ທ່ານ ໂມເຕງິ, ລັດຖະມົນຕີກະຊວງການຕ່າງປະເທດ ຍີ່ປຸ່ນ, ເຫດການພົ້ນເດັ່ນໃນການຮ່ວມມືລະຫວ່າງ ຍີ່ປຸ່ນ-ລາວ

0
506
ລັດຖະມົນຕີ ກະຊວງການຕ່າງປະເທດຍີ່ປ່ນຸ, ທ່ານ ໂມເຕງິ, ເຂົ້າຮ່ວ ມປະຊຸມໃນນາມເປັນປະທານກອງປະຊຸມ ລັດຖະມົນຕີ ການຕ່າງປະເທດແມ່ນໍ້າ ຂອງ-ຍີ່ປຸ່ນ ຄັ້ງທີ 13 ໃນວັນທີ 9 ກໍລະກົດ 2020

ຂໍ້ຄວາມຈາກທ່ານ ໂມເຕງິ ໂທຊີມິຊຶ, ລັດຖະມົນຕີກະຊວງການຕ່າງປະເທດ ຍີ່ປຸ່ນ ກ່ອນການຢ້ຽມຢາມ ສປປ ລາວ ຢ່າງເປັນທາງການລະຫວ່າງວັນທີ 22-24 ສິງຫາ 2020

ຄັ້ງນີ້ແມ່ນຄັ້ງທໍາອິດທີ່ຂ້າພະເຈົ້າໄດ້ມາຢ້ຽມຢາມປະເທດລາວໃນນາມ ລັດຖະມົນຕີກະຊວງການຕ່າງປະເທດຍີ່ປຸ່ນ. ໃນເດືອນເມສາ 2014, ຂ້າພະເຈົ້າເຄີຍມາຢ້ຽມຢາມປະເທດລາວໃນນາມ ລັດຖະມົນຕີກະຊວງເສດຖະກິດ, ການຄ້າ ແລະ ອຸດສາຫະກໍາຍີ່ປຸ່ນ. ຜ່ານມາ 6 ປີແລ້ວ, ຂ້າພະເຈົ້າຮູ້ສຶກດີໃຈເປັນຢ່າງຍິ່ງທີ່ໄດ້ມີໂອກາດມາຢ້ຽມຢາມປະເທດລາວທີ່ເຕັມໄປດ້ວຍສະເໜ່ທາງທໍາມະຊາດທີ່ອຸດົມສົມບູນ, ເຊັ່ນແມ່ນໍ້າຂອງ, ວັດທະນະທໍາທີ່ຫຼາກຫຼາຍ ແລະ ປະຊາຊົນທີ່ມີຄວາມງຽບສະຫງົບດັ່ງເຊັ່ນນີ້ອີກຄັ້ງໜຶ່ງ.

ປີນີ້ແມ່ນວາລະຄົບຮອບ 65 ປີ ແຫ່ງການສ້າງຕັ້ງສາຍພົວພັນທາງການທູດ ຍີ່ປຸ່ນ-ລາວ. ໃນຊ່ວງໄລຍະ 65 ປີມານີ້,​ ຄົນຍີ່ປຸ່ນຫຼາຍຄົນລວມທັງຂ້າພະເຈົ້າຕ່າງກໍ່ຖືກດຶງດູດດ້ວຍສະເໜ່ຄວາມງາມຂອງປະເທດ ແລະ ປະຊາຊົນລາວ ແລະ ໄດ້ຊ່ວຍກັນພັດທະນາສາຍພົວພັນຂອງສອງປະເທດຕະຫຼອດມາ. ນອກຈາກນີ້ເມື່ອ 5 ປີກ່ອນ, ສາຍພົວພັນມິດຕະພາບ ແລະ ການຮ່ວມມືຂອງສອງປະເທດທີ່ຍາວນານມາຫຼາຍປີກໍ່ໄດ້ຮັບການຍົກລະດັບຂຶ້ນເປັນ “ຄູ່ຮ່ວມຍຸດທະສາດ”. ສິ່ງດັ່ງກ່າວໄດ້ເຮັດໃຫ້ສາຍພົວພັນ ຍີ່ປຸ່ນ-ລາວ ຂະຫຍາຍໂຕເຂົ້າສູ່ລວງເລິກຍິ່ງຂຶ້ນໃນຫຼາກຫຼາຍການຮ່ວມມືທັງໃນພາກພື້ນ ແລະ ສາກົນ.

ມາຮອດປະຈຸບັນ, ຍີ່ປຸ່ນ ໄດ້ສົ່ງເສີມການເພີ່ມທະວີການເຊື່ອມຈອດໂດຍຜ່ານການສະໜັບສະໜຸນພື້ນຖານໂຄງລ່າງທີ່ມີຄຸນນະພາບສູງ, ການຮ່ວມມື ແລະ ການພັດທະນາຊັບພະຍາກອນມະນຸດ ດ້ານຂະແໜງກະສິກໍາ,  ການສຶກສາ, ສາທາລະນະສຸກ, ການເກັບກູ້ລະເບີດບໍ່ທັນແຕກ, ການປັບປຸງກົດໝາຍ ແລະ ອື່ນໆ ເພື່ອສົ່ງເສີມການພັດທະນາຢ່າງຍືນຍົງໃຫ້ແກ່ ສປປ ລາວ. ຍົກຕົວຢ່າງ, ຍີ່ປຸ່ນໄດ້ໃຫ້ການສະໜັບສະໜຸນການກໍ່ສ້າງສະໜາມບິນສາກົນວັດໄຕ, ແລະ ປັບປຸງເສັ້ນທາງແຫ່ງຊາດເລກທີ 9. ນອກຈາກນີ້ ໃນເດືອນ 5 ທີ່ຜ່ານມາ, ພາຍໃຕ້ການຮ່ວມມືຢ່າງໃກ້ຊິດຂອງພາກສ່ວນກ່ຽວຂ້ອງດ້ານກົດໝາຍຂອງສອງປະເທດເຮັດໃຫ້ສາມາດບັງຄັບໃຊ້ປະມວນກົດໝາຍແພ່ງຄັ້ງທໍາອິດໃນລາວໄດ້.

ໂຄງການຂະຫຍາຍອາຄານສະຫນາມບິນ ສາກົນ ວຽງຈັນ (ມິຖຸນາ 2018)

ຕໍ່ຈາກນີ້ໄປກໍ່ເຊັ່ນດຽວກັນ, ຍີ່ປຸ່ນຢາກສືບຕໍ່ປະກອບສ່ວນເຂົ້າໃນ ການປັບປຸງແລວເສດຖະກິດຕາເວັນອອກ-ຕາເວັນຕົກ, ການຍົກສູງສະຖຽນລະພາບດ້ານການເງິນ, ການເສີມສ້າງຮາກຖານດ້ານການແພດ, ການປ້ອງກັນໄພພິບັດທໍາມະຊາດ ແລະ ອື່ນໆ ເພື່ອຊຸກຍູ້ການຮ່າງ ແຜນພັດທະນາເສດຖະກິດສັງຄົມແຫ່ງຊາດ 5 ປີ  ຄັ້ງຕໍ່ໄປໃຫ້ສຳເລັດ. ຍີ່ປຸ່ນ ຢາກຊ່ວຍສະໜັບສະໜຸນໃຫ້ປະຊາຊົນລາວສາມາດດຶງເອົາທ່າແຮງອັນຫຼາກຫຼາຍຂອງປະເທດລາວອອກມາ ເພື່ອສ້າງໝາກຜົນອັນດີຈາກຄວາມພະຍາຍາມດັ່ງກ່າວ.

ຕອນທີ່ຂ້າພະເຈົ້າມາຢ້ຽມຢາມປະເທດລາວໃນປີ 2014, ຫ້ອງການ JETRO ປະຈໍານະຄອນຫຼວງວຽງຈັນ ໄດ້ຖືກສ້າງຕັ້ງຂຶ້ນ. ໃນຕອນນັ້ນ, ຈໍານວນບໍລິສັດຍີ່ປຸ່ນທີ່ມາລົງທຶນໃນປະເທດລາວແມ່ນມີທັງໝົດ 108 ບໍລິສັດ (ໃນເດືອນເມສາ 2014), ເຊິ່ງບໍລິສັດຍີ່ປຸ່ນກໍ່ໄດ້ສືບຕໍ່ມາລົງທຶນໃນປະເທດລາວຢ່າງຕໍ່ເນື່ອງເຮັດໃຫ້ປະຈຸບັນມີຫຼາຍກວ່າ 160 ບໍລິສັດໃນລາວ. ຂ້າພະເຈົ້າຫວັງວ່າສະພາບແວດລ້ອມການລົງທຶນທີ່ແນໃສ່ສົ່ງເສີມການລົງທຶນຂອງບໍລິສັດຍີ່ປຸ່ນເຊັ່ນການຂົນສົ່ງ ແລະ ອື່ນໆ ຈະໄດ້ຮັບການພັດທະນາ ແລະ ການແລກປ່ຽນດ້ານເສດຖະກິດຂອງສອງປະເທດຈະຟົດຟື້ນຍິ່ງຂຶ້ນ. ນອກຈາກນີ້, ໂດຍຜ່ານຂໍ້ຕົກລົງ AJCE​P ສະບັບປັບປຸງຄັ້ງທໍາອິດທີ່ ຍີ່ປຸ່ນ ແລະ ລາວ ໄດ້ບັງຄັບໃຊ້ຮ່ວມກັນໃນວັນທີ 1 ສິງຫາ ແລະ ຂໍ້ຕົກລົງ RCEP ທີ່ລົງນາມຮ່ວມກັນໃນປີນີ້, ຂ້າພະເຈົ້າເຊື່ອໝັ້ນວ່າ ຍີ່ປຸ່ນ ແລະ ສປປ ລາວ ແລະ ເສດຖະກິດພາກພື້ນຈະໄດ້ຮັບການເຊື່ອມໂຍງຢ່າງເລິກເຊິ່ງຍິ່ງຂຶ້ນ.

ການແລກປ່ຽນລະຫວ່າງ ຍີ່ປຸ່ນ ແລະ ສປປ ລາວ ບໍ່ມີແຕ່ທາງດ້ານເສດຖະກິດເທົ່ານັ້ນ, ແຕ່ຍັງລວມໄປເຖິງການໄປມາຫາສູ່ກັນຂອງການນໍາຂັ້ນສູງ, ສະມາຊິກສະພາ, ພັກ-ລັດ, ການແລກປ່ຽນດ້ານວຽກງານປ້ອງກັນປະເທດ ແລະ ການແລກປ່ຽນຂອງຊາວໜຸ່ມ ແລະ ກິລາ. ໂດຍສະເພາະໃນປີ 1965, ປະເທດລາວເປັນປະເທດທໍາອິດທີ່ ຍີ່ປຸ່ນ ສົ່ງອາສາສະໝັກຊາວໜຸ່ມລຸ້ນທໍາອິດມາ. ນັບຕັ້ງແຕ່ມື້ນັ້ນມາກໍ່ເປັນເວລາກວ່າ 55 ປີແລ້ວ ແລະ ມີອາສາສະໝັກຫຼາຍກ່ວາ 1,000 ຄົນທີ່ໄດ້ມາເຮັດວຽກຢູ່ທັງສູນກາງ ແລະ ທ້ອງຖິ່ນໃນຂະແໜງການຕ່າງໆ, ເຊັ່ນ: ການສຶກສາ-ກິລາ, ສາທາລະນະສຸກ, ກະສິກໍາ, ການພັດທະນາຊົນນະບົດ ແລະ ອື່ນໆ. ນອກຈາກນີ້, ໃນແຕ່ລະປີຍັງມີໄວໜຸ່ມລາວປະມານ 50 ຄົນໄດ້ຮັບທຶນການສຶກສາຈາກ ລັດຖະບານຍີ່ປຸ່ນ ໄປສຶກສາຕໍ່ທີ່ປະເທດຍີ່ປຸ່່ນນໍາອີກ. ພ້ອມດຽວກັນນັ້ນ, ຍັງມີປະຊາຊົນ ແລະ ນັກຮຽນຍີ່ປຸ່ນໄດ້ແລກປ່ຽນກັບຄົນລາວໂດຍຜ່ານສະມາຄົມມິດຕະພາບໃນແຕ່ລະແຂວງ ແລະ NGO ຂອງຍີ່ປຸ່ນ. ດ້ວຍເຫດນີ້, ເຮັດໃຫ້ການເຊື່ອມໂຍງກັນລະຫວ່າງປະຊາຊົນສອງຊາດໃນຫຼາກຫຼາຍຊົນຊັ້ນໄດ້ກາຍເປັນສິ່ງຊຸກຍູ້ໃຫ້ສາຍພົວພັນລະຫວ່າງສອງປະເທດເຂັ້ມແຂງ ແລະ ມີຄວາມໄວ້ວາງໃຈເຊິ່ງກັນ ແລະ ກັນຍິ່ງຂຶ້ນ.

ຄົບຮອບ 20 ປີທຶນການສຶກສາ JDS (ທຶນການສຶກສາດ້ານການພັດທະນາຊັບພະຍາກອນມະນດຸ )

ແຕ່ການແລກປ່ຽນດ້ານບຸກຄົນທີ່ເປັນພື້ນຖານຂອງສາຍພົວພັນ ຍີ່ປຸ່ນ-ລາວ ແມ່ນໄດ້ຖືກຢຸດຊົ່ວຄາວຍ້ອນ ການແຜ່ລະບາດຂອງເຊື້ອພະຍາດຈຸລາໂລກສາຍພັນໃໝ່. ຂ້າພະເຈົ້າຂໍສະແດງຄວາມຊົມເຊີຍມາຍັງການຊີ້ນໍາອັນເຂັ້ມແຂງຂອງ ພັກ ແລະ ລັດຖະບານລາວ ລວມທັງປະຊາຊົນທີ່ສາມັກຄີກັນຈົນສາມາດຄວບຄຸມການແຜ່ລະບາດຂອງພະຍາດດັ່ງກ່າວໄດ້. ໃນຍຸກໂລກາພິວັດທີ່ການໄປມາຫາສູ່ກັນລະຫວ່າງປະຊາຊົນ ແລະ ການຂົນສົ່ງພວມຂະ​ຫ​ຍາຍ​ຕົວ​ເພີ່ມ​ຂຶ້ນ, ການແຜ່ລະບາດໄດ້ສົ່ງຜົນກະທົບອັນໃຫຍ່ຫຼວງໃຫ້ແກ່ເສດຖະກິດ-ສັງຄົມຂອງທຸກປະເທດ, ລວມທັງປະເທດຍີ່ປຸ່ນນໍາອີກ. ດັ່ງນັ້ນ, ພວກເຮົາຕ້ອງຜະເຊີນໜ້າຕໍ່ສູ້ຮ່ວມກັນເພື່ອບໍ່ໃຫ້ບັນຫາທ້າທາຍເປັນອຸປະສັກຕໍ່ຊີວິດການເປັນຢູ່ຂອງປະຊາຊົນ ແລະ ອະນາຄົດຂອງພວກເຂົາ.

ຍີ່ປຸ່ນ ກ້າວຂຶ້ນເປັນຜູ້ນໍາໃນເວທີສາກົນໃນການສະໜັບສະໜຸນດ້ານລະບົບສາທາລະນະສຸກ ແລະ ການປິ່ນປົວໃຫ້ແຕ່ລະປະເທດເພື່ອລະງັບການແຜ່ລະບາດຂອງເຊື້ອພະຍາດຈຸລາໂລກສາຍພັນໃໝ່ໃຫ້ໄດ້ໄວທີ່ສຸດ. ຍີ່ປຸ່ນ, ໂດຍຜ່ານອົງການຈັດຕັ້ງສາກົນ, ໄດ້ໃຫ້ການສະໜັບສະໜຸນ ສປປ ລາວ ດ້ານເຕັກໂນໂລຊີ, ອຸປະກອນປ້ອງກັນສຸຂະພາບເປັນມູນຄ່າປະມານ 4 ລ້ານໂດລາສະຫະລັດ ແລະ ຍັງໃຫ້ການຊ່ວຍເຫຼືອລ້າແກ່ປະເທດລາວໂດຍກົງໂດຍການມອບລົດສຸກເສີກ, ອຸປະກອນການແພດຕ່າງໆ ແລະ ອື່ນໆ, ເປັນມູນຄ່າປະມານ 13.6 ລ້ານໂດລາສະຫະລັດ. ນອກຈາກນີ້, ຍີ່ປຸ່ນ ແລະ ລາວ ກໍາລັງຊຸກຍູ້ການປຶກສາຫາລືທີ່ເຮັດໃຫ້ການໄປມາຫາສູ່ກັນຂອງບຸກຄົນສໍາຄັນດ້ານທຸລະກິດ ພາຍໃຕ້ຮູບແບບລະບົບປ້ອງກັນການແຜ່ລະບາດຮອບໃໝ່. ຂ້າພະເຈົ້າຢາກຈະຊຸກຍູ້ການພົວພັນເພື່ອຊະນະການແຜ່ລະບາດຂອງເຊື້ອພະຍາດຈຸລາໂລກສາຍພັນໃໝ່ທີ່ບໍ່ເຄີຍມີມາກ່ອນນີ້ ແລະ ເປີດການໄປມາຫາສູ່ກັນອີກຄັ້ງທີ່ປະຊາຊົນສອງປະເທດລໍຖ້າຢູ່ ໃຫ້ໄດ້ໄວທີ່ສຸດ. 

ຂ້າພະເຈົ້າຫວັງວ່າ ໃນຊ່ວງໄລຍະທີ່ຂ້າພະເຈົ້າຢ້ຽມຢາມປະເທດລາວ, ຂ້າພະເຈົ້າຈະສາມາດແລກປ່ຽນຄໍາຄິດຄໍາເຫັນຢ່າງເປັນປະໂຫຍດກັບການນໍາຂອງລາວເພື່ອຊຸກຍູ້ການຈະເລີນກ້າວໜ້າອັນເຂັ້ມແຂງຂອງສາຍພົວພັນ “ຄູ່ຮ່ວມຍຸດທະສາດ” ຂອງສອງປະເທດ.

ທ່ານ ໂມເຕງິ ໂທຊີມິຊຶ

ລັດຖະມົນຕີກະຊວງການຕ່າງປະເທດ

ພັກເສລີປະຊາທິປະໄຕແຫ່ງຍີ່ປຸ່ນ(LDP)
ສະມາຊິກຜູ້ແທນສະພາຕໍ່າ

ເກີດໃນເດືອນ ຕຸລາ ປີ 1955

ເດືອນທັນວາ ປີ 2012 :

ລັດຖະມົນຕີກະຊວງເສດຖະກິດ,ການຄ້າ ແລະ ອຸດສະຫະກໍາ

ເດືອນຕຸລາ ປີ 2018:

ລັດຖະມົນຕີປະຈຳຫ້ອງວ່າລັດຖະບານດ້ານນະໂຍບາຍເສດຖະກິດ ແລະ ການເງິນ

ລັດຖະມົນຕີຮັບຜິດຊອບການປະຕິຮູບລະບົບປະກັນສັງຄົມ

ລົດຖະມົນຕີຮັບຜິດຊອບການເຈລະຈາທາງດ້ານການຄ້າໃນກອບTPP ແລະ ລະຫວ່າງ ຍີ່ປຸ່ນ-ອາເມລິກາ.

ເດືອນກັນຍາ ປີ2019 – ປັດຈຸບັນ

ລັດຖະມົນຕີກະຊວງການຕ່າງປະເທດ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.