ກະສິກຳ​ອອກ​ຄຳ​ສັ່ງ​ເພີ່ມ​ທະວີ​ມ້ຽນ​ມັດ​ຜົນ​ຜະລິດລະດູແລ້ງ ຕິດ​ພັນ​ກະກຽມ​ຜະລິດ​ລະດູຝົນ

0
1095

ເພື່ອຍູ້ແຮງການຜະ­ລິດລະ­ດູ­ຝົນ ໂດຍສະ­ເພາະເຂົ້າ­ນາປີ 2016 ໃຫ້ບັນ­ລຸໃນເນື້ອ­ທີ່ 787 ພັນເຮັກ­ຕາ ດ້ວຍສະ­ມັດ­ຖະ­ພາບສະ­ເລ່ຍບໍ່ຫຼຸດ 4,24 ໂຕນຕໍ່ເຮັກ­ຕາ ແລະຜົນຜະ­ລິດບໍ່ຫຼຸດ 3,4 ລ້ານກວ່າໂຕນ ປະ­ກອບ­ສ່ວນໃຫ້ແກ່ການຜະ­ລິດເຂົ້າລວມຂອງປີໃຫ້ໄດ້ 4,2 ລ້ານ ໂຕນຂຶ້ນໄປນັ້ນ, ລັດຖະມົນຕີກະ­ຊວງກະ­ສິ­ກຳ-ປ່າ­ໄມ້ (ກປ) ໄດ້ເນັ້ນໃຫ້ພາກ­ສ່ວນກ່ຽວ­ຂ້ອງທົ່ວປະ­ເທດເອົາ­ໃຈ­ໃສ່ໃນຫຼາຍບັນ­ຫາສຳ­ຄັນເປັນ­ຕົ້ນ: ລົງຊຸກ­ຍູ້ປະ­ຊາ­ຊົນຂຸ້ນ­ຂ້ຽວເກັບ ມ້ຽນເຂົ້າ­ນາ­ແຊງ ແລະພືດລະ­ດູ­ແລ້ງໃຫ້ສຳ­ເລັດໃນທ້າຍ ເດືອນພຶດ­ສະ­ພາ, ສືບ­ຕໍ່ບຸກທະ­ລຸຢ່າງແຂງ­ແຮງກວ່າເກົ່າໃນການຫັນເອົາພະ­ນັກ­ງານລົງນຳ­ພາຊາວກະ­ສິ­ກອນຕົກ­ກ້າ ແລະ ປັກດຳເຂົ້າ­ນາປີຢ່າງຊ້າໃຫ້ສຳ­ເລັດ ພາຍໃນອາ­ທິດທີ 3 ຂອງເດືອນສິງ­ຫາ 2016.

ອີງຕາມຄຳສັ່ງຂອງທ່ານລັດຖະມົນຕີກະ­ຊວງກະ­ສິ­ກຳ-ປ່າໄມ້ກ່ຽວກັບການເພີ່ມທະ­ວີຄວາມຮັບ­ຜິດ­ຊອບຕໍ່ການເກັບມ້ຽນຜົນຜະ­ລິດລະ­ດູ­ແລ້ງຕິດພັນກັບການກະ­ກຽມເຂົ້າສູ່ການຜະ­ລິດລະດູຝົນປີ 2016 ນີ້ຮູ້ວ່າ: ເພື່ອຍູ້ແຮງການຜະ­ລິດລະ­ດູ­ຝົນ ໂດຍສະ­ເພາະເຂົ້າ­ນາປີ 2016 ໃຫ້ບັນ­ລຸໃນ ເນື້ອ­ທີ່ 787 ພັນເຮັກ­ຕາ ດ້ວຍສະ­ມັດ­ຖະ­ພາບສະ­ເລ່ຍບໍ່ຫຼຸດ 4,24 ໂຕນຕໍ່ເຮັກ­ຕາ ແລະຜົນຜະລິດບໍ່ຫຼຸດ 3,4 ລ້ານກວ່າໂຕນ ປະ­ກອບສ່ວນໃຫ້ແກ່ການຜະ­ລິດເຂົ້າລວມຂອງປີໃຫ້ໄດ້ 4,2 ລ້ານໂຕນຂຶ້ນໄປ, ຮັບໃຊ້ການບໍ­ລິ­ໂພກພາຍໃນໄດ້ຢ່າງໜັກແໜ້ນ ແລະທັງເປັນສິນ­ຄ້າສົ່ງອອກດ້ວຍການປຸກ­ລະ­ດົມຂະບວນທົ່ວປວງຊົນຢ່າງຟົດຟື້ນນັ້ນ, ໃຫ້ພາກ­ສ່ວນກ່ຽວ­ຂ້ອງຈົ່ງຮີບ ຮ້ອນເປັນເຈົ້າການສົມ­ທົບກັບພະແນກ ກະ­ສິ­ກຳ ແລະປ່າ­ໄມ້ປະ­ຈຳແຂວງ, ນະຄອນຫຼວງເອົາ­ໃຈ­ໃສ່ລົງຊຸກ­ຍູ້ປະ­ຊາ­ຊົນຂຸ້ນ­ຂ້ຽວເກັບກ່ຽວມ້ຽນມັດເຂົ້າ­ນາ­ແຊງ ແລະພືດລະ­ດູ­ແລ້ງໃຫ້ສຳ­ເລັດໃນທ້າຍເດືອນພຶດ­ສະ­ພາ, ນຳໃຊ້ມາດຕະ­ການຕ່າງໆເພື່ອຫຼີກລຽງຜົນກະ­ທົບຈາກສະພາບຝົນ­ຕົກໃນເດືອນພຶດ­ສະ­ພາອັນຈະເຮັດໃຫ້ຄຸນນະພາບຂອງເຂົ້າຕົກ­ຕໍ່າ ແລະເຊື່ອມຄຸນ, ພ້ອມກັນນັ້ນກໍ່ຕ້ອງຮີບຮ້ອນກະ­ກຽມເຂົ້າສູ່ການຜະ­ລິດລະ­ດູຝົນ 2016 ໃຫ້ທັນກັບວັນເປີດຂະບວນການຜະ­ລິດລະ­ດູ­ຝົນໃນຂອບເຂດທົ່ວປະເທດ (ວັນທີ 15 ພຶດ­ສະ­ພາ 2016).

ນອກນີ້ ແມ່ນໃຫ້ສືບ­ຕໍ່ບຸກທະ­ລຸຢ່າງແຂງ­ແຮງກວ່າເກົ່າໃນການຫັນເອົາພະ­ນັກ­ງານລົງນຳ­ພາຊາວກະ­ສິ­ກອນຕົກ­ກ້າ ແລະ ປັກດຳເຂົ້າ­ນາປີຢ່າງຊ້າໃຫ້ສຳ­ເລັດພາຍໃນອາ­ທິດທີ 3 ຂອງເດືອນສິງ­ຫາ 2016, ພ້ອມດຽວກັນກໍຕ້ອງໄດ້ຊຸກ­ຍູ້ສົ່ງ­ເສີມໃຫ້ຊາວກະ­ສິ­ກອນປູກພືດຜັກທີ່ເປັນທ່າ­ແຮງໃນທ້ອງ­ຖິ່ນຕົນ ເພື່ອຕອບສະ­ໜອງການບໍ­ລິ­ໂພກໃຫ້ແກ່ສັງ­ຄົມໄດ້ຢ່າງພໍພຽງ ທັງເປັນສິນ­ຄ້າສົ່ງອອກ, ໃຫ້ພາກ­ສ່ວນກ່ຽວ­ຂ້ອງກຳ­ນົດເຂດຈຸດສຸມຕົວແບບ ລວມທັງບ້ານ 3 ສ້າງ ແລະ ບ້ານຈຸດສຸມພັດ­ທະ­ນາປະ­ຕິ­ບັດຕາມທິດ ນຳທີ່ວ່າ “ທຸກວຽກຈຸດສຸມສຳ­ຄັນຕ້ອງ ມີຜູ້ເຮັດຕົວຈິງ ແລະມີຜູ້ຮັບ­ຜິດ­ຊອບນຳ ພາ-ຊີ້ນຳເປັນປະ­ຈຳ”, ສະ­ເພາະເຂດຈຸດ ສຸມຕ້ອງຮັບ­ປະ­ກັນສະ­ມັດ­ຖະ­ພາບສະ ເລ່ຍບໍ່ໃຫ້ຫຼຸດ 5,5 ໂຕນຕໍ່ເຮັກ­ຕາ ໂດຍມີການນຳໃຊ້ແນວພັນໃໝ່ທີ່ໃຫ້ຜົນຜະ­ລິດສູງ, ນຳໃຊ້ກົນຈັກ ແລະເຕັກ­ນິກກະ­ເສດສຸມຢ່າງຖືກ­ຕ້ອງຕາມທິດຫັນເປັນອຸດສາຫະກຳ ແລະທັນສະ­ໄໝ.

ໃຫ້ສືບ­ຕໍ່ຫັນເອົາວິ­ຊາການລົງຫາຈຸດສຸມກຸ່ມບ້ານ ເພື່ອນຳ­ພາປະ­ຊາ­ຊົນເຮັດຕົວຈິງຕາມທິດນຳທີ່ວ່າ “ນຳ­ພາປະ­ຊາຊົນປູກ, ລ້ຽງ ແລະຖ່າຍທອດເຕັກ­ນິກວິຊາການໃຫ້ປະ­ຊາ­ຊົນ” ຕິດພັນກັບການປຸກ­ລະ­ດົມປະ­ຊາ­ຊົນຂົນຝຸ່ນຄອກ, ຝຸ່ນບົ່ມ, ຝຸ່ນຊີ­ວະພາບລົງໃສ່ນາຕາມທິດກະ­ສິ­ກຳສະ­ອາດ, ເອົາ­ໃຈ­ໃສ່ໂຄ­ສະ­ນາເຜີຍ­ແຜ່ເຕັກ­ນິກໃໝ່ໂດຍຜ່ານສື່ຕ່າງໆ ຢ່າງເປັນຂະບວນຕໍ່ເນື່ອງ, ໃຫ້ກຳ­ນົດຄວາມຕ້ອງ­ການປັດໄຈການຜະ­ລິດ ໂດຍສະ­ເພາະແນວພັນ, ຝຸ່ນ, ຢາປາບສັດ­ຕູພືດ, ທຶນ­ຮອນຂອງຊາວກະ­ສິ­ກອນ ແລະ ຈຸດສຸມສິນ­ຄ້າປາຍແຫຼມ ເພື່ອເປັນບ່ອນອີງໃນການສະ­ເໜີໃຫ້ທະ­ນາ­ຄານສະໜອງສິນເຊື່ອແກ່ຊາວກະ­ສິ­ກອນ, ພ້ອມກັນນັ້ນ ກໍຕ້ອງມີມາດຕະ­ການທີ່ເໝາະສົມເພື່ອກະ­ກຽມຮັບມືກັບໄພທຳມະຊາດ, ໃຫ້ຊຸກ­ຍູ້ສົ່ງ­ເສີມຊາວກະ­ສິ­ກອນຂະ­ຫຍາຍພັນສັດ, ພັນປາ ລວມທັງພັດທະນາອາ­ຫານສັດ ແລະອາ­ຫານປາ, ພ້ອມສືບ­ຕໍ່ເຝົ້າລະ­ວັງການແຜ່ລະ­ບາດຂອງພະ­ຍາດສັດຕິດພັນກັບການປຸກລະດົມຂະບວນການສັກຢາປ້ອງກັນສັດລ້ຽງໃຫ້ໄດ້ໃນອັດ­ຕາສ່ວນສູງ ໂດຍຖືເອົາວັນທີ 11 ພະ­ຈິກເປັນວັນສ້າງຂະບວນການສັກຢາກັນພະ­ຍາດສັດໃຫ້ກວ້າງ­ຂວາງໃນທົ່ວປະ­ເທດ.

ສຳ­ລັບການຜະ­ລິດລະ­ດູ­ແລ້ງສົກປີ 2015-2016 ນີ້, ອົງ­ການປົກ­ຄອງທ້ອງ­ຖິ່ນແຕ່ລະຂັ້ນທີ່ໄດ້ຕັ້ງ­ໜ້າປຸກລະດົມຊຸກ­ຍູ້ຊາວກະ­ສິ­ກອນ ແລະປະ­ຊາ­ຊົນບັນ­ດາ­ເຜົ່າໃນທ້ອງ­ຖິ່ນຂອງຕົນລົງ­ມືທຳການຜະ­ລິດແຕ່ຕົ້ນລະ­ດູການຢ່າງເປັນຂະບວນຟົດ­ຟື້ນ ສາ­ມາດປັກດຳນາ­ແຊງ ໄດ້ 99.315 ເຮັກ­ຕາ ແລະປູກພືດລະດູແລ້ງໄດ້ 136.762 ເຮັກ­ຕາ, ມາຮອດປະ­ຈຸບັນ ຊາວກະ­ສິ­ກອນໃນຂອບເຂດທົ່ວປະ­ເທດ ຍັງສືບ­ຕໍ່ບົວ­ລະ­ບັດຮັກ­ສາເຂົ້າ­ນາ­ແຊງ ແລະ ພືດລະ­ດູ­ແລ້ງຂອງຕົນຢ່າງເປັນເຈົ້າການ, ພ້ອມກັນນັ້ນ ກໍສຳ­ເລັດການເກັບກ່ຽວມ້ຽນມັດເຂົ້າ­ນາແຊງໃນບາງທ້ອງ­ຖິ່ນລວມ 42.450 ເຮັກ­ຕາເທົ່າກັບ 43%.

ທີ່ມາ: logo