UN ກຽມສອບສວນຟີລິບປິນກໍລະນີສົງຄາມຢາເສບຕິດ

0
121

ຄະນະມົນຕີສິດທິມະນຸດແຫ່ງສະຫະປະຊາຊາດມີມະຕິໃນການສອບສວນນະໂຍບາຍສົງຄາມຢາເສບຕິດ ແລະ ການກວດລ້າງອາຊະຍາກຳຂອງລັດຖະບານຟີລິບປິນໃນຍຸກຂອງປະທານາທິບໍດີ ໂຣດຣິໂກ ດູເຕຣເຕ.

ສຳນັກຂ່າວຕ່າງປະເທດລາຍງານຈາກນະຄອນເຈນີວາ ປະເທດສະວິດເຊີແລນໃນວັນທີ 12 ກໍລະກົດວ່າ UN ມີມະຕິສຽງສ່ວນໃຫຍ່ໃນການປະຊຸມດ້ວຍຄະແນນ 18 ຕໍ່ 14 ສຽງ ໃນນັ້ນ ໜຶ່ງສຽງຄັດຄ້ານກໍຄື ສປ ຈີນ ແລະ ບໍ່ອອກສຽງ 15 ສຽງ (ໜຶ່ງໃນນັ້ນແມ່ນຍີ່ປຸ່ນ) ໃນການຮັບຮອງມະຕິທີ່ສະເໜີໂດຍກຸ່ມປະເທດໃນເອີຣົບຫຼາຍກວ່າ 20 ແຫ່ງຊຶ່ງນຳໂດຍ ໄອແລນຊຶ່ງຮຽກຮ້ອງໃຫ້ UN ຈັດຕັ້ງຄະນະເຮັດວຽກສະເພາະກິດສືບສວນ-ສອບສວນນະໂຍບາຍຂອງລັດຖະບານຟີລິບປິນຊຸດປັດຈຸບັນພາຍໃຕ້ການນຳຂອງປະທານາທິບໍດີ ດູເຕຣເຕ ທີ່ໃຊ້ມາດຕະການຂັ້ນເດັດຂາດໃນການປາບປາມຢາເສບຕິດ ແລະ ອາຊະຍາກຳທີ່ກ່ຽວຂ້ອງ.

ນັບແຕ່ ດູເຕຣເຕ ເຂົ້າມາຮັບຕຳແໜ່ງເມື່ອປະມານກາງປີ 2017 ລັດຖະບານຟີລິບປິນໄດ້ ຢືນຢັນຈຳນວນຜູ້ເສຍຊີວິດຈາກມາດຕະການດັ່ງກ່າວຫຼາຍກວ່າ 5.000 ລາຍ ແຕ່ຫຼາຍຝ່າຍໂດຍສະເພາະອົງກອນສິດທິມະນຸດເຊື່ອວ່າໂຕເລກອາດຈະສູງກວ່ານີ້ ຂະນະທີ່ປັດຈຸບັນໂຕເລກຢ່າງໜ້ອຍຢູ່ທີ່ 27.000 ລາຍ ທັງນີ້ ທ່ານ ອີວານ ກາຣເຊຍ ເອກອັກຄະຣາຊະທູດຟີລິບປິນປະຈຳສຳນັກງານສະຫະປະຊາຊາດທີ່ນະຄອນເຈນນີວາກ່າວວ່າ “ມະຕິດັ່ງກ່າວຄືອັກຄະຕິທີ່ເປັນຜົນຈາກການຟັງຄວາມຂ້າງດຽວ” ແລະ ກ່າວເຖິງກໍລະນີການເສຍຊີວິດຂອງເດັກຍິງ ໄມກາ ຢູລິປນາ ໄວ 3 ປີໃນເຫດການປະທະລະຫວ່າງເຈົ້າໜ້າທີ່ຕຳຫຼວດກັບກຸ່ມຜູ້ຕ້ອງສົງໄສຂອງສະມາຊິກຂະບວນການຄ້າຢາເສບຕິດທີ່ນະຄອນມະນິລາເມື່ອວັນທີ 29 ມິຖຸນາຜ່ານມາ ຂະນະທີ່ ດູເຕຣເຕ ກໍໄດ້ກ່າວວ່າ ອາດຈະອະນຸຍາດໃຫ້ UN ສົ່ງທີມງານເຂົ້າມາໃນປະເທດເພື່ອຄວາມໂປ່ງໃສ.

ຢ່າງໃດກໍດີ ຟີລິບປິນພົ້ນສະພາບຈາກການເປັນໜຶ່ງໃນລັດພາຄີຂອງທຳມະນູນນະຄອນໂຣມ ຊຶ່ງເປັນສົນທິສັນຍາລະຫວ່າງປະເທດໃນການຈັດຕັ້ງສານອາຍາລະຫວ່າງປະເທດ (ICC) ເມື່ອກາງເດືອນມີນາຜ່ານມາພາຍຫຼັງໃຊ້ເວລາດຳເນີນການກວ່າ 1 ປີເນື່ອງຈາກບໍ່ພໍໃຈທີ່ ICC ແຊກແຊກກິດຈະການພາຍໃນຂອງຟີລິບປິນດ້ວຍການສືບສວນ-ສອບສວນເບື້ອງຕົ້ນວ່າ ດູເຕຣເຕ ມີສ່ວນກ່ຽວຂ້ອງກັບການເສຍຊີວິດຢ່າງຜິດກົດໝາຍຂອງປະຊາຊົນຈາກນະໂຍບາຍສົງຄາມຢາເສບຕິດ ຫຼື ບໍ່? ແຕ່ ICC ຢືນຢັນວ່າ ເຖິງແມ່ນວ່າຟີລິບປິນບໍ່ໄດ້ເປັນສະມາຊິກແລ້ວກໍຍັງສາວມາດດຳເນີນການຕໍ່ໄດ້.

 

 

ຮຽບຮຽງ: ສະຫະລັດ ວອນທິວົງໄຊ

ຮູບພາບ: dailynews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.