະພັນແມ່ຍິງນະຄອນຫລວງວຽງຈັນ ນຳອີກ.
ພ້ອມດຽວກັນນີ້, ທ່ານ ນາງ ຫງວຽນ ຫງວຽດ ງາ ໄດ້ສະແດງຄວາມຂອບໃຈ ໃນການຕອບຮັບອັນອົບອຸ່ນໃນຄັ້ງນີ້ ແລະ ໄດ້ຍ້ອງຍໍກ່ຽວກັບວັດທະນະທຳ, ຮີດຄອງປະເພນີລາວ ອັນເປັນເອກະລັກ ແລະ ຫວັງຢ່າງຍິ່ງວ່າ ຈະໄດ້ຮັບການສືບຕໍ່ເສີມຂະຫຍາຍສາຍພົວພັນມິດຕະພາບທີ່ດີ ລະຫວ່າງ ສະຫະພັນແມ່ຍິງລາວ- ສະຫະພັນແມ່ຍິງຫວຽດນາມ ທີ່ມີມາແຕ່ດົນນານນັ້ນ ໃຫ້ແຕກດອກອອກຜົນງອກງາມຍິ່ງໆຂຶ້ນ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!