ສຳນັກຂ່າວຕ່າງປະເທດ ລາຍງານໃນວັນທີ 28 ທັນວານີ້ວ່າ ກອງທັບອີຣັກ ປະສົບຜົນສຳເລັດ ສາມາດປົດປ່ອຍເມືອງຣາມາດີ ໄດ້ຢ່າງສົມບູນ ຊຶ່ງເປັນເມືອງຍຸດທະສາດຂອງປະເທດ ທີ່ຖືກກຸ່ມລັດອິດສະລາມ ຫລື ໄອເອັສຍຶດຄອງ ໂດຍຜົນສຳເລັດດັ່ງກ່າວນີ້ ແມ່ນເປັນໄຊຊະນະຄັ້ງຍິ່ງໃຫຍ່ທີ່ສຸດ ສຳລັບກອງທັບອີຣັກ ນັບຕັ້ງແຕ່ເປີດສາກບຸກໂຈມຕີ ກວາດລ້າງກຸ່ມໄອເອັສ ທີ່ຍຶດຄອງດິນແດນຂອງປະເທດ ເມື່ອປີທີ່ຜ່ານມາ.
ພາຍຫລັງຂ່າວກ່ຽວກັບ ການປົດປ່ອຍເມືອງຣາມາດີ ຊຶ່ງເປັນເມືອງເອກຂອງແຂວງອັນບາ ຈາກກຸ່ມໄອເອັສໄດ້ສຳເລັດ ແມ່ນໄດ້ມີຊາວອີຣັກຢູ່ຫລາຍເມືອງ ພາກັນເອົາທຸງຊາດອອກມາໂບກສະບັດ ເພື່ອສະຫລອງຜົນສຳເລັດດັ່ງກ່າວ.
