ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ນັບແຕ່ວັນທີ 2-5 ມີຖຸນານີ້, ບໍລິເວນຄວາມກົດດັນອາກາດຕ່ຳຈາກພາກໃຕ້ຂອງປະເທດຈີນ ຈະແຜ່ລົງມາປົກຄຸມຢູ່ທົ່ວທຸກພາກຂອງລາວ, ສົມທົບກັບລົມມໍລະສຸມຕາເວັນຕົກສ່ຽງໃຕ້ ພັດປົກຄຸມດ້ວຍກຳລັງອ່ອນ, ເຊິ່ງຈະເຮັດໃຫ້ອາກາດຍັງຮ້ອນຂຶ້ນໃນແຕ່ລະພາກ ແລະ ຝົນຕົກໜ້ອຍລົງ, ຢູ່ບາງທ້ອງຖິ່ນ. ສຳລັບພາກເໜືອດ້ານຕາເວັນອອກ: ຝົນຈະຕົກໃນລະດັບຄ່ອຍຢູ່ບາງທ້ອງຖິ່ນ. ອຸນຫະພູມຕ່ຳສຸດ 19-21 ອົງສາ ແລະ ສູງສຸດ 30-32 ອົງສາ. ສ່ວນພາກເໜືອດ້ານຕາເວັນຕົກ: ອຸນຫະພູມຈະຮ້ອນຂຶ້ນ ແລະ ຝົນຈະຫລຸດລົງເປັນສ່ວນໃຫຍ່. ອຸນຫະພູມຕ່ຳສຸດ 23-25 ອົງສາ ແລະ ສູງສຸດ 35-37 ອົງສາ ແລະ ໃນນະຄອນຫລວງວຽງຈັນ: ຝົນຈະຕົກໜ້ອຍລົງເຊັ່ນກັນ, ອຸນຫະພູມຈະຮ້ອນຂຶ້ນເລັກນ້ອຍຄື: ອຸນຫະພູມຕ່ຳສຸດ 25-27 ອົງສາ ແລະ ສູງສຸດ 35-37 ອົງສາ.
ພາກກາງ: ຝົນຈະຫລຸດລົງ, ເຊິ່ງຈະຕົກໃນລະດັບຄ່ອຍຢູ່ບາງທ້ອງຖິ່ນ ແລະ ອາກາດຈະຮ້ອນຂຶ້ນຕື່ມອີກ. ອຸນຫະພູມຕ່ຳສຸດ 24-26 ອົງສາ ແລະ ສູງສຸດ 35-37 ອົງສາ, ສ່ວນພາກໃຕ້ ກໍເຊັ່ນດຽວກັນ. ອຸນຫະພູມຕ່ຳສຸດ 25-27 ອົງສາ ແລະ ສູງສຸດ 35-37 ອົງສາ. ດັ່ງນັ້ນ ຈຶ່ງເຕືອນປະຊາຊົນຢູ່ແຕ່ລະທ້ອງຖິ່ນ ໃຫ້ລະມັດລະວັງຕໍ່ການປ່ຽນແປງຂອງສະພາບອາກາດດັ່ງກ່າວເພື່ອບໍ່ໃຫ້ສົ່ງຜົນກະທົບຕໍ່ການດຳລົງຊີວິດ ແລະ ສຸຂະພາບຂອງຕົນ, ໂດຍສະເພາະແມ່ນການຕິດເຊື້ອພະຍາດຕ່າງໆຕາມລະດູການ.
ຂ່າວຈາກ: ລາວພັດທະນາ