ຮັກໃສໃສ…ຫົວໃຈມັດທະຍົມ ຕອນທີ 25

ຕອນທີ 25 ຄວາມຮັກກຳລັງລະເບີດ

ເຊົ້າວັນອາທິດພວກເຂົາທັງສີ່ກໍ່ໄດ້ມາຮວມຕົວກັນທີ່ເຮືອນຂອງໂທນີເພື່ອຄົ້ນຄວ້າບົດຮຽນ ວັນນີ້ພວກເຮົາໄດ້ຄົ້ນຄວ້າວິຊາຟີຊິກ ເຊິ່ງໃຊ້ເວລາດົນກວ່າສາມຊົ່ວໂມງກວ່າຈະແລ້ວ ແຕ່ກ່ອນທີ່ພວກເຂົາຈະເກັບອຸປະກອນຢ່າງປື້ມ ບິກ, ໄມ້ບັນທັດເຂົ້າໄວ້ໃນກະເປົາ ທັງສີ່ຄົນກໍ່ໄດ້ສົນທະນາກັນ

ເກສອນ: ຫຼັງຈາກຈົບ ມໍ6 ແລ້ວພວກເຮົາຈະຮຽນຫຍັງຕໍ່! ອະນາຄົດພວກເຮົາຄິດໄວ້ແລ້ວບໍ່ຢາກເປັນຫຍັງ
ມັງກອນ: ຂ້ອຍມັກການແຕ້ມຮູບຂ້ອຍຢາກເປັນນັກສີລະປະກຳ ແລະ ຢາກເປັນນັກແຕ້ມກະຕູນຜູ້ມີຊື່ສຽງ! ເອີ້! ແລ້ວມາລີຢາກເປັນຫຍັງ! ຢ່າບອກໃດ໋ວ່າອະນາຄົດເຈົ້າຢາກໄດ້ຂ້ອຍເປັນຜົວ
ມາລີເບິ່ງໜ້າມັງກອນແບບໜ້າເຊັງໆ: ບໍ່ຂຳ
ໂທນີກັບເກສອນກໍ່ເບິ່ງໜ້າມັງກອນດ້ວຍສາຍຕາບໍ່ຄ່ອຍພໍໃຈປານໃດ
ມາລີ: ອືມມມ! ຍັງບໍ່ຮູ້ເລີຍວ່າຢາກເປັນຫຍັງ!ແລ້ວໂທນີລ່ະຢາກເປັນຫຍັງ
ໂທນີ: ຂ້ອຍຢາກເປັນສັດຕະວະແພດ
ມາລີ: ເຮີ້ຍດີ! ປົວສັດຂ້ອຍມັກ! ຊັ້ນຂ້ອຍສິເປັນສັດຕະວະແພດຄືກັບເຈົ້າ
ເກສອນ: ຕາມຜູ້ຊາຍວ່າຊັ້ນສະ! ມາລີຂອງເຮົານິຮ້າຍບໍ່ເບົາ
ມັງກອນເວົ້າດ້ວຍນ້ຳສຽງອິດສາ: ເຮີ້ຍເກສອນຢ່າເວົ້າແບບນັ້ນ! ມາລີຂອງຂ້ອຍບໍ່ເປັນຄົນແບບນັ້ນ! ສັດຕະວະແພດບໍ່ເຫັນເທ້ບ່ອນໃດເລີຍ! ມາລີມາເປັນນັກສີລະປະກຳຄືຂ້ອຍດີກວ່າ
ມາລີ: ພໍໆ! ເອີ້ແລ້ວເກສອນເດະເຈົ້າຢາກເປັນຫຍັງ
ເກສອນ: ຂ້ອຍຢາກເປັນດີໄຊເນີ້ອອກແບບເສື້ອຜ້າ
ມາລີ: ວ້າວ…! ອາຊີບເກສອນບໍ່ທຳມະດາເດີ້! ຕໍ່ໄປຂ້ອຍຄົງໄດ້ໃສ່ຊຸດທີ່ເຈົ້າອອກແບບ
ມັງກອນ: ຕັດໃຫ້ຂ້ອຍຈັກຊຸດແນ່ເດີ້ເກສອນ
ເກສອນຕອບດ້ວຍຮອຍຍິ້ມປົນເຂີນເລັກນ້ອຍ: ໄດ້ໆ

ທີ່ໂຮງຮູບເງົາສູນການຄ້າລາວ-ໄອເຕັກ ເກສອນອາສາໄປຕໍ່ແຖວຊື້ປີ້ເຂົ້າຊົມຮູບເງົາ, ມັງກອນໄປເຂົ້າຫ້ອງນ້ຳ ສ່ວນໂທນີກັບມາລີໄປຊື້ຂະໜົມແລະນ້ຳ ໃນລະຫວ່າງທີ່ໂທນີຢືນລໍຖ້າມາລີເລືອກຂະໜົມ ແລະ ນ້ຳຢູ່ນັ້ນກໍ່ມີສອງສາວງາມສູງຍາວຂາວຈວັກເອິກໃຫຍ່ນຸ່ງສັ້ນຍ່າງເຂົ້າມາຫາໂທນີ ພ້ອມກັບສະແດງສີໜ້າທ່າທີສົນໃຈ ສອງສາວໄດ້ເອີ່ຍຖາມໂທນີດ້ວຍນ້ຳສຽງອ່ອນຫວານນວນຫູ
ສາວແປກໜ້າ: ຜູ້ບ່າວ! ມາຄົນຫວາ
ໂທນີເບິ່ງສອງສາວດ້ວຍສີໜ້ານິ້ງກ່ອນຕອບໄປດ້ວຍນ້ຳສຽງເຢັນຊາວ່າ: ມາກັບແຟນ
ເມື່ອໂທນີຕອບແບບນີ້ສອງສາວເຖິງກັບອຶ້ງໄປເລັກນ້ອຍ ແຕ່ສາວອີກຄົນກໍ່ຍັງຍິ້ມໜ້າເຈື່ອນໆຖາມໂທນີໄປວ່າ “ເຈົ້າຜູ້ຫຼໍ່ປານນີ້ແຟນເຈົ້າຄືສິຜູ້ງາມເນາະ”
ໂທນີກໍ່ຍັງໜ້ານິ້ງ ແລ້ວໂທນີກໍ່ຍ່າງໄປຫາມາລີພ້ອມກັບໂອບບ່າມາລີໄວ້ພ້ອມຖາມມາລີດ້ວຍນ້ຳສຽງນວນຫູວ່າ: ໄດ້ລ່ະບໍ່
ມາລີແປກໃຈເລັກນ້ອຍທີ່ໂທນີໂອບບ່າ ແຕ່ມາລີກໍ່ຢືນນິ້ງດ້ວຍສີໜ້າຍີ້ມແຍ້ມທ່າມກາງສາຍຕາຄົນແຖວນັ້ນທີ່ຈ້ອງເບິ່ງຢ່າງອິດສາ
ມາລີ: ແລ້ວພໍດີ
ໂທນີ: ທັງໝົດເປັນທໍ່ໃດ
ແມ່ຄ້າ: ທັງໝົດ 50,000 ກີບ
ໂທນີຈົກເງິນຈ່າຍມື້ຊາຍຈັບເອົາຖົງ ມືຂວາໂອບບ່າມາລີທັງສອງຍ່າງໄປຈາກບໍລິເວນນັ້ນພ້ອມກັນແບບຄູ່ຮັກ ເຊິ່ງມັນໄດ້ສ້າງຄວາມຜິດຫວັງໃຫ້ກັບສາວໆບລິເວນນັ້ນ ທັງຍິງຊາຍແຖວນັ້ນງຶດຫົວສິແຕແຖບບໍ່ເຊື່ອສາຍຕາ ເພາະດ້ວຍຄວາມຫຼໍ່ລະດັບທະລຸກະແລັກຊີຂອງໂທນີບໍ່ໜ້າຈະໄດ້ແຟນລະດັບບ້ານໆແບບມາລີ
ສາວແປກໜ້າທັງສອງເຖິງກັບສ່າຍໜ້າ ແລະ ເວົ້າດ້ວຍສີໜ້າປົນອິດສາ: ເສຍດາຍຂອງ! ນີ້ລະເນາະທີ່ເພິ່ນວ່າຄົນຫຼໍ່ມັກຈະໄດ້ແຟນຂີ້ລ້າຍ
ມາລີກັບໂທນີຮຽງຂ້າງກັນຂຶ້ນຄັນໄດເລື່ອນໄປຮອດຊັ້ນສອງແລ້ວໂທນີກໍ່ຄ່ອຍປ່ອຍມືທີ່ໂອບບ່າມາລີອອກຢ່າງຊ້າໆ ມາລີກໍ່ເບິ່ງໜ້າໂທນີແບບເຂີນໃນໃຈ ທັງສອງຍ່າງມຸ່ງໜ້າໄປຫາເກສອນກັບມັງກອນທີ່ກຳລັງຢືນຖ້າ
ມັງກອນ: ວ່າສິລົງໄປນຳລະໃດ໋ນິ ແຕ່ເກສອນຈັກເປັນຫຍັງຂວາງໄວ້ຢູ່ຫັ້ນລ່ະ
ເກສອນ: ເອ໋ະ! ມາລີໜ້າເພິ່ນຄືແດງແທ໋ະ
ມາລີຍື່ນຈອກນ້ຳໃຫ້ເກສອນ ແລະ ມັງກອນດ້ວຍຍິ້ມເບົາໆ: ສົງໃສອາກາດມັນຄົງຮ້ອນໜ້າເຂົາກໍ່ເລີຍແດງ
ມັງກອນກັບເກສອນແນມເບິ່ງໜ້າມາລີແບບງົງໆ ກ່ອນທີ່ເກສອນຈະເວົ້າອອກໄປວ່າ: ຫ່ະ! ເພິ່ນວ່າຮ້ອນເຂົາລະໜາວແອຣ໌ສິຕາຍລ່ະນິ
ມັງກອນເອົາມືໄປແຕະໜ້າຜາກມາລີ: ບໍ່ສະບາຍຫວະ! ຫົວກະບໍ່ໄດ້ຮ້ອນນ່ະ
ໂທນີເຫັນມັງກອນເອົາມືມາສຳພັດໜ້າມາລີກໍ່ຮູ້ສຶກຫງຸດງິດໃຈຈົນຄິ້ວຢັບເຂົ້າມາຫາກັນ ໂທນີລີຍເອົາມືຊ້າຍຈັບມືຂວາມາລີຍ່າງໄປຕໍ່ໜ້າຕໍ່ຕາມັງກອນກັບເກສອນ ມັງກອນກໍ່ແນມເບິ່ງດ້ວຍສີໜ້າບໍ່ພໍໃຈແຮງຈິ່ງໄດ້ໃຊ້ມືເບື້ອງໜຶ່ງຂອງເຂົາຄວ້າມືອີກເບື້ອງຂອງມາລີໄວ້ ເຮັດໃຫ້ມາລີກັບໂທນີທີ່ກຳລັງຍ່າງຕ້ອງຢຸດຍ່າງຕໍ່ ທັງສອງແນມມາເບິ່ງໜ້າມັງກອນ ເກສອນກໍ່ແນມເບິ່ງພວກເຂົາທັງສາມດ້ວຍໃຈຫວັ່ນໆເພາະຢ້ານມີເລື່ອງ ເນື່ອງຈາກອາລົມຂອງມັງກອນທີ່ຮ້ອນງ່າຍ ເມື່ອບໍ່ພໍໃຈສິ່ງໃດກໍ່ຈະຟິວຂາດງ່າຍ
ເກສອນ, ມາລີ: ງານເຂົ້າແລ້ວ
ມັງກອນ ແລະ ໂທນີໃຊ້ສາຍຕາຟາດຟັນກັນທ່າມກາງສາຍຕາຄົນຈຳນວນຫຼາຍ ເພື່ອໃຫ້ສະຖານະການທີ່ຕຶງຄຽດນີ້ຜ່ອນຄາຍມາລີເລີຍແກ້ງຍິ້ມໃຫ້ທັງສອງພ້ອມເວົ້າຕິດຕະຫຼົກ
ມາລີ: ວ້າວ! ນາງເອກໃນຮູບເງົາມື້ນີ້ຕ້ອງອິດສາຂ້ອຍ ເພາະມື້ນີ້ຂ້ອຍຄວງສອງ! ແມ່ນບໍ່ເກສອນ
ເກສອນກໍ່ຕີນຽນ: ແມ່ນໆ
ມາລີ: ໄປຊັ້ນ! ອົງຄະລັກທັງສອງເຮົາມາຍ່າງເຂົ້າໂຮງຮູບເງົາພ້ອມກັນ
ຫຼັງເວົ້າຈົບມາລີສົ່ງສັນຍານຂະຍິບຕາໃສ່ເກສອນພ້ອມທັງເວົ້າຕິດຕະຫຼົກ: ສະໜົມນຳມາ
ມາລີຍ່າງຢູ່ທາງກາງໂດຍມີໜຸ່ມສຸດຫຼໍ່ຈັບມືຊ້າຍ-ຂວາ ເກສອນເຖິງຈະຮູ້ສຶກເສົ້າກັບຄວາມໂດດດ່ຽວຂ້ອງຕົນເອງແຕ່ກໍ່ກັ້ນໃຈທົນໄວ້
ໃນໂຮງຮູບເງົາມາລີນັ່ງຂັ້ນກາງລະຫວ່າງມັງກອນ ກັບ ໂທນີ ສ່ວນເກສອນເຖິງຈະນັ່ງຂ້າງໆມັງກອນ ແຕ່ກໍ່ຮູ້ສຶກເຫງົາ ເຖິງວັນນີ້ຈະເປັນການມາທ່ຽວກັບເພື່ອນໆເຖິງຈະມາກັນຫຼາຍຄົນ ມີຜູ້ຄົນຫຼາກຫຼາຍຍ່າງສວນທາງໄປມາແຕ່ສິ່ງທີ່ເກສອນສຳພັດໄດ້ກໍ່ຄືຄວາມເຫງົາເທົ່ານັ້ນ ຫຼັງອອກຈາກທີ່ພວກເຂົາອອກຈາກໂຮງຮູບເງົາ ມາລີມີສີໜ້າສົດຊື່ນ
ມາລີ: ເກສອນ ເພິ່ນວ່າຮູບເງົາມື້ນີ້ມ່ວນບໍ່! ເຂົາວ່າໜັງເລື່ອງນີ້ໂຄດໂຣແມນຕິກເລີຍ ມັກພະເອກ ເຖິງພະເອກຈະເປັນຄົນນິ້ງໆ ເຢັນຊາ ບໍ່ເວົ້າຫຼາຍ ແຕ່ການສະແດງອອກນີ້ໂຄດຮັກນາງເອກເລີຍ (ເວົ້າແລ້ວກໍ່ແນມເບິ່ງໂທນີພ້ອມຄິດໃນໃຈ “ຖ້າໂທນີເປັນຄືພະເອກໃນເລື່ອງ ແລະ ເຮົາເປັນນາງເອກກໍ່ຄົງດີ”)
ເກສອນມິດງຽບ ບໍ່ມີຄຳເຫັນໃດໆກ່ຽວກັບເລື່ອງນີ້ ຄວາມງຽບຂອງເກສອນຈົນເຮັດໃຫ້ມາລີຮູ້ສຶກແປກໃຈ
ມາລີ: ເກສອນ! ຄືງຽບຜິດປົກກະຕິແທະຫຼັງຈາກອອກຈາກໂຮງຮູບເງົາມາ! ເປັນຫຍັງຊຶ້ງກັບໜັງຫຼາຍຫວະ
ເກສອນ: ຄົງປະມານນັ້ນ! ເຮົາຈະກັບກັນເລີຍບໍ່ ຂ້ອຍຮູ້ສຶກບໍ່ສະບາຍ
ມາລີ: ຫ່ະ! ເພິ່ນບໍ່ສະບາຍຫວະ! (ມາລີເອົາມືໄປແຕະໜ້າຜາກເກສອນເບົາໆ) ຫົວກະບໍ່ໄດ້ຮ້ອນນິ
ມັງກອນເອົາມືໄທັງສອງໄປຈັບໜ້າເກສອນເບົາໆພ້ອມຖາມດ້ວຍສີໜ້າຍິ້ມແຍ້ມ: ຊືມຫຍັງເດ້ອີ່ສ່ຽວຄົນງາມເອີ້ຍ
ເກສອນຄ່ອຍເອົາມືຂອງມັງກອນອອກຈາກໜ້ານາງແລ້ວເວົ້າດ້ວຍທ່າທາງນ້ອຍໃຈເບົາໆ: ບໍ່ໄດ້ຊຶມ ແຕ່ຂ້ອຍຢາກກັບບ້ານ
ມັງກອນໃນໃຈຮູ້ສຶກຍັງບໍ່ເຕັມອື່ມກັບການມາທ່ຽວໃນເທື່ອນີ້ ແຕ່ເມື່ອເກສອນເບິ່ງເໝື່ອຍໆມັງກອນເລີຍຕາມໃຈເພື່ອນ
ມັງກອນ: ຊັ້ນມື້ນີ້ເຮົາພໍເທົ່ານີ້ກ່ອນບໍ່! ມາລີໂອເຄບໍ່ ຫຼື ວ່າເຈົ້າຢາກເລາະເບິ່ງກ່ອນ
ມາລີ: ບໍ່ໆ! ເຮົາກັບກັນເລີຍດີກວ່າ
ພວກເຂົາທັງສີ່ຄົນຍ່າງອອກມາຈາກຕຶກໄອເຕັກມຸ່ງໜ້າໄປທີ່ຄອກລົດ ມັງກອນຕ້ອງການໃຫ້ມາລີມານັ່ງຊ້ອນທ້າຍ ແຕ່ມາລີປະຕິເສດໂດຍອ້າງວ່າເກສອນບໍ່ສະບາຍມັງກອນຕ້ອງຟ້າວພາເກສອນກັບເຮືອນ ເພາະທາງບ້ານມັງກອນກັບເກສອນນັ້ນເປັນທາງດຽວກັນກັບນຳກັນມັນຖືກແລ້ວ ສ່ວນມາລີຈະກັບພ້ອມໂທນີເພາະທາງເຮືອນໄປທາງດຽວກັນ ມັງກອນຮູ້ສຶກຂັດໃຈເນື່ອງຈາກບໍ່ຕ້ອງການຈະໃຫ້ມາລີຊ້ອນລົດໄປກັບໂທນີ ແຕ່ເມື່ອເຫັນເກສອນເຫງົາໆ ມັງກອນກໍ່ຮູ້ສຶກເປັນຫ່ວງດັ່ງນັ້ນຈິ່ງຍອມເຮັດຕາມທີ່ມາລີບອກ

ທີ່ຫ້ອງນອນຂອງເກສອນ ເກສອນໄດ້ເປີດຄອມພິວເຕີ ແລະ ເຂົ້າໄປທີ່ Hi5 ນາງໄດ້ໂພສຮູບໝາໜ້າເສົ້າ (ຮູບໝາໜ້າເສົ້າມີຄວາມໝາຍວ່າ “ໂສດ ຫຼື ໂດດດ່ຽວ”) ມາລີ ກັບມັງກອນກໍ່ໄປກົດໄລນ໌ໃຫ້
ມາລີເບິ່ງຮູບແລ້ວກໍ່ຄິດໃນໃຈ (ເກສອນສື່ແບບນີ້ຕ້ອງການບອກຫຍັງ ແຕ່ໂພສເປັນຮູບໝາຄືກັນກັບເກສອນດີກວ່າ ເກສອນເຫັນຈະໄດ້ດີໃຈ ຢ່າງນ້ອຍກໍ່ຍັງມີເຮົາ)
ມັງກອນ: ສອງສາວມາອາລົມໃດລະນິຄືພາກັນໂພສຮູບໝາໜ້າເສົ້າຄ້າຍໆກັນ! ຊັ້ນເຮົາໂພສຄືກັບກະເຈົ້າກ່ອນຈະໄດ້ ໂພສຮູບໝາເປັນແກ໊ງ
ເກສອນເຫັນເພື່ອນທັງສອງໂພສຮູບໝາໜ້າເສົ້າແບບຕົນເອງກໍ່ຮູ້ສຶກແປກໃຈ ແລະ ໄດ້ແຕ່ຄິດ (ຫຼືຕອນນີ້ພວກເຂົາຈະຮູ້ສຶກໂດດດ່ຽວຄືເຮົາ)
ໂທນີເປັນເພື່ອນທາງ Hi5 ຂອງມາລີແບບລັບໆ ເຊິ່ງມາລີເອງກໍ່ບໍ່ຮູ້ວ່າໂທນີຕິດຕາມ Hi5 ຂອງຕົນເອງ ເນື່ອງຈາກວ່າໂທນີໃສ່ຊື່ Hi5 ເປັນລະຫັດ NE1314 ແລະ ຮູບທີ່ໃສ່ເປັນໂປຣຟາກໍເປັນຮູບກາຕູນໃນເກມ ເມື່ອເຫັນມາລີໂພສຮູບແບບນີ້ໂທນີກໍ່ເຂົ້າໃຈຄວາມໝາຍຮູບທັນທີ
ຢູ່ດີໆໂທນີກໍ່ເອົາມືຂຶ້ນມາແຕະທີ່ເອິກຂ້າງຊ້າຍຫົວໃຈຂອງເຂົາເຕັ້ນວິວໆ ໂທນີນັ່ງນິ້ງໄປພັກໜຶ່ງກ່ອນທີ່ຈະລຸກຈາກຕັ່ງແລ້ວຍ່າງມຸ່ງໜ້າໄປທີ່ເຮືອນຂອງມາລີ

ທີ່ໜ້າເຮືອນມາລີ ໂທນີຢືນສູງເດັ່ນກ່ອນຈະກົດໂທລະສັບຫາມາລີ
ມາລີ: ຫົກໂຫຼ! ນາງຟ້າກຳລັງເວົ້າ
ໂທນີ: ອອກມາຫາແນ່ ຖ້າຢູ່ໜ້າບ້ານ
ມາລີ: ເອ໋ະ
ມາລີວາງສາຍຈາກໂທນີແລ້ວຍ່າງມາໄຂປະຕູໜ້າບ້ານໃຫ້: ມີຫຍັງ
ໂທນີບໍ່ປາກຍ່າງໜ້ານິ້ງເຂົ້າມາໃນເຮືອນຂອງມາລີທັນທີ ໂດຍມາລີກໍ່ຍ່າງນຳຫຼັງໂທນີເຂົ້າໃນເຮືອນຂອງຕົນແບບງົງໆ ໂທນີຍ່າງເຂົ້າໄປໃນເຮືອນແນມຊ້າຍແນມຂວາແຕ່ບໍ່ເຫັນພໍ່ແມ່ຂອງມາລີເລີຍຖາມຫາ ມາລີໄດ້ບອກໄປວ່າພໍ່ແມ່ຂອງຕົນອອກໄປງານມັດແຂນພີ່ນ້ອງ ເດິກພຸ້ນຈິ່ງກັບ ພຽງໂທນີໄດ້ຍິນເທົ່ານັ້ນກໍ່ມຸ່ງໜ້າຍ່າງເຂົ້າຫາມາລີດ້ວຍສີໜ້າແວວຕາທີ່ຈິງຈັງ ມາລີຖອຍຫຼັງໄປຢືນແນບຟ້າເຮືອນເງີຍໜ້າເບິ່ງໂທນີດ້ວຍສີໜ້າຕົກໃຈເລັກນ້ອຍ
ມາລີ: ເພິ່ນສິເຮັດຫຍັງ
ໂທນີ: ຟັງດີໆ! ເພາະຂ້ອຍຈະບໍ່ເວົ້າຊ້ຳ
ມາລີພະຍັກໜ້າຕອບຮັບ: ອືມ
ໂທນີ: ເຮົາມາຄົບກັນເຖາະ
ຄຳທີ່ໂທນີເວົ້າເຮັດໃຫ້ມາລີອຶ້ງໄປທັນທີ ອາລົມຕອນນັ້ນສັບສົນແບບງົງໆມັນດີໃຈແບບບອກບໍ່ຖືກ
ມາລີເວົ້າ້ວຍນ້ຳສຽງສັ່ນໆແບບມຶນງົງດ້ວຍອາລົມທີ່ສັບສົນ: ນີ້ມັນບໍ່ແມ່ນຄວາມຈິງ ຫຼື ຄວາມຝັນ
ໂທນີເລີຍກົ້ມໜ້າລົງໄປຈູບຮີມສົບອັນບາງໆຂອງມາລີຢ່າງນຸ້ມນວນ
ໂທນີ: ຄວາມຝັນມັນສຳພັດບໍ່ໄດ້
ມາລີຄິດໃນໃຈ (ລະມຸນແບບນີ້ສະແດງວ່າ…ແມ່ນເລື່ອງຈິງ)
ໂທນີ: ຕໍ່ໄປເຈົ້າເປັນຜູ້ຍິງຂອງຂ້ອຍລະເດີ້
ມາລີຕອບຕົກລົງດ້ວຍຄວາມເຂີນອາຍໜ້າແດງຫູແດງ: ອືມ
ຫຼັງຈາກຜ່ານການຈູບພວກເຂົາໄດ້ພາກັນມານັ່ງທີ່ໂຊຟາ ມາລີກັບໂທນີນັ່ງນິ້ງໆບັນຍາກາດແສນມິດງຽບໄດ້ຍິນແຕ່ສຽງຫົວໃຈເຕັ້ນ ເວລານັ້ນທັງສອງຮູ້ສຶກເຂີນກັນຈົນບອກບໍ່ຖືກໄດ້ແຕ່ນັ່ງອົມຍິ້ມ

ແລງນີ້ທີ່ຕຽງນອນໃນຫ້ອງນອນຂອງທັງຄູ່ທັງມາລີ ແລະ ໂທນີພາກັນນອນບໍ່ຫຼັບເພາະຄິດເຫັນພາບຈູບທີ່ແສນຫວານກັບຄຳສາລະພາບຮັກ ພວກເຂົາມີທ່າທາງເຂີນອາຍບິດໂຕໄປມາທີ່ບ່ອນ ຫົວໃຈນີ້ເປັນສີດອກກຸຫຼາບຄວາມຮັກກຳລັງລະເບີດມັນຊ່າງສວຍງາມຄືລະດູດອກສະກຸລະບານ ຟ້າຝົນລົມໜາວຄວາມແຫ້ງແລ້ງໄປພັດຜ່ານລະດູໃບໄມ້ປົ່ງຄວາມອບອຸ່ນກຳລັງເຄື່ອນຕົວເຂົ້າມາປົກຄຸມທຸກພື້ນທີ່ຂອງຫົວໃຈຂອງທັງຄູ່
ມາລີນອນຄິດໃນໃຈດ້ວຍສີໜ້າຍິ້ມແຍ້ມ (ໃນທີ່ສຸດຄວາມຝັນເຮົາກໍ່ເປັນຈິງ)
ໂທນີນອນຄິດໃນໃຈ (ຮັກຕ້ອງກ້າຫານ! ເຈົ້າເປັນຜູ້ຍິງຂອງຂ້ອຍລະເດີ້ນາງເປັດໂງ່)

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.