ກະຊວງ ຖວທ ກຽມພ້ອມຮັບໃຊ້ ກອງປະຊຸມສຸດຍອດອາຊຽນ

ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຖະແຫຼງຂ່າວຕໍ່ສື່ມວນຊົນກ່ຽວກັບການກະກຽມປະກອບສ່ວນ ໃນການຈັດກອງປະຊຸມສຸດຍອດອາຊຽນ ທີ່ ສປປ ລາວ ເປັນເຈົ້າພາບໃນຕົ້ນເດືອນກັນຍາ ຈະມາເຖິງນີ້ ເມື່ອວັນທີ 19 ສິງຫານີ້ ທີ່ກະຊວງດັ່ງກ່າວວ່າ: ກະຊວງ ຖວທ ໄດ້ຮັບການມອບໝາຍ ໃຫ້ຮັບຜິດຊອບວຽກງານທາງ ດ້ານຖະແຫຼງຂ່າວ, ວັດທະນະທຳ ແລະ ສິລະປະ ຊຶ່ງເປັນອະນຸກຳມະການໜຶ່ງ ໃນບັນດາອະນຸກຳມະການ ຮັບຜິດຊອບລະດັບຊາດ ກ່ຽວກັບການກະກຽມ ແລະ ຈັດງານດັ່ງກ່າວ, ນັບແຕ່ໄດ້ຮັບການມອບໝາຍໜ້າທີ່ມາ ພວກເຮົາກໍໄດ້ມີການກະກຽມ ແລະ ຈັດຕັ້ງປະຕິບັດບາງວຽກແລ້ວ ຊຶ່ງໄດ້ມີການແຕ່ງຕັ້ງບຸກຄະລາກອນຕ່າງໆ ເຂົ້າຮ່ວມໃນອະນຸກຳມະການ ໃນນັ້ນນອກຈາກໜ່ວຍງານຮັບຜິດຊອບ ກ່ຽວກັບເລຂານຸການ, ດ້ານບໍລິຫານຕ່າງໆແລ້ວ ພວກເຮົາໄດ້ມີໜ່ວຍງານສະເພາະ ທາງດ້ານວຽກງານຖະແຫຼງຂ່າວສື່ມວນຊົນ ໃນນັ້ນໄດ້ແບ່ງອອກເປັນ 2 ພາກສ່ວນໃຫຍ່ຄື: ໜ່ວຍງານຮັບຜິດຊອບ ວຽກງານຖະແຫຼງຂ່າວ (ນັກຂ່າວພາຍໃນ), ໜ່ວຍງານຮັບຜິດຊອບໂຄສະນາຕ່າງປະເທດ (ນັກຂ່າວຕ່າງປະເທດ) ແລະ ພາກສ່ວນຮັບຜິດຊອບ ວຽກງານວັດທະນະທຳ, ການສະແດງສິລະປະ ນອກຈາກນັ້ນວຽກງານຮູບເງົາ ໄດ້ມີການກະກຽມຮູບເງົາສາລະຄະດີສັ້ນ ທີ່ມີຄວາມຍາວ 5-7 ນາທີ ເພື່ອກະກຽມສາຍ ໃນເວລາເປີດກອງປະຊຸມ, ວຽກງານສິລະປະວັດທະນະທຳ ໂດຍໄດ້ຮັບການຊີ້ນຳຈາກຂັ້ນເທິງ ຊຶ່ງມາຮອດປັດຈຸບັນ ແມ່ນໄດ້ກະກຽມເປັນລາຍການຢ່າງລະອຽດ ຊຶ່ງຈະໄດ້ມີການສະແດງໃຫຍ່ 2 ຄັ້ງ, ນອກຈາກນັ້ນ ຈະມີການສະແດງລາຍການສະເພາະ ຂອງແຕ່ລະປະເທດ. ໂດຍພື້ນຖານມາຮອດປັດຈຸບັນ ໄດ້ສຳເລັດແລ້ວ ແລະ ໃນວັນທີ 1 ເດືອນກັນຍາ ແມ່ນຈະໄດ້ນຳເອົາລາຍການຕ່າງໆ ໄປຜ່ານຄະນະຮັບຜິດຊອບລະດັບຊາດເປັນຄັ້ງສຸດທ້າຍ.

ທ່ານກ່າວຕື່ມວ່າ: ສະເພາະກອງປະຊຸມປິ່ນອ້ອມຕ່າງໆ ໃນນັ້ນແມ່ນກອງປະຊຸມ ທີ່ກະຊວງພວກເຮົາມີສ່ວນຮັບຜິດຊອບ ໃນຖານະທີ່ເປັນຈຸດປະສານງານ ໃຫ້ແກ່ເສົາຄ້ຳວັດທະນະທຳ ແລະ ສັງຄົມ ແມ່ນຈະໄດ້ຈັດກອງປະຊຸມຄັ້ງທີ 2 ຂອງລັດຖະມົນຕີບັນດາປະເທດອາຊຽນ ທາງດ້ານເສົາຄ້ຳວັດທະນະທຳ ແລະ ສັງຄົມ ໂດຍຄັ້ງທີ 2 ນີ້ແມ່ນຈະໄດ້ຜ່ານເອກະສານທັງໝົດ ຂອງປະຊາຄົມເສົາຄ້ຳວັດທະນະທຳ ແລະ ສັງຄົມ, ເພື່ອສະເໜີໃຫ້ແກ່ກອງປະຊຸມສຸດຍອດອາຊຽນຮັບຮອງເອົາ ໃນນັ້ນເອກະສານທີ່ຈະໄດ້ຮັບຮອງ ແລະ ລົງນາມ ຮ່ວມແມ່ນມີ 8 ສະບັບ, ມາຮອດປັດຈຸບັນ ການກຽມແມ່ນດີຫຼາຍສົມຄວນ ແລະ ບັນດາປະເທດທີ່ໄດ້ຮັບບັດເຊີນ ກໍໄດ້ ຕອບຮັບມາແລ້ວ, ສ່ວນທາງດ້ານສະຖານທີ່ ກໍໄດ້ມີການກະກຽມເປັນທີ່ຮຽບຮ້ອຍແລ້ວ, ນອກຈາກນັ້ນ ໃນກອງປະຊຸມດັ່ງກ່າວ ຈະໄດ້ມີງານລ້ຽງ ແລະ ສະແດງສິລະປະວັດທະນະທຳຕື່ມອີກ.

ໂອກາດດັ່ງກ່າວ ທ່ານໄດ້ຮຽກຮ້ອງມາຍັງພໍ່ແມ່ພີ່ນ້ອງປະຊາຊົນລາວ ໂດຍສະເພາະຊາວນະຄອນຫຼວງວຽງຈັນ ໃຫ້ມີການປະກອບສ່ວນເຂົ້າເປັນເຈົ້າພາບທີ່ດີ ເພື່ອເຮັດໃຫ້ກອງປະຊຸມ ໄດ້ດຳເນີນໄປດ້ວຍບັນຍາກາດທີ່ດີທີ່ສຸດ ເຮັດໃຫ້ແຂກຕ່າງປະເທດ ທີ່ມາຮ່ວມກອງ ປະຊຸມໃນຄັ້ງນີ້ ເຫັນນະຄອນຫຼວງວຽງຈັນ ເປັນນະຄອນຫຼວງທີ່ໜ້າຢູ່ ມີຄວາມສະອາດສວຍງາມ, ມີຄວາມສະຫງ່າ, ມີສະເໜ່, ມີຄວາມສະຫງົບ ຕາມການພັດທະນານະຄອນຫຼວງ ໄປຕາມ 6 ສໍ.

 

ແຫລ່ງຂ່າວ:

ປຊຊ

ຕິດຕາມເຮົາທາງFacebook ກົດຖືກໃຈເລີຍ!

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.