WHO ຊີ້… ກຸ່ມປະເທດທຸກຍາກມີຜູ້ປ່ວຍ ແລະ ເສຍຊີວິດຈາກພະຍາດໝາກແດງຫຼາຍທີ່ສຸດ

0
282

ອົງການອະນາໄມໂລກ ຫຼື WHO ແລະ ເຈົ້າໜ້າທີ່ຂອງອາເມຣິກາໄດ້ຖະແຫຼງຂ່າວເມື່ອບໍ່ດົນມານີ້ວ່າ: ເມື່ອປີ 2018 ຜ່ານມາມີຜູ້ເສຍຊີວິດຈາກພະຍາດໝາກແດງທົ່ວໂລກຫຼາຍກວ່າ 142.300 ລາຍ, ສ່ວນໃຫຍ່ເປັນເດັກອາຍຸຕໍ່າກວ່າ 5 ປີ, ໂຕເລກຜູ້ປ່ວຍລວມມີ 9,7 ລ້ານຄົນ ເພາະເກີດພາວະຢຸດນິ້ງຂອງການໃຫ້ວັກຊີນປ້ອງກັນພະຍາດໝາກແດງ ທົ່ວໂລກມາດົນເກືອບທົດສະວັດ. ຂໍ້ມູນດັ່ງກ່າວພົບວ່າ: ກຸ່ມປະເທດທຸກຍາກມີຜູ້ປ່ວຍ ແລະ ເສຍຊີວິດຈາກພະຍາດໝາກແດງຫຼາຍທີ່ສຸດຊຶ່ງຢູ່ໃນ 5 ປະເທດຄື: ຄອງໂກ, ໄລບີເຣຍ, ມາດາກັສກາ, ໂຊມາເລຍ ແລະ ຢູເຄຣນ. ຂະນະທີ່ປະເທດໝູ່ເກາະຊາມົວຕ້ອງເລັ່ງໃຫ້ວັກຊີນໝູ່ເພື່ອຄຸມການລະບາດທີ່ມີຜູ້ເສຍຊີວິດແລ້ວ 62 ລາຍ.

ທັງນີ້, ໃນກຸ່ມປະເທດຮັ່ງມີແມ່ນຜະເຊີນບັນຫາການລະບາດຂອງພະຍາດໝາກແດງບໍ່ຕ່າງກັນ ໂດຍສະເພາະອາເມຣິກາຊຶ່ງພົບຜູ້ປ່ວຍສູງທີ່ສຸດໃນຮອບ 25 ປີ, ສ່ວນປະເທດເອີຣົບ 4 ປະເທດຄື: ແອລເບເນຍ, ສາທາລະນະລັດເຊັກ, ເກຣັກ ແລະ ອັງກິດ ແມ່ນສູນເສຍສະຖານະພາບ “ການຖອນຮາກພະຍາດໝາກແດງ” ໃນປີ 2018 ເນື່ອງຈາກພົບການລະບາດຕໍ່ເນື່ອງດົນກວ່າ 1 ປີ.

ຂະນະທີ່ສະຖິຕິຜູ້ປ່ວຍ ແລະ ເສຍຊີວິດຈາກພະຍາກໝາກແດງທົ່ວໂລກເພີ່ມຂຶ້ນ ຊຶ່ງເປັນຜົນມາຈາກການເຄື່ອນໄຫວຕໍ່ຕ້ານວັກຊີນ “MMR” ປ້ອງກັນພະຍາດໝາກແດງ, ຄາງທູມ ແລະ ໝາກແດງເຢຍລະມັນທົ່ວໂລກ ເພາະມີການອ້າງຂໍ້ມູນຜິດໆວ່າ: ວັກຊີນຊະນິດດັ່ງ ກ່າວສ່ຽງເຮັດໃຫ້ເກີດພາວະຜິດປົກກະຕິທາງການສື່ສານ ແລະ ອາລົມ (autism) ໃນກຸ່ມ ເດັກນ້ອຍ, ສ່ວນຜູ້ຕິດເຊື້ອໝາກແດງຈະມີອາການແຊກຊ້ອນ, ປອດບວມ, ສະໝອງບວມ, ຕາບອດ ແລະ ຫູໜວກ.

 

 

ຮຽບຮຽງ: ເພັງສະຫວັນ

ຮູບພາບ: thairath

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.