ງານບຸນມະໂຫລານສົ່ງເສີມການອ່ານນະຄອນຫລວງວຽງຈັນຈະຈັດຂຶ້ນໃນວັນທີ 7-17 ມີນານີ້ ທີ່ສູນການຄ້າສາກົນ World Trade Center ຖະໜົນຄູວຽງ, ບ້ານໜອງຈັນ ເມືອງສີສັດຕະນາກ ເຊີ່ງພິທີຖະແຫລງຂ່າວຈັດຂຶ້ນໃນວັນທີ 1 ມີນານີ້ ທີ່ຫ້ອງວ່າປົກຄອງນະຄອນຫລວງວຽງຈັນ ໂດຍມີທ່ານ ວຽງສະໄໝ ພາສະເຫລີມສຸກ ຮອງຫົວໜ້າຫ້ອງວ່າການປົກຄອງນະຄອນຫລວງວຽງຈັນ, ທ່ານ ສົມພອນ ສອນດາລາ ຮອງຫົວໜ້າພະແນກສຶກສາທິການ ແລະ ກິລານະຄອນຫລວງວຽງຈັນ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ສື່ມວນຊົນເຂົ້າຮ່ວມ.
ທ່ານ ພອນຈັນ ແພງພູວັນ ຮອງຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວນະຄອນຫລວງວຽງຈັນໄດ້ກ່າວວ່າ: ງານບຸນມະໂຫລານສົ່ງເສີມການອ່ານຄັ້ງນີ້ຈະດຳເນີນເປັນເວລາ 10ວັນຄື: ວັນທີ 7-17 ມີນາ 2019 ໂດຍແຕ່ລະມື້ຈະເລີ່ມແຕ່ເວລາ 9: 00 ໂມງເຊົ້າ ຫາ 21 :30 ໂມງແລງ ແຕ່ສະເພາະວັນສຸກ-ວັນທິດ ປິດ 22:30 ໂມງແລງ ທັງນີ້, ເພື່ອເປັນການລະດົມໃຫ້ຄົນລາວ ເຫັນເຖິງຄວາມສຳຄັນຂອງການອ່ານ ແລະ ສົ່ງເສີມໃຫ້ອ່ານໜັງສືຢ່າງຕໍ່ເນື່ອງ ລວມເຖິງການຊ່ວຍເຫລືອພໍ່ແມ່ ຜູ້ປົກຄອງ, ຄູ ແລະ ບັນນາລັກ ຮັບຮູ້ ແລະ ເຂົ້າໃຈເຕັກນິກວິທີການສົ່ງເສີມການອ່ານ ແກ່ເດັກ ແລະ ເຍົາວະຊົນ ຢ່າງເໝາະສົມ ແລະ ໄດ້ຜົນ ນອກຈາກນີ້ ຍັງໄດ້ເປີດ ໂອກາດໃຫ້ຄົນລາວໄດ້ສຳພັດກັບປື້ມ ຈາກນາໆຊາດເພື່ອເປີດໂລກະທັດ ແລະ ເບີ່ງເຫັນການພັດທະນາອຸດສາຫະກຳປື້ມ ໃນຕ່າງປະເທດ ແລະ ຂະນະດຽວກັນກໍ່ເປີດໂອກາດໃຫ້ຄົນຕ່າງປະເທດໄດ້ສຳຜັດກັບປື້ມອ່ານຂອງລາວ ພ້ອມທັງເປັນສື່ກາງໃນການສ້າງໂອກາດໃຫ້ແກ່ນັກຂຽນ ແລະ ສຳນັກພິມຂອງລາວ ໃນການຈຳໜ່າຍລິຂະສິດໃຫ້ກັບຕ່າງປະເທດ ນອກຈາກນີ້ຍັງເຮັດໃຫ້ສຳນັກພິມມີຄວາມຕື່ນຕົວປັບປຸງ ແລະ ພັດທະນາການຜະລິດປື້ມອ່ານໃຫ້ມີຄຸນນະພາບ ທີ່ສີສັນຫລາກຫລາຍ ແລະ ເປັນປະໂຫຍດຕໍ່ຜູ້ອ່ານ ເພື່ອພັດທະນາເສດຖະກິດ-ສັງຄົມຂອງ ປະເທດຊາດໃຫ້ເຂັ້ມແຂງຂື້ນເປັນກ້າວໆ.
ພາຍໃນງານມີຫລາຍກວ່າ 200 ບູດທີ່ວາງສະແດງປື້ມ ນອກຈາກນັ້ນ, ຍັງມີກິດຈະກຳຖາມຕອບຄວາມຮູ້ຮອບຕົວຂອງບັນດານ້ອງນັກຮຽນ ນອກນັ້ນ ຍັງຈະໄດ້ມີການແຈກຍາຍປື້ມໃຫ້ແກ່ການນຳພັກ-ລັດ ແລະ ໂຮງຮຽນທົ່ວນະຄອນຫລວງວຽງຈັນ.
ຂຽນໂດຍ: ແຟນຊິສ ສະຫວັນຄຳ