ນາຍົກຍີ່ປຸ່ນປະກາດຍຸບສະພາເພື່ອເລືອກຕັ້ງໃໝ່ ທັງທີ່ຫາກໍຮັບຕໍ່າແໜ່ງໄດ້ພຽງ 11 ມື້!!

0
271

ໃນວັນທີ 14 ຕຸລາ 2021 ສໍານັກຂ່າວຕ່າງປະເທດ ໄດ້ລາຍງານວ່າ: ທ່ານ ຟູມິໂອະ ຄິຊິດະ ນາຍົກລັດຖະມົນຕີຄົນໃໝ່ຂອງປະເທດຍີ່ປຸ່ນໄດ້ປະກາດຍຸບສະພາ ພ້ອມກັບກໍານົດມື້ເລືອກຕັ້ງໃໝ່ໃນວັນທີ 31 ຕຸລາ 2021 ນີ້, ຫຼັງຈາກທີ່ທ່ານ ທ່ານ ຟູມິໂອະ ຄິຊິດະ ໄດ້ຮັບການເລືອກຕັ້ງໃຫ້ດໍາລົງຕໍາແໜ່ງເປັນນາຍົກລັດຖະມົນຕີຄົນໃໝ່ໄດ້ພຽງ 11 ມື້ເທົ່ານັ້ນ.

ການຕັດສິນໃຈຍຸບສະພາຂອງນາຍົກໃນຄັ້ງນີ້ ເນື່ອງມາຈາກຕ້ອງການອາໄສຈັງຫວະທີ່ຝ່າຍຄ້ານທີ່ມີຄະແນນນິຍົມຈາກປະຊາຊົນກໍາລັງຕົກຕໍ່າ ແລະ ໃນຂະນະດຽວກັນປະຊາຊົນຊາວຍີ່ປຸ່ນກໍຕ້ອງການເຫັນໜ້າລັດຖະບານຄົນໃໝ່ທີ່ມີແຜນການທີ່ຊັດເຈນໃນການຫາທາງຍຸດຕິການລະບາດຂອງພະຍາດໂຄວິດ-19 ເພື່ອຈະໄດ້ກັບມາຟື້ນຟູເສດຖະກິດຂອງປະເທດອີກຄັ້ງໜຶ່ງ.

ກ່ອນໜ້ານີ້ໜັງສືພິມໃນປະເທດຍີ່ປຸ່ນໄດ້ສໍາຫຼວດຄວາມຄິດເຫັນຂອງປະຊາຊົນຊາວຍີ່ປຸ່ນ ແລະ ພົບວ່າ 48% ຂອງປະຊາຊົນຕ້ອງການໃຫ້ລັດຖະບານເຮັດວຽກຄວບຄຸມການລະບາດຂອງພະຍາດໂຄວິດ-19 ເປັນອັນດັບທໍາອິດ, ຮອງລົງມາກໍຄືການຟື້ນຟູເສດຖະກິດ ແລະ ອັນດັບທີສາມກໍຄື ການແກ້ໄຂບັນຫາເລື່ອງການຈ້າງງານ.