ການລະບາດໂຄວິດ-19 ເຮັດໃຫ້ນັກທ່ອງທ່ຽວທົ່ວໂລກປີນີ້ຫຼຸດລົງເກືອບ 60%

ເວັບໄຊ bangkokbiznews ລາຍງານໂດຍອ້າງແຫຼ່ງຂ່າວຈາກ ອອກຟັອດ ອີໂຄໂນມິກ ບໍລິສັດວິໄຈຈາກອັງກິດເປີດເຜີຍວ່າ ຄວາມຕ້ອງການທ່ອງທ່ຽວຕ່າງປະເທດທົ່ວໂລກ ຈະຫຼຸດລົງ 57% ໃນປີ 2020 ເນື່ອງຈາກ ມາດຕະການຄວບຄຸມການເດີນທາງລະຫວ່າງປະເທດ ແລະ ການກັກຕົວທີ່ເຂັ້ມງວດເພື່ອຄວບຄຸມ ການແຜ່ລະບາດຂອງໂຄວິດ-19.

ລາຍງານລະບຸວ່າ ຄວາມຕ້ອງການທ່ອງທ່ຽວຕ່າງປະເທດທົ່ວໂລກຈະບໍ່ກັບເຂົ້າສູ່ລະດັບປີ 2019 ຈົນກວ່າຈະເຖິງປີ 2024 ສະທ້ອນໃຫ້ເຫັນເຖິງຜົນກະທົບທາງເສດຖະກິດທີ່ເກີດຈາກການແຜ່ລະບາດຂອງໂຣກ ແລະ ຄວາມເຊື່ອໝັ້ນທີ່ຫຼຸດລົງຕໍ່ການທ່ອງທ່ຽວລະຫວ່າງປະເທດ ລວມເຖິງຜົນກະທົບຕໍ່ການທ່ອງທ່ຽວທັງເພື່ອທຸລະກິດ ແລະ ເພື່ອການພັກຜ່ອນ.

ນອກຈາກນີ້, ເຖິງແມ່ນວ່າຫຼາຍປະເທດຈະເລີ່ມເປີດປະເທດອີກຄັ້ງ ແຕ່ຍັງມີຄວາມລຳບາກຫຼາຍໃນການຫາຈຸດສົມດຸນລະຫວ່າງການຄວບຄຸມໂຄວິດ-19 ແລະ ການຟື້ນຟູການທ່ອງທ່ຽວ.

ລາຍງານຍັງລະບຸອີກວ່າ ທຸກພາກພື້ນມີແນວໂນ້ມຈະມີນັກທ່ອງທ່ຽວຫຼຸດລົງ ໂດຍທະວີບອາເມລິກາເໜືອຈະໄດ້ຮັບຜົນກະທົບໜັກທີ່ສຸດ ຄາດວ່ານັກທ່ອງທ່ຽວຈະຫຼຸດລົງໜັກເຖິງ 70%, ອາຊີປາຊີຟິກຫຼຸດລົງ 57% ແລະ ເອີຣົບປັບຕົວລົງທີ່ 56%.

ຮຽບຮຽງຂ່າວ: ພຸດສະດີ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.