ການປະຕິບັດການທາງທະຫານຂອງຣັດເຊຍ ໄດ້ສົ່ງຜົນກະທົບຕໍ່ເສດຖະກິດ ແລະ ການເຕີບໂຕພາຍໃນປະເທດຣັດເຊຍ ໂດຍ GDP ຣັດເຊຍໄຕມາດ 3 ໄດ້ຫຼຸດລົງ 4% ທຽບກັບຊ່ວງດຽວກັນຂອງປີກ່ອນນີ້ ພ້ອມທັງເຂົ້າສູ່ພາວະທົດຖອຍທາງເຕັກນິກ.

ຈາກການລາຍງານຂອງ ສະຖິຕິຣັດເຊຍ ໄດ້ເຮັດໃຫ້ຮູ້ວ່າ: GDP ຣັດເຊຍໄຕມາດ 3 ໄດ້ຫຼຸດລົງ 4% ທຽບກັບຊ່ວງດຽວກັນຂອງປີກ່ອນນີ້ ເຊິ່ງຫຼຸດລົງໜ້ອຍກ່ອນນັກວິເຄາະທີ່ຄາດການໄວ້ວ່າຈະຫຼຸດລົງ 4,5% ທີ່ເປັນຜົນກະທົບມາຈາກການປະຕິບັດການທາງທະຫານໃນຢູເຄຣນ.

ການຫຼຸດລົງຂອງ GDP ໄຕມາດ 3 ໃນເດືອນກໍລະກົດ ຫາ ເດືອນກັນຍາ ໄດ້ດີຂຶ້ນໜ້ອຍໜຶ່ງ ເມື່ອທຽບກັບ ໄຕມາດ 2 ທີ່ຫຼຸດລົງ 4,1%, ການຫຼຸດລົງຂອງເສດຖະກິດຣັດເຊຍ ມາຈາກການຖືກຂວ້ຳບາດຂອງບັນດາປະເທດໃນຕາເວັນຕົກ ຍ້ອນການປະຕິບັດທາງທະຫານໃນຢູເຄຣນ ສົ່ງຜົນກະທົບຕໍ່ພາກການເງິນ ແລະ ເສດຖະກິດຂອງຣັດເຊຍຢ່າງກວ້າງຂວາງ.

ການຫຼຸດລົງໃນເທື່ອນີ້ ມາຈາກພາກການຄ້າສົ່ງທີ່ຫຼຸດລົງ 22,6% ການຄ້າຍ່ອຍຫຼຸດລົງ 9,1% ໃນຂະນະທີ່ພາກການກໍ່ສ້າງຂະຫຍາຍໂຕ 6,7% ການກະສິກຳ 6,2%.

ກ່ອນການທີ່ຈະມີການປະຕິບັດການທາງທະຫານໃນຢູເຄຣນ ທີ່ເລີ່ມຕົ້ນໃນທ້າຍເດືອນກຸມພາ ເສດຖະກິດຣັດເຊຍຂະຫຍາຍຕົວ 3,5% ໃນໄຕມາດ 1.

ກະຊວງເສດຖະກິດຂອງຣັດເຊຍ ໄດ້ຄາດການວ່າ GDP ໃນປີນີ້ຈະຫຼຸດລົງ 2,9% ຂະນະທີ່ທະນາຄານກາງຄາດວ່າ ຈະຫຼຸດລົງປະມານ 3-3,5% ກ່ອນທີ່ຈະກັບມາຂະຫຍາຍໂຕໃນໄຕມາດ 2 ໃນປີ 2023.

ແຫຼ່ງຂ່າວຈາກ TRT World