“ລອງປັບຕົວໃຫ້ເຂົ້າກັບຕົວຕົນທີ່ແທ້ຈິງຂອງເຮົາເອງໃຫ້ໄດ້ຫຼາຍທີ່ສຸດ ແລ້ວເຮົາຈະພົບກັບຄວາມສຳເລັດໃນແບບຂອງເຮົາເອງ.”
ເວລາທີ່ເຮັດສິ່ງໃດແລ້ວບໍ່ສຳເລັດ ຫຼື ຍັງຄົງຮູ້ສຶກວ່າບໍ່ເຕັມທີ່ກັບມັນ ເຮົາເຄີຍຖາມຕົວເອງ ຫຼື ບໍ່ວ່າ ຕົວຕົນທີ່ແທ້ຈິງຂອງເຮົານັ້ນຄືຫຍັງ ເຮົາເປັນໂຕນາກ (ສັດທີ່ຊ່ຽວຊານດ້ານການລອຍນ້ຳ) ເປັນກະລອກ (ສັດທີ່ຊ່ຽວຊານດ້ານການປີນ) ຫຼື ເປັນໜູ (ສັດທີ່ຊ່ຽວຊານດ້ານການລົບຫຼີກອັນຕະລາຍ) ເພາະສັດສາມຊະນິດນີ້ມີຄວາມສາມາດພິເສດສະເພາະຕົວທີ່ຕ່າງກັນອອກໄປ ພວກມັນເກັ່ງຄົນລະແບບ ແຕ່ຖ້າຢູ່ຮ່ວມກັນໄດ້ ແລະ ສາມາດເຮັດວຽກຮ່ວມກັນໄດ້ອີກ ສັດສາມຊະນິດນີ້ຈະກາຍເປັນສຸດຍອດຄົນເຮັດວຽກເລີຍ. ລອງປັບຕົວໃຫ້ເຂົ້າກັບຕົວຕົນທີ່ແທ້ຈິງຂອງເຮົາເອງໃຫ້ໄດ້ຫຼາຍທີ່ສຸດ ແລ້ວເຮົາຈະພົບກັບຄວາມສຳເລັດໃນແບບຂອງເຮົາເອງ. ລອງປະຕິບັດຕາມຄຳແນະນຳງ່າຍໆ 3 ຂໍ້ຂ້າງລຸ້ມນີ້ ທີ່ອາດຈະເປັນຕົວຊ່ວຍໃຫ້ເຮົາໄປສູ່ຄວາມສຳເລັດໄດ້ງ່າຍຂຶ້ນ
- 1. ຍອມຮັບໃນຄວາມເປັນຕົວເຮົາ ແລະ ສັນຊາດຕະຍານໃນການຕັດສິນໃຈ
ສັນຊາດຕະຍານໃນການຕັດສິນໃຈຂອງຄົນນັ້ນແບ່ງໄດ້ເປັນສີ່ຂໍ້ໃຫຍ່ ໃຫ້ເຮົາລອງສັງເກດຕົວເອງງ່າຍໆ ວ່າເວລາທີ່ເຮົາຕັດສິນໃຈ ຫຼື ລົງມືເຮັດຫຍັງຈັກຢ່າງນັ້ນມີປັດໄຈຫຍັງແດ່ ໃນການເປັນຕົວຊ່ວຍໃຫ້ສິ່ງນັ້ນສຳເລັດລຸລ່ວງໄປ ໃນກໍລະນີນີ້ ຂໍຍົກຕົວຢ່າງເລື່ອງການຮຽນຮູ້ການຖັກດ້າຍ ເພາະແຕ່ລະຄົນຈະມີການຮຽນຮູ້ສິ່ງໃໝ່ໆ ຕ່າງກັນອອກໄປ ເຊັ່ນ:
- ຄົນຮຽນຮູ້ໄວ: ຖ້າເຮົາເປັນພວກຮຽນຮູ້ໄວ ສິ່ງທຳອິດທີ່ເຮົາຈະເຮັດຄື ອອກໄປຊື້ເຂັມຖັກດ້າຍ, ດ້າຍ ແລະ ປື້ມຝຶກເຮັດໃນທັນທີທັນໃດ ອາດຈະມີການສອບຖາມຜູ້ຮູ້ ສຳລັບເທັກນິກເລັກນ້ອຍ ແລະ ລົງມືເຮັດໄປໂດຍຮຽນຮູ້ຈາກຂໍ້ຜິດພາດຂອງຕົວເອງ
- ຄົນມັກຫາຂໍ້ມູນ: ກ່ອນທີ່ເຮົາຈະເລີ່ມເຮັດຫຍັງ ເຮົາມັກຈະໃຊ້ເວລາຫຼາຍຊົ່ວໂມງເພື່ອອ່ານ ແລະ ສຶກສາສິ່ງນັ້ນ ຫຼື ເບິ່ງຄົນທີ່ຖັກດ້າຍເກັ່ງໆ ສອບຖາມຂໍ້ຂ້ອງໃຈຢ່າງເຕັມທີ່ ເວົ້າງ່າຍໆ ວ່າເອົາທິດສະດີໃຫ້ເຕັມທີ່ກ່ອນຈະລົງມືປະຕິບັດຈິງ
- ຄົນມັກປະຍຸກ: ເຮົາຈະໃຫ້ຄວາມສຳຄັນກັບຄຳເວົ້າ ແລະ ຕຳລານ້ອຍກວ່າແນວທາງຕິບັດຂອງຕົນເອງ ດັ່ງນັ້ນເຮົາອາດຈະຮ່າງແບບການຖັກດ້າຍທີ່ຕ້ອງການຈະຖັກຂຶ້ນມາກ່ອນ ຫຼື ອາດຈະເລືອກຄວາມໜາ ແລະ ສີຂອງໄໝພົມ ກ່ອນທີ່ຈະຈັບເຂັມຂຶ້ນມາເລີ່ມຖັກ
- ຄົນມັກຄວາມທ້າທາຍ: ເຮົາຈະບໍ່ຖັກດ້າຍແບບທຳມະດາ ເຮົາຈະສ້າງຕຳລາຮຽນຍ່ອຍໆ ມາເພື່ອຕົວເຮົາເອງ ຫຼື ໄປຮຽນກັບອາຈານແບບເປັນຈິງເປັນຈັງ ແລະ ເຮັດຕາມຕຳລາເປ໊ະໆ ເພື່ອທີ່ຈະຮຽນຮູ້ວິທີການສ້າງຝີມືໃໝ່ໆ ໄດ້ໃນແບບຕົວເຮົາເອງ
ທັງສີ່ຂໍ້ທີ່ກ່າວມານີ້ ບໍ່ມີຫຍັງຖືກ ແລະ ຜິດ ທຸກເສັ້ນທາງສາມາດປະສົບຄວາມສຳເລັດໄດ້ຄືກັນ ແຕ່ສຳລັບຄົນທີ່ຍຶດຕິດຢູ່ກັບການກະທຳພຽງຂໍ້ດຽວອາດຈະຢາກທີ່ຈະລອງເຮັດຕາມແບບອື່ນໆ ເພາະໃນໜ້າທີ່ການງານ ເຮົາອາດຈະຕ້ອງລອງເຮັດທຸກຫົນທາງ ຄືກັບທີ່ໂຕຕຸ່ນຮຽນລອຍນ້ຳ ແລະ ໂຕນາກຮຽນປີນຕົ້ນໄມ້ ເຖິງວ່າມັນອາດຈະເປັນສິ່ງທີ່ເຮົາບໍ່ຖະນັດເລີຍກໍ່ຕາມ.
- 2. ໃຊ້ຈຸດແຂງຂອງເຮົາໃຫ້ເຕັມທີ່
ທຸກຄົນຮູ້ດີວ່າຕົວເອງຖະນັດ ແລະ ບໍ່ຖະນັດຫຍັງ ສິ່ງທີ່ຂໍ້ນີ້ຈະແນະນຳຄື: ຖ້າຮູ້ຕົວແລ້ວວ່າບໍ່ມັກເຮັດຫຍັງແທ້ໆ ກໍ່ຢ່າຝືນ ໃຫ້ຫາຫົນທາງທີ່ເຮົາເຮັດແລ້ວສະບາຍໃຈ ອີກທັງຍັງຮູ້ສຶກວ່າໄດ້ຮຽນຮູ້ເພີ່ມຂຶ້ນ ຍົກຕົວຢ່າງເຊັ່ນ: ຖ້າເຮົາເປັນຄົນທີ່ມັກເຮັດສິ່ງທີ່ຄືກັນເປັນປະຈຳ ບໍ່ມັກເລື່ອງແປກໃໝ່ ວິທີງ່າຍໆ ກໍ່ຄືຢ່າເຮັດວຽກຟຣີແລນຊ໌ (ອາຊີບອິດສະຫຼະ) ຖ້າເຮົາເປັນຄົນມັກປະດິດສິ່ງຕ່າງໆ ຢ່າຍອມທີ່ຈະຈົມປັກໄປກັບວຽກບັນຊີພຽງເພື່ອຈະຫາລ້ຽງຊີບ ໃຊ້ຄວາມຮູ້ສຶກຂອງເຮົາໃນການເພີ່ມປະສິດທິພາບໃນຕົວເຮົາໃຫ້ເຕັມທີ່ ແນ່ນອນວ່າໃນທຸກບໍລິສັດຈະມີຄົນແບບໂຕນາກ, ກະລອກ ແລະ ໜູ ມັນເປັນເລື່ອງປົກກະຕິທີ່ເກີດຂຶ້ນ ແຕ່ຢ່າໃຊ້ການກະທຳທີ່ອອກມາຈາກທຳມະຊາດຢ່າງດຽວ ແຕ່ໃຫ້ໃຊ້ມັນຢ່າງມີສະຕິ ແລ້ວເຮົາຈະໃຊ້ຈຸດແຂງຂອງເຮົາໄດ້ຢ່າງເຕັມທີ່ ອີກທັງຍັງສາມາດທີ່ຈະຢູ່ກັບຄົນທີ່ມີທຳມະຊາດຕ່າງຈາກເຮົາໄດ້ອີກດ້ວຍ
- 3. ຮ່ວມງານກັບຄົນທີ່ມີຄວາມສາມາດຕ່າງຈາກເຮົາ
ເມື່ອໂຕນາກ, ໂຕຕຸ່ນ, ກະລອກ ແລະ ໜູ ຕ້ອງມາເຮັດວຽກຮ່ວມກັນ ສິ່ງທີ່ດີທີ່ສຸດຂອງທີມແບບນີ້ກໍ່ຄື ແຕ່ລະຄົນຈະສະແດງດ້ານທີ່ຕົວເອງຖະນັດອອກມາ ແລະ ທີມຈະສາມາດເຮັດວຽກໄດ້ຫຼາຍຮູບແບບ ແລະ ມີພະລັງໃນການແກ້ບັນຫາໄດ້ຄົບດ້ານ ຍົກຕົວຢ່າງເຊັ່ນ: ສັດທັງສີ່ຈະສາມາດນໍາເອົາວັດຖຸດິບຕ່າງໆ ມາກັກຕຸນໄວ້ໄດ້ ເຊັ່ນ: ນ້ໍາ, ດິນ, ຕົ້ນໄມ້ ແລະ ຫຍ້າ ນີ້ເປັນອີກຫົນທາງໜຶ່ງທີ່ເຮົາຈະນຳເອົາສັກກະຍະພາບທີ່ແທ້ຈິງຂອງຕົວເຮົາອອກມາໄດ້ ເພາະຜູ້ຄົນຫຼວງຫຼາຍໃນປັດຈຸບັນນີ້ເສຍເວລາໄປຫຼາຍກັບການພະຍາຍາມເປັນຫຍັງຈັກຢ່າງທີ່ບໍ່ແມ່ນເຮົາ ເຮົາມັກຈະຮູ້ສຶກບໍ່ດີກັບຕົວເອງເວລາທີ່ລົ້ມເຫຼວ ແລະ ກໍ່ບໍ່ໄດ້ຮູ້ສຶກດີເທົ່າໃດເວລາທີ່ສຳເລັດ ເຮົາເບິ່ງຂ້າມຂໍ້ດີຂອງເຮົາໄປ ແທນທີ່ຈະຍອມຮັບ ແລະ ຍິນດີໄປກັບມັນ ເພາະເຮົາສາມາດເຮັດເລື່ອງຕ່າງໆ ໃນຊີວິດໃຫ້ໜ້າຕື່ນເຕັ້ນຂຶ້ນ ມີປະສິດທິພາບຂຶ້ນ ມີຄວາມສຸກຂຶ້ນ ແລະ ຄຸນນະພາບທີ່ດີຂຶ້ນໄດ້ ຊຶ່ງເຮົາຄວນຈະເລີ່ມຕັ້ງແຕ່ຕອນນີ້ເລີຍ
ແຫຼ່ງຂໍ້ມູນ: http://th.jobsdb.com/TH/TH/