ແພດເຕືອນ! ລະວັງ​ພະຍາດອັກ​ເສບ​ລະບົບ​ຫາຍ​ໃຈ ​- ຖອກທ້ອງ​ ໃນ​ລະດູ​ໜາວນີ້!

DSC_0365

ທ່ານ​ ສຈ ດຣ. ນາງ ດວງ​ດາວ ສຸກ​ອາ​ລຸນ ຮອງ​ອຳນວຍ​ການ​ໂຮງໝໍ​ມະ​ໂຫສົດ ​​ໃຫ້​ສຳ​ພາດ​ຕໍ່​ນັກ​ຂ່າວ​ພວກເຮົາ​ວ່າ: ປັດ​ຈຸ​ບັນ​ສະພາບ​ອາກາດ​​ ມີ​ການ​ປ່ຽນ​ແປງ ​ເລີ່ມ​ໜາວ​ເຢັນ​ລົງ, ຈຶ່ງ​ເປັນສາ​ເຫດ​ເຮັດ​ໃຫ້​ພະຍາດ​ຕ່າງໆ​ເກີດ​ຂຶ້ນ​ໄດ້​ງ່າຍ​, ​ໂດຍ​ສະ​ເພາະ ພະຍາດ​ອັກ​ເສບ​ລະ​ບົບຫາຍ​ໃຈ (ເປັນຫວັດ, ​​​ໄອ, ອັກ​ເສບ​ປອດ, ປອດ​ບວມ​) ​ແລະ ພະຍາດຖອກທ້ອງ, ​ຊຶ່ງ​ມັກ​ເກີດ​ຂຶ້ນ​ກັບ​​ທຸກ​ເພດ​​ໄວ ນັບ​ແຕ່​ເດັກນ້ອຍ​ ແລະ ຜູ້​ສູງ​ອາຍຸທີ່ມີ​ພະຍາດ​ຊຳ​ເຮື້ອ​ຢູ່​ແລ້ວ. ດັ່ງ​ນັ້ນ ສາ​ເຫດ​ຂອງ​ການ​ເກີດ​ພະຍາດ​ອັກ​ເສບ​ລະບົບ​ຫາຍ​ໃຈ​ນັ້ນ ​ຍ້ອນ​ມີ​ການ​ໃກ້​ຊິດ​ກັບ​ຜູ້​ທີ່​ເປັນ​ຢູ່​ແລ້ວ ​​ໂດຍ​ການ​ຕິດ​ເຊື້ອ​ໄດ້​ຈາກ​ການ​ໄອ, ຈາມ​ຂອງ​ຜູ້​ທີ່​ເປັນ​ພະຍາດ ​ແລະ ​ເຮັດ​ໃຫ້​ຜູ້​ທີ່ຢູ່​​ໃກ້​ຄຽງ​ຕິດ​​ແປດໄດ້ງ່າຍ. ດັ່ງ​ນັ້ນ ຜູ້​ທີ່​ຕິດ​ເຊື້ອ​ແລ້ວ ຄວນ​ໃສ່​ຜ້າ​ອັດ​ປາກ, ​ເວລາ​​ໄອ, ຈາມ ຕ້ອງ​ເອົາ​ມື​ອັດ​ປາກ ​ແລະ ກົ້ມ​ລົງ​ທຸກ​ຄັ້ງ ພ້ອມ​​ເອົາ​ໃຈ​ໃສ່ລ້າງ​ມື​ ​ເພື່ອ​ຫລີກ​ເວັ້ນຈາກ​ສິ່ງ​ສົກກະປົກ​ຕ່າງໆ. ນອກຈາກ​ນີ້ ພະຍາດ​ຖອກທ້ອງ ​ແມ່ນ​ມັກ​ເກີດ​ຈາກ​ການ​ປວດ​ຕົນ​ໂຕ, ເສຍ​ນ້ຳຫລາຍ, ຖ່າຍ​ຫລາຍ​ໆຄັ້ງ​ຕໍ່​ມື້.

ດັ່ງ​ນັ້ນ, ຖ້າ​ມີ​ອາການ​ຄື​ດັ່ງ​ນີ້ຄວນ​ດື່ມ​ນ້ຳ​ຫລາຍໆ, ດື່ມນ້ຳ​ທີ່​ມີ​ທາດ​ເຄັມ​ປະສົມ​, ນອນ​ພັກຜ່ອນ ​ແລະ ຄວນໄປ​ປຶກສາ​ແພດ​ໝໍ​​ຢູ່​ໂຮງໝໍ​​ທັນທີ, ພ້ອມນີ້ ກໍ​ຄວນ​ເອົາ​ໃຈ​ໃສ່​ປະຕິບັດ​ຫລັກການ​ອາ​ນະ​ໄມ 3 ສະອາດ​​ຄື: ກິນສະອາດ, ນຸ່ງຫົ່ມສະ​ອາດ ​ແລະ ຢູ່​ສະອາດ ​ເພື່ອ​ປ້ອງ​ກັນ​ການ​ເກີດ​ພະຍາດ​ຕ່າງໆ​ຢ່າງ​ຖືກ​ວິທີ. ດັ່ງ​ນັ້ນ ຈຶ່ງ​ຂໍ​ໃຫ້​ປະຊາຊົນ​ທຸກ​ຊັ້ນ​ຄົນ​ ພ້ອມ​ກັນ​ເອົາ​ໃຈ​ໃສ່​​ປ້ອງ​ກັນ​ພະຍາດ​ດັ່ງກ່າວ, ຕາມ​ຄຳ​​ແນະນຳ​ຂອງ​ແພດ​ໝໍ​ ເພື່ອ​ສະກັດ​ກັ້ນ​ການ​ແຜ່​ລະບາດ​ຂອງ​ພະຍາດ​​ ໃຫ້​ຫລຸດ​ໜ້ອຍ​ຖອຍ​ລົງ.

 

ແຫລ່ງຂ່າວ:

ລພນ