ທຸລະກິດໂຮງແຮມ ແລະ ທ່ອງທ່ຽວໃນລາວມີວິທີປັບຕົວ ແລະ ຮັບມືແນວໃດໃນຊ່ວງໂຄວິດ-19?

0
1943

ຫຼັງຈາກໄວຣັສສາຍພັນໃໝ່ ໂຄວິດ-19 ເຂົ້າມາໃນລາວ ເຮັດໃຫ້ການໃຊ້ຊີວິດຂອງທຸກຄົນປ່ຽນແປງໄປໃນຮູບແບບໃໝ່ ຫຼື ທີ່ເອີ້ນກັນວ່າ ກ້າວເຂົ້າສູ່ຍຸກ New normal ນັ້ນເອງ.

ເມື່ອເວົ້າເຖິງທຸລະກິດໂຮງແຮມ ແລະ ທ່ອງທ່ຽວໃນລາວໃນຊ່ວງທີ່ຜ່ານມາ ສະທ້ອນໃຫ້ເຫັນເຖິງຄວາມເຂັ້ມແຂງຂອງວຽກການໂຮງແຮມ ແລະ ການທ່ອງທ່ຽວ ທີ່ມີຕໍ່ສະຖານະການໂຄວິດ-19 ທີ່ຕ້ອງຮັບມື ແລະ ຜ່ານພົ້ນມັນໄປໃຫ້ໄດ້ ເພາະຈັງຫວະນີ້ມັນເປັນໂອກາດທີ່ທຸລະກິດໂຮງແຮມ ແລະ ທ່ອງທ່ຽວຈະໄດ້ຂະຫຍາຍມາໂປຣໂມດທຸລະກິດຂອງຕົນເອງກັບກຸ່ມລູກຄ້າພາຍໃນປະເທດຫຼາຍຂຶ້ນ, ພ້ອມກັນນັ້ນໃນສ່ວນຂອງຜູ້ປະກອບການກໍໄດ້ຮ່ວມມືກັນເພື່ອກະຕຸ້ນໃຫ້ຄົນເຂົ້າມາໃນພື້ນທີ່ຫຼາຍຂຶ້ນ ໂດຍບໍ່ຕ້ອງແຂ່ງຂັນກັນເອງ ຕົວຢ່າງວ່າ ນັກທ່ອງທ່ຽວມາທ່ຽວຫຼວງພະບາງ ແລ້ວຢາກລົງມາທ່ຽວຈຳປາສັກຕໍ່ ເຮົາກໍຈະໄດ້ມີການແນະນຳໂຮງແຮມຢູ່ຈຳປາສັກໃຫ້ລູກຄ້າໄດ້ ເປັນຕົ້ນ.

ນອກຈາກຍຸດທະສາດການຕະຫຼາດ ແລະ ວິທີປັບຕົວຂອງທຸລະກິດແລ້ວ ຜູ້ປະກອບການກໍຍັງໃຫ້ຄວາມສຳຄັນກັບພະນັກງານ ເຊັ່ນ ຈັດເຝິກອົບຮົມ (Trainning) ພະນັກງານ, ຈັດກິດຈະກຳເພື່ອຄວາມມ່ວນຊື່ນ ແລະ ຜ່ອນຄາຍ ເພາະເມື່ອສະຖານະການກັບມາປົກກະຕິດີແລ້ວ ໂຮງແຮມກໍຈະໄດ້ມີພະນັກງານທີ່ມີຄຸນນະພາບມາເຮັດວຽກນຳນັ້ນເອງ.

ເຖິງຢ່ງໃດກໍຕາມ, ປັດຈຸບັນນີ້ ເພິ່ນກໍໄດ້ມີໂຄງການລາວທ່ຽວລາວ ເຊິ່ງເປັນໂຄງການເພື່ອຊຸກຍູ້ ແລະ ສົ່ງເສີມການທ່ອງທ່ຽວໃນລາວ, ພ້ອມກັນນັ້ນ ທາງໂຮງແຮມຫຼາຍໆແຫ່ງກໍໄດ້ມີກົນລະຍຸດ ແລະ ການປັບຕົວຕ່າງໆ ໃນການດຳເນີນທຸລະກິດໃນຊ່ວງນີ້ໃຫ້ສາມາດໃຫ້ບໍລິການໄປຕໍ່ໄດ້ເຊັ່ນ:

1. ຫຼຸດຄ່າຫ້ອງພັກ, ຈັດໂປຣໂມຊັ່ນຕ່າງໆ ເພື່ອດຶງດູດນັກທ່ອງທ່ຽວໃນປະເທດ.
2. ຫຼຸດຄ່າໃຊ້ຈ່າຍທີ່ບໍ່ຈຳເປັນເຊັ່ນ ປິດພື້ນທີ່ໃຫ້ບໍລິການບາງສ່ວນເພື່ອຫຼຸດຕົ້ນທຶນໃນສ່ວນທີ່ບໍ່ໄດ້ໃຊ້ງານ.
3. ເຮັດການຕະຫຼາດຜ່ານທາງສື່ອອນລາຍ (Social media) ເຊັ່ນ: Facebook, Instagram, website ຫຼື Platfrom ອື່ນໆໃຫ້ຫຼາຍຂຶ້ນ, ຈັດມຸມຖ່າຍຮູບທີ່ສວຍງາມເຊັ່ນ: ອາຫານ, ຫ້ອງພັກ ແລະ ມຸມຖ່າຍຮູບຕ່າງໆ ເພື່ອດຶງດູດໃຫ້ຄົນມາພັກເຊົ່າ.
4. ສ້າງລາຍໄດ້ຈາກການບໍລິການອື່ນໆພາຍໃນໂຮງແຮມ ເຊັ່ນ: ບໍລິການອາຫານແບບເດລີເວີລີ (Delivery) ຫຼື ບໍລິການຈັດຫາອາຫານໃຫ້ງານລ້ຽງ, ສັງສັນຕ່າງໆ.

ເຊິ່ງໃນປັດຈຸບັນນີ້ ປະເທດລາວເຮົາກໍກຳລັງມີການລ໋ອກດາວໃນຫຼາຍພື້ນທີ່ເພື່ອຫຼຸດຜ່ອນການແຜ່ລະບາດຂອງເຊື້ອໄວຣັສ ໂຄວິດ-19 ເຮັດໃຫ້ບໍ່ສາມາດອອກໄປຂ້າງນອກໄດ້ ສຳລັບທຸລະກິດການໂຮງແຮມ ແລະ ການທ່ອງທ່ຽວໃນລາວ ກໍໄດ້ຫັນໃຊ້ວິກິດນີ້ໃຫ້ເປັນໂອກາດ ພ້ອມທັງເປັນຊ່ວງເວລາໃນການກຽມຕົວ ແລະ ປັບປຸງທຸລະກິດໃຫ້ຮັບມືກັບວິກິດຕ່າງໆໃນອະນາຄົດໄດ້ດີຂຶ້ນອີກດ້ວຍ.