ຄວາມ​ຄືບ​ໜ້າ​ການ​ພັດທະນາ​ ອ່າງນ້ຳຂອງ​ຕອນ​ລຸ່ມ​

0
1428
ແຂວງ​ວຽງ​ຈັນ
ແຂວງ​ວຽງ​ຈັນ

ໂຄງການຄຸ້ມ​ຄອງອ່າງ​ໂຕ່ງ​ນ້ຳ​ແບບ​ຍືນ​ຍົງ​ໃນ​ອ່າງ​ແມ່​ນ້ຳ ຂອງ​ຕອນ​ລຸ່ມເຂດເມືອງ​ສັງ​ທອງ, ນະຄອນຫລວງ​ວຽງ​ຈັນ ແມ່ນ​ໜຶ່ງ​ໃນ​ບັນດາ​ກິດຈະການ​ທີ່​ໄດ້ຮັບການ​ສະ ໜັບສະໜູນ​ຈາກ​ລັດຖະບານ​ເຢຍລະ​ມັນ ໃນມູນ ຄ່າ 5 ລ້ານ​ຢູ​ໂລ​ ​ແລະ ສົມທົບ​ທຶນຂອງ​ລັດຖະບານ​ລາວ​ 5 ແສນ​ເອີໂຣ, ມີ​ໄລຍະ ເວລາ 7 ປີ (2010-2017), ມາ​ຮອດ​ປັດຈຸບັນການຈັດ​ຕັ້ງ​ປະຕິບັດໂຄງ ການ​ດັ່ງກ່າວມີ​ຄວາມ​ຄືບ​ໜ້າ​ໄປ​​ຕາມ​​ແຕ່​ລະບາດ​ກ້າວແລ້ວ.

​ໂຄງການ​ຄຸ້ມ​ຄອງ​ອ່າງ​ໂຕ່ງ​ນ້ຳ​ແບບ​ຍືນ​ຍົ​ງ​ໃນ​ອ່າງ​ແມ່​ນ້ຳ ຂອງ​ຕອນ​ລຸ່ມ​ເຂດ​ນ້ຳ​ຕອນມີ ເນື້ອ​ທີ່​ທັງ​ໜົດ 80.455 ເຮັກຕາ ກວມ​ເອົາ​ເຂດ​ພື້ນ​ທີ່​ນ້ຳ​ຕອນ​ ແລະ ສ່ວນ​ໜຶ່ງ​ຂອງ​ນ້ຳ​ສັງ​ທີ່ ເປັນສາຂາໜຶ່ງໄຫລ​ລົງ​ສູ່​ນ້ຳ ຂອງ, ​ກວມ​ເອົາ 34 ບ້າ​ນ ເຂດ​ເມືອງ​ສັງ​ທອງ ​ແລະ 9 ​ບ້ານ​ ເມືອງ​ຫີນ​ເຫີບ ​ແຂວງ​ວຽງ​ຈັນ, ທັງນີ້ກໍເພື່ອ​ສະໜັບ​ສະ​ໜູນນະ​ໂຍບາຍ ​ແລະ ການຈັດ​ຕັ້ງ​​ແຜນ​ຍຸດ​ທະ​ສາດ ​ຂອງ​ການ​ພັດທະນາ​ຊັບ​ພະຍາກອນ​ນ້ຳ​ແບບ​ປະສົມ​ປະສານ, ເພື່ອແນໃສ່​ຟື້ນ​ຟູ​ຊັບ​ພະ ຍາກອນ​ທຳ​ມະ​ຊາດ ​ແລະ ສ້າງ​

ແຜນ​ຄຸ້ມ​ຄອງ​ແບບ​ມີ​ສ່ວນ​ຮ່ວມ; ພ້ອມປັບປຸງ​ຊີວິດ​ການເປັນ​ຢູ່​ຂອງ​ປະຊາຊົນ​ເຂດ​ພື້ນ​ທີ່ ​ໂດຍ​ການສົ່ງເສີມ​ກະສິກຳ​ແບບ​ຍືນ​ຍົງ ​ແລະ ​ເປັນ​ມິດ​ກັບ​ສະພາບ​ແວດ​ລ້ອມ; ປະສານ​ສົມທົບ​ກັບ​ອົງການ​ແມ່​ນ້ຳຂອງ​ສາກົນ​ເພື່ອ​ເຜີຍ​ແຜ່ ແລະ ​ແລກປ່ຽນ​ບົດ ຮຽນກ່ຽວ​ກັບ​ຜົນ​ການຈັດ​ຕັ້ງ​ປະຕິບັດ​ໂຄງການ​ກັບປະ​ເທດ​ພາຄີ​ອື່ນໆ.

​ເຖິງ​ຢ່າງ​ໃດ​ກໍ​ດີ ຜ່ານ​ຈາກ​ການຈັດ​ຕັ້ງ​ປະຕິບັດ​ມາ​ຮອດ​ຕົ້ນ​ປີ 2014 ທາງ​ໂຄງການ​ສາມາດ​ເຮັດ​ສຳ​ເລັດ​ບາງໜ້າ​ວຽກ​ທີ່​ສຳ ຄັນເຊັ່ນ: ກິດຈະກຳ​ການ​ຄຸ້ມ​ຄອງ​ອ່າງ​ແມ່ນໄດ້​ສ້າງ​ຕັ້ງ​ການ​ຈັດ​ຕັ້ງ ​ແລະ ລະບຽບການ​ຄຸ້ມ​ຄອງ​ອ່າງ, ສ້າງ​ຖານ​ຂໍ້​ມູນ, ສ້າງ​ຄວາມ​ອາດ​ສາມາດ ​ແລະ ​ເຜີຍ​ແຜ່​ໂຄສະນາ, ສ້າງ​​ແຜນ​ຄຸ້ມ​ຄອງ​ອ່າງ; ກິດຈະກຳ​ການຈັດ​ສັນ​ທີ່​ດິນ ແລະ ​ແຫ​ລ່ງນ້ຳ​ແບບ​ມີ​ສ່ວນ​ຮ່ວມ​ແມ່ນ​ໄດ້​ລົງ​ເກັບ​ກຳ​ຂໍ້​ມູນ ແລະ ​ເຂົ້າ​ຮ່ວມ​ການຈັດ​ສັນ​ທີ່​ດິນ​ຂັ້ນ​ບ້ານ​ສຳ​ເລັດ 22 ບ້ານ, ຈັດ​ເວ ທີ​ສົນທະນາຂັ້ນ​ກຸ່ມ​ບ້ານ,​ ສ້າງ​ຄະນະ​ປະສານ​ງານ ແລະ ສາຍ​ລາຍ​ງານ​ຂັ້ນ​ບ້ານ ແລະ ເຝິກ​ການ​ສ້າງ​ແຜນ​ຮ່ວມ​ກັນ​ກັບ​ຊາວ ບ້ານ 3 ຄັ້ງ, ຈັດ​ເວທີ​ສົນທະນາ​ກັບ​ພາກ​ເອກະ​ຊົນ 1 ຄັ້ງ, ສຳ​ເລັດ​ການ​ຕິດ​ຕັ້ງ​ສະຖານີ​ເກັບ​ກຳ​ຂໍ້​ມູນ​ປະລິມານ​ນ້ຳ ແລະ ​ເກັບ​ກຳ​ຂໍ້​ມູນ​ປະຈຳ​ເດືອນ ໄດ້​ຄົບຮອບ 1 ປີ; ກິດຈະກຳການຄຸ້ມ​ຄອງ​ປ່າ​ປ້ອງ​ກັນ​ໄດ້​ຈັດ​ຕັ້ງ​ພະນັກງານ ແລະ ຈັດ​​ເຝິກອົບຮົມ (ສອງ​ເມືອງ) ການວາງ​ແຜນ ແລະ ຄຸ້ມ​ຄອງ​ປ່າ​ປ້ອງ​ກັນ-ນາຍບ້ານ, ຫ້ອງການ​ຊັບພະຍາກອນ ​ແລະ ພະນັກງານ​ແຂວງ​ຈຳນວນ 34 ທ່ານ, ສຳ​ຫລວດ​ກຳນົດ​ຂອບ​ເຂດ ​ແລະ ສ້າງລະບຽບ​ແບບ​ມີ​ສ່ວນ​ຮ່ວມ​ສຳ​ເລັດ 2 ບ້ານ ຈາກ 7 ບ້ານ ເຂດ​ປ່າ​ສະຫງວນ​ພູ​ຂະ​ຍະ, ສຳ​ເລັດ​ປັກ​ຫລັກໝາຍ 1 ບ້ານ, ສຳ​ຫລວດ​ເກັບ​ກຳ​ຂໍ້ມູນ​ເບື້ອງ​ຕົ້ນ ພູ​ອິນ​ຖິ່ນ, ​ໄດ້​ຮັບ​ການ​ເຫັນ​ດີຈາກ​ຂັ້ນ​ແຂວງ​ໃຫ້​ດຳ​ເນີນ​ກອງ​ປະຊຸມ​ປຶກສາ​ຫາລື ແລະ ດຳ​ເນີນ​ການ​ຈັດ​ຕັ້ງ​ປະຕິບັດ​ຂອງ​ພູ​ອິນ​ຖິ່ນ; ກິດຈະກຳ​ວຽກ​ງານ​​ຟື້ນ​ຟູ​ປ່າ ​ໄດ້​ສົ່ງ​ເສີມ​ປະຊາ ຊົນ​ປູກ​ໄມ້​, ຊຶ່ງມາ​ຮອດ​ປັດຈຸບັນ ປູກ​ໄດ້​ແລ້ວ 157​ ​ເຮັກຕາ ​ໃນ​ຈຳ ນວນ 6 ບ້ານຄື:  ນາ​ພົງ, ວຽງ​ຄຳ, ກົ້ວ, ​ເຕົາ​ໄຫ, ​ໄຮ່​ໄຕ້, ນາ​ຕານ; ກິດຈະກຳ​ການ​ສະໜັບ ສະໜູນ​ຊົນລະປະທານ ແລະ ຊັບ​ຊ່າວ​ນາ​ແມ່ນ​ໄດ້​ສຳ​ເລັດ​ການ ກວດກາ​ເຕັກນິກ​ການ​ກໍ່ສ້າງ​ຈາກ​ຜູ້​ໃຫ້​ທຶນ ແລະ ຊ່ຽວຊານ​ພາຍ​ນອກ 2 ຄັ້ງ, ສຳ​ເລັດ​ການ​ໄກ່​ເກ່ຍ ​ແລະ ຈັດ​ຕັ້ງ​ປະຕິບັດ ການ​ຊົດ​ເຊີຍ​ຄອບຄົວ​ຖືກ​ຜົນ​ກະທົບຈາກໂຄງ ການຊົນ ລະປະ ທານ ແລະ ຊັບ​ຊ່າວ​ນາ ບ້ານ​ນາ ສາ​ວນາງ, ສຳ​ຫລວດ​ຄອບຄົວ​ເປົ້າ​ໝາຍການ​ຊັບ​ຊ່າວ​ນາ​ຄັ້ງ​ທີ 2 ສຳ​ເລັດ 17 ບ້ານ. ສຳລັບສົກ​ປີ 2013-2014 ໄດ້ສະໜັບສະໜູນ 8 ບ້ານ, ມີ 104 ຄອບຄົວ, ສຳ​ເລັດ​ການ​ປະ​ມູນ ແລະ ສັນຍາ​ວຽກ​ຊັບ​ຊ່າວ​ນາ, ລິ​ເລີ່​ມ ວຽກ​ພາກ​ສະ ໜາມ; ກິດຈະກຳ​ການ​ສົ່ງ​ເສີມ​ກະສິກຳ ​ແລະ ລ້ຽງສັດ ​ໄດ້​​ກໍ່ ສ້າງ​ສູນ​ ແລະ ສຸມ​ໃສ່​ວຽກ​ສາ ທິດ​ສຳ​ເລັດ 90% (ປູກ​ຫຍ້າ, ລ້ຽງ​ກົບ, ກ້າ​ເບ້ຍ​ໄມ້, ລ້ຽງສັດ​ປີກ, ​ປູກໄມ້ໃຫ້​ໝາກ, ປູ​ກຜັກ​ລະດູ​ແລ້ງ ​ແລະ ​ເຮື​ອນຮົ​່ມ, ຝຸ່ນ​ບົ່ມ ​ຊີວະ​ພາບ ​ແລະ​ ສະ​ໜູນ​ໄພ, ສຳ​ເລັດ​ກາ​ນສ້າງ​ແຜນ​ປະຈຳ​ປີ ແລະ ພາລະ​ບົດບາດ​ຂອງ​ສູນ ເພື່ອ​ສົ່ງ​ໃຫ້​ຫ້ອງການ​ກະສິກຳ​ຕິດຕາມ ​ແລະ ຄຸ້ມ​ຄອງ ​ແລະ ຫາ​ງົບ​ສະໜັບສະໜູນ​ຕໍ່​ຈາກ​ພາກ​ລັດ.

ຜ່ານ​ຈາກ​ການຈັດ​ຕັ້ງ​ປະ ຕິບັດ​ຂອງ​ໂຄງການ​ນີ້ ໃນ​ໄລຍະ 3 ປີ​ກ່ວາ​ຜ່ານ​ມາ​ມີ​ທັງ​ດ້ານ​ດີທີ່​ຈະ​ຕ້ອງ​ສືບຕໍ່​ສົ່ງ​ເສີມ ແລະ ບັນ ຫາສິ່ງ​ທ້າ​ທ້າຍທີ່​ຈະ​ຕ້ອງ​ແກ້​ໄຂຄື: ການ​ໄກ່​ເກ່ຍຂໍ້​ຂັດ​ແຍ່ງ ກັບ​ຜູ້​ຊົມ​ໃຊ້​ທີ່​ດິນເຂດ​ດິນ​ປ່າ​ສະຫງວນຕ້ອງໄຊ້​ເວລາ, ການ​ປູກ​ປ່າ​ຂອງ​ບໍລິສັດ​ຕ່າງໆ​ຍັງ​    ສ​ົ່ງຜົນ​ສະທ້ອນ​ໃຫ້​ປະຊາຊົນ​ມີ​ຄວາມ​ລັງ​ເລ​ໃຈ​ເຂົ້າຮ່ວມ​ຂະ​ບວນການ​, ການ​ປະຕິບັດ​ສັນຍາ​ຂອງ​ຊາວບ້ານ​ບໍ່​ມີ​ຜົນ​ສັກສິດ​ເທົ່າ​ທີ່​ຄວນ ເຮັດ​ໃຫ້​ຕົວ​ເລກ​ມີ​ການ​ປ່ຽນແປງໄປເລື້ອຍໆ.