ອົງການໆເງິນສາກົນ ຫຼື IFC ໃຫ້ການຊ່ວຍເຫຼືອ ສປປ ລາວ ໃນໂຄງການປັບປຸງລະບຽບການ ທີ່ຕິດພັນກັບການອຳນວຍຄວາມສະດວກໃຫ້ແກ່ການດຳເນີນທຸລະກິດຢູ່ ສປປ ລາວ ໃນໄລຍະ 3 ປີຕໍ່ໜ້າ ເພື່ອຊ່ວຍໃຫ້ລັດຖະບານລາວ ໃນການລົບລ້າງບັນດາຂັ້ນຕອນທາງດ້ານລະບຽບການ ແລະ ອອກໃບອະນຸຍາດດຳເນີນທຸລະກິດທີ່ບໍ່ຈຳເປັນ.
ການຊ່ວຍເຫຼືອຄັ້ງນີ້ ຈະສາມາດຫຼຸດຜ່ອນຂັ້ນຕອນໃນຂົງເຂດຕ່າງໆ ທີ່ສຳຄັນຕໍ່ການດຳເນີນທຸລະກິດ ຊຶ່ງລວມໄປເຖິງລະບຽບໃນການສ້າງຕັ້ງທຸລະກິດ ການອອກໃບອະນຸຍາດດຳເນີນທຸລະກິດ ແລະ ການປົກປ້ອງຜູ້ລົງທຶນ ຊຶ່ງຕົວຊີ້ວັດເຫຼົ່ານີ້ ແມ່ນໄດ້ວັດແທກຈາກບົດລາຍງານ ການດຳເນີນທຸລະກິດຂອງກຸ່ມທະນາຄານໂລກ ຊຶ່ງເຫັນວ່າມີຫຼາຍໆດ້ານທີ່ຕ້ອງໄດ້ຮັບການປັບປຸງຕື່ມອີກ.
ທ່ານ ມາມິລິອອດສ ຮັດຊິນິໂກລາອູ ຜູ້ຕາງໜ້າອົງການ IFC ປະຈຳ ສປປ ລາວ ກ່າວວ່າ: ຄວາມສະດວກໃນການດຳເນີນທຸລະກິດ ຈະຊ່ວຍປັບປຸງການແຂ່ງຂັນທາງດ້ານເສດຖະກິດຂອງ ສປປ ລາວ ຊຶ່ງຖືວ່າເປັນປັດໄຈທີ່ສຳຄັນ ພາຍຫຼັງການເຂົ້າເປັນສະມາຊິກຂອງອົງການໆຄ້າໂລກ ແລະ ການຈະເຂົ້າເປັນສ່ວນໜຶ່ງຂອງປະຊາຄົມເສດຖະກິດອາຊຽນ ນອກຈາກການຊ່ວຍເຫຼືອດ້ານການປັບປຸງລະບຽບການ ທີ່ຕິດພັນກັບວຽກງານດັ່ງກ່າວ IFC ຍັງຈະສືບຕໍ່ປຶກສາຫາລືກັບຄູ່ຮ່ວມໂຄງການ ແລະ ບັນດາຂະແໜງການອື່ນໆທີ່ກ່ຽວຂ້ອງ ແນໃສ່ປັບປຸງຄົ້ນຄວ້າ ແລະ ກຳນົດຂົງເຂດອື່ນໆທີ່ເຫັນວ່າ ຍັງຈຳເປັນທີ່ຈະຕ້ອງປັບປຸງເພື່ອຊ່ວຍເຫຼືອໃນການປັບປຸງ ແລະ ຊຸກຍູ້ຜົນການປະເມີນໂຕຊີ້ວັດຕ່າງໆຂອງການດຳເນີນທຸລະກິດໃນ ສປປ ລາວ ທີ່ກຳນົດໃນບົດລາຍງານການດຳເນີນທຸລະກິດປະຈຳປີຂອງກຸ່ມທະນາຄານໂລກ.
ພິທີເຊັນບົດບັນທຶກໂຄງການດັ່ງກ່າວ ໄດ້ຈັດຂຶ້ນໃນວັນທີ 21 ມີນາ 2013 ທີ່ກະຊວງແຜນການ ແລະ ການລົງທຶນ ຕາງໜ້າໃຫ້ອົງການ IFC ແມ່ນທ່ານ ມາມິລິອອດສ ຮັດຊິນິໂກລາອູ ແລະ ຕາງໜ້າໃຫ້ລັດຖະບານລາວ ແມ່ນທ່ານ ດຣ. ບຸນທະວີ ສີສຸພັນທອງ ຊຶ່ງມີບັນດາພາກສ່ວນກ່ຽວຂ້ອງເຂົ້າຮ່ວມເປັນພິຍານ.
ທີ່ມາhttp://www.vientianemai.net